بۇگىن وڭتۇستىك قازاقستان وبلىسىنا جۇمىس ساپارى اياسىندا ق ر پرەمەر-مينيسترى باقىتجان ساعىنتايەۆ ءوڭىر جۇرتشىلىعىنىڭ قاتىسۋىمەن تۋريزم مەن كاسىپكەرلىكتى دامىتۋ، جۇمىسپەن قامتۋ مەن ەڭبەك رەسۋرستارىنىڭ موبيلدىلىگىن ارتتىرۋ ماسەلەلەرى بويىنشا كەڭەس وتكىزدى. بۇل جايىندا Qamshy.kz اقپارات اگەنتتىگى پرەمەر-مينيستردىڭ سايتىنا سىلتەمە جاساپ حابارلايدى.

شاراعا مەملەكەتتىك ورگانداردىڭ، وقو اكىمدىگىنىڭ باسشىلارى، وڭىرلەر اكىمدەرىنىڭ ورىنباسارلارى، سالالىق قاۋىمداستىقتاردىڭ وكىلدەرى، جۇمىسپەن قامتۋ ورتالىقتارىنىڭ ديرەكتورلارى، ۇكپ، ۇكىمەتتىك ەمەس ۇيىمدار جانە ب ا ق وكىلدەرى قاتىستى.

وقو اكىمى جانسەيىت تۇيمەبايەۆ ءتۋريزمدى دامىتۋ جونىندە بايانداما جاسادى. ق ر ۇلتتىق ەكونوميكا ءمينيسترى تيمۋر سۇلەيمەنوۆ ق ر ۇكىمەتىنىڭ ەلىمىزدە كاسىپكەرلىكتى دامىتۋ بويىنشا اتقارىپ جاتقان شارالارى تۋرالى باياندادى. ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا جۇمىسپەن قامتۋ جانە ىشكى كوشى-قوندى ىنتالاندىرۋ شارالارى تۋرالى ايتىپ بەردى. ق ر ءبىلىم جانە عىلىم ءمينيسترى ەرلان ساعادييەۆ «سەرپىن» الەۋمەتتىك جوباسىن ىسكە اسىرۋ تۋرالى ەسەبىن ۇسىندى. ق ر مادەنيەت جانە سپورت ءمينيسترى ارىستانبەك مۇحامەدي ۇلى تۋريستىك سالانى دامىتۋدىڭ كەلەشەگى مەن قازىرگى سىن-تەگەۋرىندەرى تاقىرىبىندا ءسوز قوزعادى.

كەڭەس اياسىندا «وقو تۋريزم يندۋسترياسىن دامىتۋ ورتالىعى» قاۋىمداستىعىنىڭ پرەزيدەنتى گۇلميرا اقبەردييەۆا، بۇۇ كوشى-قون اگەنتتىگى ۇيىمىنىڭ ورتالىق ازيا بويىنشا ۇيلەستىرۋشىسى دەيان كەسەروۆيچ، سقو اكىمىنىڭ ورىنباسارى اسقار ساقىپكەرەيەۆ، شقو اكىمىنىڭ ءبىرىنشى ورىنباسارى نۇرىمبەت ساقتاعانوۆ، سونداي-اق وڭتۇستىك قازاقستان وبلىسىنان سولتۇستىك قازاقستان وبلىسىنا قونىس اۋدارعان، ءونىمدى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسىنىڭ قاتىسۋشىسى سەرىك جانالييەۆ ءسوز سويلەدى.

سونداي-اق، كەڭەس قاتىسۋشىلارى «ۇلى جىبەك جولىندا» ءبىرىڭعاي تۋريستىك جوبانى ىسكە اسىرۋ كەلەشەگى جانە ەڭبەككە جۇمىلدىرۋ ماسەلەلەرى تۋرالى پىكىر الماستى.

شارا بارىسىندا وتكەن جىلدىڭ جەلتوقسان ايىندا ۇكىمەت مەملەكەت باسشىسىنىڭ تاپسىرماسى بويىنشا ءونىمدى جۇمىسپەن قامتۋ جانە جاپپاي كاسىپكەرلىكتى دامىتۋ باعدارلاماسىن قابىلداعانى تۋرالى ايتىلىپ ءوتتى. وندا جۇمىسسىز جانە ءوزىن-وزى جۇمىسپەن قامتىعان حالىقتى ەڭبەك نارىعىندا سۇرانىسقا يە كاسىبي داعدىلارعا جاپپاي وقىتۋعا نەگىزگى باسىمدىق بەرىلدى. ونىمەن قوسا، باعدارلاما ەڭبەككە جۇمىلدىرۋدى ارتتىرۋ ماسەلەسىن دە قامتيدى.

بۇدان وزگە، وڭىرلەردى ەكونوميكالىق دامىتۋداعى وزەكتى جاعدايلاردى ەسكەرە وتىرىپ، ىشكى كوشى-قون جاعدايىن جاڭارتۋعا باعىتتالعان كوشى-قون ساياساتىنىڭ تۇجىرىمداماسى قابىلداندى.

ۇكىمەت بيزنەستى دامىتۋ مەن قولداۋ كورسەتۋ تۇرعىسىنان جاعدايدى ەرەكشە باقىلاۋدا ۇستاۋدا، سونىڭ ىشىندە ۇلتتىق كاسىپكەرلەر پالاتاسىنىڭ ءتۇرلى الاڭداردا، ق ر پرەمەر-مينيسترىنىڭ ەل ايماقتارى بويىنشا جۇمىس ساپارلارى بارىسىندا كوتەرگەن ماسەلەلەرى جۇيەلىك پروبلەمالار تىزىمىنە ەنگىزىلگەن. اتالعان ءتىزىم 513 ماسەلەدەن تۇرادى، ولاردىڭ 442ء-سىنىڭ بۇگىندە شەشىمى تابىلعان، قالعان ماسەلەلەر بويىنشا پىسىقتاۋ جۇمىستارى جۇرگىزىلىپ جاتىر.

سونىمەن قاتار دامىتۋدىڭ پەرسپەكتيۆالى باعىتتارىنىڭ ءبىرى رەتىندە تۋريزم سالاسى اتالىپ ءوتتى.

ق ر تۋريستىك سالاسىن دامىتۋدىڭ 2020 جىلعا دەيىنگى تۇجىرىمداماسىنىڭ جوباسىندا 6 تۋريستىك كلاستەردى قۇرۋ كوزدەلىپ وتىر. وندا وقو «ۇلى جىبەك جولىن قايتا جانداندىرۋ» كلاستەرىنە كىرەدى.

وبلىستىڭ اتالعان كلاستەرىنە تۇركىستان قالاسى، وتىرار جانە سارىاعاش اۋداندارى، «اقسۋ-جاباعىلى» جانە «قاراتاۋ» قورىقتارى، «سايرام-وگەم» مەملەكەتتىك ۇلتتىق تابيعي پاركى كىرەدى.

قورىتىندىلاي كەلە، ايتىلعان شارالاردىڭ بارلىعى وبلىستىڭ ەكونوميكالىق الەۋەتىن دامىتۋعا قاجەتتى جاعدايلاردى جاساۋعا باعىتتالعانى جانە جۇيەلى نەگىزدە ىسكە اسىرىلاتىنى اتالىپ ءوتتى.