رەسەيلىك «دەن تۆ» تەلەارناسىنداعى «سلوۆو ي دەلو» باعدارلاماسىنىڭ قوناعى جازۋشى ەدۋارد ليمونوۆ نازاربايەۆتان كەيىنگى قازاقستان تۋرالى جانە قازاقستان جەرى تۋرالى پىكىر بىلدىرەدى دەپ جازادى Qamshy.kz اقپارات اگەنتتىگى.  

باعدارالاما بارىسىندا ليمونوۆ ءپۋتيننىڭ شىن مانىندە وتە جۇمساق ەكەنىن ايتادى. سەبەبى تاريح كورسەتكەندەي ودان دا قاتىگەز ادامدار باسشىلىقتا بولعانىن مىسالعا كەلتىرەدى. سولاردىڭ ءبىرى ستالين ەكەنىن ايتىپ وتەدى. باعدارلاما جۇرگىزۋشىسى سەرگەي حارسىزوۆ كورشى ەلدەرگە ءپۋتيننىڭ جۇمساقتىق تانىتىپ وتىرعانىن ايتادى. كورشى ەل دەپ قانداي ەلدى مەڭزەپ تۇرعانى بەلگىلى.

جازۋشى ۋكراينانىڭ بولاشاعى تۋرالى ءوز بولجامىمەن بولىسەدى دە اڭگىمەسىن نازاربايەۆسىز قازاقستان دەگەن تاقىرىپتا جالعاستىرادى. ونىڭ ويىنشا، نازاربايەۆ بيلىكتەن كەتكەننەن كەيىن ەل اراسىندا بۇلىك شىعادى. ول بىردەن ەمەس، بىرنەشە جىلدان كەيىن دە بولۋى مۇمكىن ەكەنىن ايتادى. سول ۋاقىتتا ءپۋتيننىڭ ماسەلەنى ءوز قولىنا الۋىنا تۋرا كەلەدى ەكەن. رەسەي پرەزيدەنتىنىڭ «ورىس الەمى» دەپ جۇرگەنىنە ءبىراز ۋاقىت بولعانىن ايتا كەلە، قازاقستاننىڭ سولتۇستىگىندەگى جەرلەر رەسەيگە تيەسىلى ەكەنىن ايتادى. ول ۋاقىتتا ەكرانعا قازاقستاننىڭ كارتاسىن شىعارىپ، ونى ورالدان باستاپ وسكەمەنگە دەيىنگى جەرلەردى رەسەيدىڭ جەرى دەپ كورسەتەدى. ءتىپتى اتالعان ايماقتارعا «كازاحسكايا نوۆوروسسيا» دەپ جازىپ تا قويعان. ليمونوۆ سول جەرلەردى جاۋلاپ الماۋ ۇلكەن كۇنا ەكەنىن قاداپ ايتادى.

قازاقستاندا 4 ميلليون ورىس تۇراتىنىن جانە نەمىستەردىڭ بارشىلىق ەكەنىن ايتا كەلە، نەمىستەردىڭ ولاردى تولىق قولدايتىنىنا سەنىمدىلىك ءبىلدىرىپ وتىر. ورىستاردىڭ شىن مانىندە رەسمي جاريالانعان ساننان كوپ دەپ ويلايتىنىن دا جاسىرمادى.