قازاقستان رەسپۋبليكاسىنىڭ اۋىر اتلەتيكا فەدەراسياسى ۇلتتىق قۇرامانىڭ 2017 جىلعى الەم چەمپيوناتىنان شەتتەتىلۋىنە قاتىستى مالىمدەمە جاسادى، دەپ حابارلايدى Qamshy.kz اقپارات اگەنتتىگى sports.kz-كە سىلتەمە جاساي وتىرىپ.
«30 قىركۇيەك - 1 قازان كۇندەرى بۋحارەستتە (رۋمىنيا) حالىقارالىق اۋىر اتلەتيكا فەدەراسياسى (IWF) اتقارۋشى كوميتەتىنىڭ كەزەكتى وتىرىسى ءوتتى. وتىرىس بارىسىندا IWFء-تىڭ ماسەلەلەرى، اتاپ ايتقاندا، سالماق كاتەگوريالارىنىڭ سانى مەن وليمپيادا ويىندارىنىڭ كۆاليفيكاسيالىق ەرەجەلەرىن وزگەرتۋ جانە تاعى سول سياقتى ماسەلەلەر تالقىلاندى. اسىرەسە، وتىرىس كەزىندە تالقىعا تۇسكەن انتيدوپينگىلىك شارالار ب ا ق پەن حالىقارالىق وليمپيادالىق كوميتەتتىڭ ەرەكشە نازارىن اۋداردى. سەبەبى، بۇل سۇراقتار اۋىر اتلەتيكانىڭ بولاشاعىنا تىكەلەي بايلانىستى. بەيجىڭ مەن لوندونداعى وليمپيادا ويىندارىنا قاتىسۋشىلاردىڭ سىنامالارىنا «رە-ساراپتاما» كەزىندە دوپينگتىڭ سان مارتە انىقتالۋىنا بايلانىستى IWF ءقازىر ەرەكشە نازاردا»، - دەلىنگەن ق ر ااف-تىڭ تاراتقان مالىمدەمەسىندە.
ەسكە سالساق، 2016 جىلدىڭ ماۋسىمىندا تبيليسي قالاسىندا IWF اتقارۋشى كوميتەتىنىڭ وتىرىسى وتكەن بولاتىن. وندا بەيجىڭ جانە لوندونداعى وليمپيادا ويىندارى كەزىندە سپورتشىلارى انتيدوپينگتىك زاڭنامانى ءۇش جانە ودان كوپ رەت بۇزعان مەملەكەتتەردى جارىستان 1 جىلعا شەتتەتۋ تۋرالى شەشىم قابىلداندى. اتالعان تىزىمگە اۋىر اتلەتيكا سپورتىندا كوشباسشى سانالىپ كەلگەن 9 مەملەكەت ەندى. ونىڭ ىشىندە قازاقستان دا بار.
«كۇتىلگەندەي، اتقارۋشى كوميتەتتىڭ مۇشەلەرى «تبيليسي شەشىمىن» قايتا قۋاتتاپ، ارنايى كوميسسيانىڭ كەڭەسى نەگىزىندە ونىڭ ورىندالۋ جولدارىن تالقىلادى. قازاقستاندىق فەدەراسيا اتالعان ماسەلەلەر تالقىلانعان بارلىق ساتىدا بىرنەشە سەبەپتەر بويىنشا وزىنە سانكسيالاردىڭ ەنگىزىلۋىن ادىلەتسىز ەكەندىگىن ايتقان بولاتىن. فەدەراسيانىڭ باسقارۋشى قۇرامى تولىقتاي اۋىستىرىلىپ، انتيدوپينگىلىك ساياسات جەتىلدىرىلىپ، قاتاڭداتىلدى. وسىنىڭ ناتيجەسىندە، 2016 جانە 2017 جىلدارى قازاقستاندىق اتلەتتەردەن تىيىم سالىنعان پرەپاراتتار تابىلعان جوق. اتالعان اقپارات قازاقستاندىق دەلەگاسيا ارقىلى IWF اتقارۋشى كوميتەتىنە جولداندى»، - دەپ حابارلادى فەدەراسيادان.
سونداي-اق، حابارلاماعا سايكەس، قازاقستاندىق فەدەراسيا اتقارۋشى كوميتەتتە وسى جىلدىڭ ماۋسىم ايىنان باستاپ IWF ۆيسە-پرەزيدەنتى بولىپ سايلانعان ق ر ااف پرەزيدەنتى جانات تۇسىپبەكوۆپەن تانىستىرىلعان بولاتىن.
«IWFء-تىڭ رەسمي مالىمدەمەسىنە سايكەس، شەشىمدى ورىنداۋ جانە قاجەتتى شارتتار تۋرالى اقپارات وسى جىلدىڭ قازان ايىنىڭ ورتاسىندا 9 ۇلتتىق فەدەراسياعا جولداناتىن بولادى. قازاقستاندىق تاراپ اتالمىش تارتىپتىك شارالاردىڭ ەشبىرى قازاقستاننىڭ جاسوسپىرىمدەر جانە جاستار قۇراماسىنا قولدانىلماۋى، سونىمەن بىرگە قازاقستاندىق وكىلدەر مەن فەدەراسيا تولىعىمەن حالىقارالىق جانە ازيالىق فەدەراسيانىڭ باسقارۋشى ورگاندارىندا جۇمىستارىن جالعاستىرا بەرۋى ءۇشىن كۇش سالۋدا.
كۇتىلىپ وتىرعانداي، نەگىزگى تارتىپتىك شارا - ق ر ەرەسەكتەر قۇراماسىنىڭ 12 ايعا شەتتەتىلۋى بولماق. ارنايى كوميسسيانىڭ 9 ەلدىڭ دوپينگكە قارسى كۇرەس سالاسىنداعى احۋالىنا جۇرگىزەتىن مونيتورينگىسىنىڭ قورىتىندىسى نەگىزىندە شەتتەتۋ مەرزىمى بۇدان دا ەرتە اياقتالۋى مۇمكىن»، - دەلىنگەن حابارلامادا.
بۇعان دەيىن حابارلاعانىمىزداي، حالىقارالىق اۋىر اتلەتيكا فەدەراسياسى (IWF) قازاقستان قۇراماسىن الداعى ۋاقىتتا اقش-تىڭ اناحايما قالاسىندا وتەتىن الەم چەمپيوناتىنا قاتىسۋدان شەتتەتكەن بولاتىن. سونداي-اق ارمەنيا، ازەربايجان، بەلارۋس، جۇڭگو، مولدوۆا، تۇركيا جانە ۋكراينا مەملەكەتتەرىنىڭ ۇلتتىق قۇرامالارى ءبىر جىلعا ديسكۆاليفيكاسيالاندى.
پىكىر قالدىرۋ