رەسەي، يران جانە كحدر-عا قارسى سانكسيالاردى ەندىگى كەزەكتە مەملەكەتتىك حاتشى رەكس تيللەرسون قاداعالايتىن بولادى، دەپ حابارلايدى Qamshy.kz اقپارات اگەنتتىگى ريا نوۆوستي سايتىنا سىلتەمە جاساپ. بۇل شەشىمگە قاتىستى مەموراندۋمعا اقش پرەزيدەنتى دونالد ترامپ قول قويدى.

تيللەرسون باراك وباما باسشىلىعى كەزىندە ۋكرايناداعى جاعدايعا قاتىستى اقش تاراپىنان سالىنعان رەسەيگە قارسى سانكسيالار مەن زاڭدى تۇرعىدا تىيىم سالىنعان ىستەرگە جاۋاپ بەرەتىن بولادى. سونىمەن قاتار، كيبەرشابۋىل جاساعانى ءۇشىن ماسكەۋگە سالىنعان سانكسيالاردىڭ زاڭدى تۇردە ورىندالۋىن قاداعالايدى.

اقش-تىڭ مەملەكەتتىك حاتشىسى «كيبەرقاۋىپسىزدىككە زيان كەلتىرەتىن» رەسەي مۇددەسىندە ارەكەت ەتەتىن تۇلعالارعا ۆيزا بەرۋ تۋرالى شەشىم قابىلدايدى.

ايتا كەتەر بولساق، اقش پەن ەو 2014 جىلدان باستاپ ۋكرايناداعى جاعدايلارعا بايلانىستى رەسەيگە قارسى ءبىرقاتار سانكسيالار سالعان بولاتىن. ماسكەۋ، ءوز كەزەگىندە، ۋكراينانىڭ ىشكى داۋلارىنا جاقتاس ەمەس ەكەندىكتەرىن مالىمدەگەن جانە ولارمەن سانكسيالار تىلىندە سويلەسۋگە قارسى بولدى.

2016 جىلدىڭ جەلتوقسان ايىندا ۆاشينگتون رەسەيدى اقش-تاعى پرەزيدەنت سايلاۋىنا ارالاستى دەپ ايىپتاعان بولاتىن. الايدا، اقش-تا وتكەن پرەزيدەنت سايلاۋىنا رەسەيلىك حاكەرلەر شابۋىل جاسادى دەگەن ايىپقا ناقتى دالەل ايتپادى. رەسەي پرەزيدەنتىنىڭ باسپا ءسوز حاتشىسى دميتريي پەسكوۆ ماسكەۋگە تاعىلعان ايىپتى مۇلدە نەگىزسىز دەپ اتادى.