ق ر پرەزيدەنتى جانىنداعى
ادام قۇقىقتارى جونىندەگى كوميسسيا ءتوراعاسى،
ق ر پارلامەنتى ءماجىلىسىنىڭ دەپۋتاتى
ق.س.سۇلتانوۆ مىرزاعا
ق ر پارلامەنتى ءماجىلىسىنىڭ
الەۋمەتتىك-مادەني دامۋ
كوميتەتىنىڭ مۇشەلەرىنىڭ نازارىنا!
قۇرمەتتى قۋانىش سۇلتان ۇلى!
قۇرمەتتى دەپۋتاتتار!
تاۋەلسىزدىگىنە جيىرما جىل ەندى تولعان قازاقستاننىڭ بۇگىنگى باقىتىنا، اتا-بابالارىمىز ارمان تۇتقان تاۋەلسىزدىگىنە ءارتۇرلى تاراپتان اقپاراتتىق شابۋىلداۋ جاسالۋدا. سولاردىڭ ءبىرى – قازاقتىڭ تاريحي ساناسى، تاريحي ساباقتاستىعى، رۋحاني، مادەني بولمىسىنا قاتىستى ءارتۇرلى جالاڭ يدەولوگيالار مەن تۇسىنىكتەردى تىقپالاۋ جالعاسۋدا.
«ءتۇبىمىز – تۇرىك، ءدىنىمىز – يسلام، كىتابىمىز – قۇران» دەيتىن ەلباسى ن.ءا.نازاربايەۆتىڭ ءوزى اۋزىنا الىپ، القالى جيىندا سويلەگەن دۋالى تىركەسى قازاقتىڭ شىن رۋحاني بولمىسىن بەينەلەپ تۇرعانداي.
الايدا، سوڭعى ۋاقىتتارى قازاقتى تاڭىرشىلدىكپەن بىتە قايناستىرىپ، وسى ءبىر تۇسىنىككە كوز ۇيرەتۋ فاكتىلەرىنىڭ ورىن الىپ وتىرعانىن ايتۋىمىز كەرەك. اتاۋلار – ءقايسىبىر ۇلتتىڭ، قوعامنىڭ تاريحي كەزەڭ جايلى پىكىرىن قالىپتاستىراتىن ماڭىزدى ءبىر ۇعىم. راديوعا «Tengri FM»، اقپاراتتىق سايتقا «Tengrinews» دەپ نىسپى قويۋ، فەستيۆالعا «Tengri-2012» دەپ ايدار تاعۋ، اۋەدەگى الىپ مونوپوليا «AirAstana» كومپانياسىنىڭ كورپوراتيۆتى بورتتا تەگىن تاراتىلاتىن جۋرنالىنا «تەنگري» ەسىمىن تەلۋى، ىشەتىن سۋسىن مەن قالاداعى قوناق ۇيگە «تەنگري»، تۋريستىك كومپانياعا «تەنگر تۋر» دەگەن اتاۋدى جاپسىرۋ، قازاقتىڭ بايىرعى عاسىرلاردان بەرى ۇستانىپ كەلە جاتقان مۇسىلماندىق دىنىنە، ۇلتتىق سيپاتىنا دەگەن قارسىلىقتىڭ كورىنىسى سياقتى.
بۇل اتاۋلارمەن ىڭ-شىڭسىز، ءبىراق ۇزدىكسىز تۇردە ءسىڭىرىلىپ جاتقان «تاڭىرشىلدىك سيندرومىنا» كينو، ونەر ءتىلى ارقىلى دا ۇلەس قوسىلىپ جاتىر. «ءقازاقفيلمنىڭ» رەجيسسەرى ر. ابدىراشيەۆتىڭ «ۆ پويسكاح تەنگري» دەگەن ەكسپەدسيا ۇيىمداستىرۋى، الماتىداعى ارت-گالەرەياعا «تەنگري ۋماي» دەپ ات قويۋ ءتارىزدى قىلىقتارعا سوڭعى ۋاقىتتارى «قازاقفيلم» بەينەسىندە مەملەكەتتىڭ قارجىسىنىڭ ءوزى ۇلەس قوسا باستاعانعا ۇقسايدى. ءبىز اتالعان سيندرومنىڭ كينو تىلىمەن سىڭىرىلۋىنە ۇلەس قوسىپ جاتقان «شال» ءفيلمىن ايتىپ وتىرمىز. بۇل جونىندە كينوتانۋشىلاردىڭ وزدەرى «تاڭىرشىلدىكتى ناسحاتتاۋدا تاپتىرمايتىن ۇلگىلى كينو بولدى» دەپ جارىسا باعالاپ جازىپ جاتقانى بەلگىلى.
قۇقىقتىق نيگليزمنەن ارىلۋعا تىرىسقان ەلدىڭ ازاماتتارى رەتىندە كونستيتۋسيالىق قۇقىقتارىمىزعا سۇيەنە وتىرىپ، كەلەسى ساۋالدارعا بۇرمالاۋسىز ناقتى جاۋاپ العىمىز كەلەدى:
1) مۇسىلمانداردىڭ حالىقتىڭ 70 پايىزدان استام ۇلەسىن، ولاردىڭ ءدىني سەنىم بوستاندىعىن ەسكەرە وتىرىپ، اتالعان فيلمگە قۇقىقتىق، ءدىني تۇرعىدان ازاماتتاردىڭ، مەملەكەتتىڭ، تاريحي قالىپتاسۋ مۇددەسىنە قايشى تۇستارى بار-جوقتىعىن انىقتاۋ ماقساتىندا قۇزىرلى ورگاندارعا ساراپتاما جاساۋعا ۇسىنىس بەرۋلەرىڭىزدى سۇرايمىز.
2) مەملەكەتتىڭ ءاربىرىمىزدىڭ ۇلەسىمىز بار قازىناسىنان «قازاقفيلم» تۇسىرگەن تاڭىرشىلىك ناسيحاتتايتىن كينوسىنا قارجىنىڭ ءبولىنۋى حالىقتىڭ، ونىڭ ىشىندە جەكەلەگەن بىزدەردىڭ قۇقىقتارىمىزعا نۇقسان كەلتىرۋدىڭ سيپاتى ەمەس پە؟
3) ادام قۇقىقتارى جونىندەگى حالىقارالىق پاكتىلەر مەن كونۆەنسيالارعا ساي، ءوزىمىزدىڭ ار وجدان بوستاندىعىمىز بەن ادام رەتىندەگى قۇقىقتارىمىزعا زالال كەلدى دەپ ەسەپتەسەك سوتقا جۇگىنۋ مۇمكىندىگى قانداي جانە كوميسسيا ەلىمىزدەگى جانە شەتەلدەگى حالىقارالىق تورەلىك سوتتارىنا جۇگىنگەن جاعدايدا بىزگە قانداي كومەك كورسەتە الادى؟
«ءوز قۇقىڭدى ءبىل!» قوعامدىق توبىنىڭ
ۇيلەستىرۋشىسى گ. سەرىكحان
«تانىم» شىعارماشىلىق ۇيىمىنىڭ
اتقارۋشى ديرەكتورى ز. قايرات
«بەرەكە» ۇلتتىق ءداستۇر نەگىزدەرى» ورتالىعىنىڭ
جەتەكشىسى ا. جانبوسىن
سۋرەت عالامتوردان الىندى
پىكىر قالدىرۋ