ەلدىڭ جۇمىس كۇشى مول ايماقتارى سانالاتىن الماتى، قىزىلوردا، ماڭعىستاۋ وبلىستارىنان شقو ريددەر قالاسىنا كوشىپ كەلگەن 22 وتباسى جاڭا پاتەرگە يە بولىپ، تولىعىمەن جۇمىسقا ورنالاستىرىلدى. قونىس اۋدارۋشىلارعا پاتەر كىلتىن ق ر پرەمەر-مينيستردىڭ ورىنباسارى بەردىبەك ساپاربايەۆ پەن شقو اكىمى دانيال احمەتوۆ تابىستادى، دەپ حابارلايدى شقو اقپاراتىق ورتالىعى.
شقو قونىس اۋدارۋشىلاردى ورنالاستىرۋ ءبىرىنشى بولىپ ريددەر قالاسىنان باستالدى. سالتاناتتى راسىمگە ارنايى كەلگەن ق ر پرەمەر-مينيستردىڭ ورىنباسارى ب. ساپاربايەۆ اتالمىش باعدارلامانىڭ ماقسات-مۇددەسىن ايتىپ ءوتتى. «ەلىمىزدىڭ وڭتۇستىك وڭىرلەرىندە جۇمىسسىزدىق بايقالسا، شقو جۇمىس كۇشى تاپشى. شقو بويىنشا 18000، ال ريددەر قالاسىنىڭ وزىندە 700 جۇمىس ورنى بوس تۇر. سوندىقتان، ەلباسىنىڭ جۇمىسسىزدىقتى جويۋ تۋرالى تاپسىرماسىن نەگىزگە الا وتىرىپ، ەلىمىزدىڭ وڭتۇستىك وڭىرلەرىنەن تىلەك بىلدىرگەن وتباسىلاردى كوشىرۋ ناۋقانى باستالدى»، – دەدى ب. ساپاربايەۆ.
سالتاناتتى راسىمنەن كەيىن «شقو – وتباسىنىڭ دەموگرافيالىق دامۋىنا جانە ءومىر سۇرۋىنە قولايلى ايماق» تاقىرىبىندا فورۋم وتكىزىلدى. فورۋمعا كەلگەن ق ر دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا ەلدەگى جالپى دەموگرافيالىق احۋال تۋرالى ناقتى مالىمەت بەردى. «ىشكى كوشى-قوننان بولەك، شەتتەن كەلگەن قانداستاردىڭ 21 % وقو، 16 % الماتى، 13 % ماڭعىستاۋ، 9 % جامبىل وبلىستارىنا كوشىپ كەلسە، قالعان 40% وزگە 11 وبلىستارعا قونىس اۋدارعان. دەمەك، حالىقتى جۇمىس كۇشى مول سانالاتىن وڭتۇستىك ايماقتاردان جۇمىس كۇشى تاپشى ايماقتارعا كوشىرۋ مەملەكەتتىك ماڭىزعا يە»، – دەدى ت. دۇيسەنوۆا. ءوز كەزەگىندە ءسوز العان تارباعاتاي اۋدانىنىڭ اكىمى دىلدابەك ورازبايەۆ اۋداندا حالىقتىڭ جەتىسپەۋشىلىگى سۋارمالى جەرلەردى يگەرۋ ماسەلەسىن تۋىنداتىپ تۇرعانىن ايتتى. د. ورازبايەۆتىڭ ايتۋىنشا، تارباعاتاي اۋدانىنىڭ حالقى 1991 جىلدان بەرى ەكى ەسەگە ازايعان.
فورۋمدا كوشىپ كەلگەن كاسىپكەرلەر ماسەلە توڭىرەگىندە ويىمەن ءبولىستى. كاسىپكەرلەردىڭ ۇسىنىستارىن مۇقيات تىڭداعان ب. ساپاربايەۆ وبلىسقا وزگە ايماقتاردان جەر يگەرۋ ماماندارى تارتىلاتىنىن ايتتى. «ودان بولەك، «سەرپىن» باعدارلاماسى بويىنشا ريددەر اگرارلىق-تەحنيكالىق كوللەدجىنە الماتى، قىزىلوردا وبلىسىنان كەلگەن 25 ستۋدەنت ءبىلىم الۋدا. ولار دا تولىق جاتاقحانامەن قامتىلىپ، اي سايىن شاكىراقىلارىن الىپ وتىر. ءساتىن سالسا، وسىنداي يگى جۇمىس كەلەسى جىلى سقو، پاۆلودار، قوستاناي وبلىستارىنا دا قولعا الىناتىن بولادى»، – دەدى ب. ساپاربايەۆ.
