"ءبىزدىڭ قازاق «اقىرزامان» دەپ الاڭداماسا دا بولادى".
كورشى قاريا مەنى وسىلاي دەپ جۇباتتى. جارىقتىق، ەلباسىمىز نۇرسۇلتان ءابىشۇلىنا قۇلاي بەرىلگەن. شىن سەنەدى، شىن قادىرلەيدى. كەيدە ويلايسىڭ، مىنا قازاقتىڭ ءبارى وسى قارياداي بولسا، نۇرەكەڭ مۇمكىن قازاقتىڭ ايىن وڭىنان، كۇنىن سولىنان تۋعىزار ما ەدى؟! قارت ايتادى: «ەگەر اقىرزامان بولىپ جاتسا، باسقا جۇرتتى بىلمەيمىن ءبىزدىڭ ەلباسى ەشقاشان قازاق ەلىن توپان سۋدىڭ استىندا قالدىرمايدى. تىم قۇرىسا ۇلكەن كەمە جاساتىپ، الاشتىڭ ۇرپاعىن امان ساقتاپ قالادى». دۇرىس-اق!
مۇمكىن بۇل كەمە «نۇر كەمەسى» دەپ اتالاتىن بولار، مۇمكىن ول قازىعۇرتتىڭ باسىندا قالقايىپ تۇرىپ، قازاعىن امان ساقتاپ قالار. ءاي، ءبىراق ەلباسىنا وڭاي تيمەيدى-اۋ! 130 ۇلتتان ەر-ايەلىن جۇپتاپ، ەكى ادامنان الاتىن بولسا، 260 ادام. بۇل ەندى كەمەگە اۋىرلىق اكەلەتىنى ءسوزسىز. نەدە بولسا ءوز قازاعىمنان الايىن دەپ اقوردانىڭ تورىنەن الاش بالاسىنا كوز قىرىن سالاتىن شىعار. سوندادا قيىن...
«ۇلى ءجۇز، ورتا ءجۇز، كىشى ءجۇز. 14 وبلىس. ءورىستىلدى قازاق، ءقازاقتىلدى قازاق. باي قازاق، كەدەي قازاق. ورالمان قازاق، جەرگىلىكتى قازاق. ورالماننىڭ ىشىندە قىتايدان كەلگەنىن الامىن با، موڭعوليادان كەلگەنىن الامىن با، جوق، الدە وزبەكستاننان كەلگەندەرىن، الدە تۇركمەنستان، الدە رەسەي... قايسىسى دۇرىس؟
مۇسىلمان قازاقتى الامىن با، كاپىر قازاقتى ما؟ كاپىردەن السام، حريستيانى دۇرىس پا، الدە، كريشنايتتەر دۇرىس پا؟ قايسىسىن العانىم دۇرىس؟ نەدە بولسا مۇسىلمانى دۇرىس-اۋ! و دۇنيەگە بارعاندا اللا تاعالانىڭ الدىندا بەتىمىز جارىق بولاتىن شىعار... ال وندا مۇسىلمان قازاقتىڭ ىشىنەن كىمدى الامىن؟ ۋاحاببيست پە، قۇرانيتتەر مە، سوپىلار ما؟ بۇلاردىڭ قايسىسى يسلامدى تازا ۇستانىپ ءجۇر ەكەن، ءا...»
بۇل سۇراقتاردىڭ ءوزى كوزى اشىق، كوكىرەگى وياۋ ادامعا «اقىرزاماننان» كەم سوقپايتىن سۇراقتار.
ەلباسىنا قيىن بولدى-اۋ! «نۇر كەمەسىن» جاساتپاۋعا تاعى بولمايدى. شەراعاڭنىڭ، شەرحان مۇرتازانىڭ: «ەلباسى نۇرسۇلتان نازاربايەۆ ادامزاتتى توپان سۋدان امان الىپ شىققان نۇح پايعامبارعا ۇقساپ، قازاقستاندى سوناۋ 90-جىلدارى تاۋەلسiزدiك جولىندا باستالعان كۇرەستە امان الىپ شىعىپ، ەل قىلدى...» دەگەن ءسوزى بار. «...مەن نۇرسۇلتاندى ءوزiم ازامات تاريحىنداعى ەڭ ۇلى ادام دەپ باعالايتىن مۇسىلمان جۇرتىنىڭ ارداقتى پەرزەنتi مۇحاممەد پايعامبارعا ۇقساتامىن" دەدى ەمەس پە فاريزا وڭعارسىنوۆا.
قايتپەك كەرەك؟ كەدەندىك وداقتاس رەسەيدىڭ ءوزى «نۇر كەمەسىن» جاساتۋعا اعاش بەرۋدەن باس تارتۋى دا مۇمكىن. قازاق قۇتقارىلىپ كەتسە قيىن عوي... الدە، بەلورۋسسيا مەن رەسەيمەن بىرىگىپ جاسايمىز با؟ جو، جوق. ولار دەر شاعىندا الاشتى ايدالادا قالدىرۋى عاجاپ ەمەس.
ەلباسى بولۋدا قيىن ەكەن عوي... ايتەۋىر جوعارىداعى ابىز قاريا ايتقانداي، ءبىزدىڭ قازاق «اقىرزامان» دەپ الاڭداماسا دا بولادى ەكەن. قايتكەن كۇندەدە «نۇر كەمەسى» قازاقتىڭ جەرىندە جاسالاتىن شىعار...
حازىرەت ءابدىلدا
سۋرەت عالامتوردان الىندى
پىكىر قالدىرۋ