بىلتىرعى جىل پاۆلودار وبلىسىنداعى باس شىرشانىڭ باس شايقار باعاسى ءبىرازىمىزدى تاڭ قالدىرىپ ەدى. قىزىلجار باسشىلىعى قۇنى 38 ميلليون تەڭگە تۇراتىن شىرشانى قالانىڭ قاق تورىنە ورناتا سالعان. ال بيىل بارلىق وبلىس ورتالىقتارى «جاڭا جىل» دەگەندە اقشانى جاپىراقتاي شاشىپ جاتىر...
جاقىندا شىرايلى شىم قالانىڭ شىرشاعا دەگەن كوزقاراسى كۇرت وزگەردى. بىلتىر عانا قازاقستانداعى ەڭ ارزان شىرشامەن وسى ءوڭىر جاڭا جىلىن تويلاعان. اكىمدەرى بولسا ادەتتەگىدەي جاڭا جىلدىق دايىندىقتى 16-جەلتوقساننان كەيىن باستايمىز دەپ التى الاشتىڭ القاۋىنا بولەنگەن. دەگەنمەن وڭتۇستىك ءۇشىن بيىلعى جىل وزگە نوتادا باستالدى. كەيبىر دەرەككوزدەرى بويىنشا جاڭا جىل قارساڭىندا قۇنى 46 مىڭ اقش دوللارى تۇراتىن شىرشانى ءبىر ەمەس ءۇش جەرگە ورنالاستىرعان. مەگاپوليسكە اينالۋعا ىنتالى قالاعا بۇنداي قارجى تۇك تە ەمەس شىعار، ءبىراق الدىڭعى ۇندەۋلەر قايدا قالدى؟ وبلىستىڭ ءقادىرى قۇنى قىمبات شىرشامەن ولشەنە مە؟
ءبىر قىزىمنان ءبىر قىزىمدىكى سوراقى. بيىلعى جىل جەمقورلىقپەن اتى شىققان قاراعاندى ءوڭىرى جاڭا جىلدىق مەرەكەگە 200 ميلليون(199 ميلليون) تەڭگە قاراجات ءبولىپتى. قالا كوشەلەرىن كورىكتەندىرۋگە،شىرشا ورناتۋعا، جاڭا جىلدىق بەزەندىرۋ جۇمىستارىنا وسىنداي سوما شىقسا كەرەك. بۇل قاراجاتتىڭ قوماقتىلىعى سونداي شىمكەنتتىڭ شىرشالارى مەن پاۆلودار «ەلكالارىنىڭ» قوسىندىسىنان 4 ەسەگە كوپ. بيىلعى وقۋ جىلىنىڭ باسىندا قاراعاندى وبلىسىندا اۋىلدىق وكرۋگتەگى 8 مەكتەپ جابىلعان بولاتىن. باستى سەبەبىن باسشىلىق: «مۇعالىمدەردى تۇراقتى جالاقىمەن قامتاماسسىز ەتە المايمىز،»،-دەپتى. بالا سانىنىڭ ازدىعىنا بايلانىستى دەپ تە جورامالدايدى كەيبىرى. ارىز ايتا بارعان اتا-انا «اۋدان ورتالىعىنداعى ينتەرناتتا وقىتىڭدار» دەگەن قىسقا جاۋاپ ەستىپ قايتىپتى. جاڭا جىلعا 200 ميلليون بولگەن وبلىستا وقۋشى مەن وقىتۋشىنىڭ جاعدايى جاسالماۋ اقىلعا سىيمايدى. سوندا ەلباسىنىڭ جولداۋى جولدا قالعانى ما؟ ءبىزدىڭ بولاشاعىمىز ءبىلىمدى ۇرپاق دەمەدى مە؟ سوڭعى 3 جىلدا قاراعاندى قالاسىندا بالا باقشا اشىلدى دەگەندى ەشكىم ەستىمەپتى. ال كەزەكتە تۇرعان بۇلدىرشىندەر سانى - 13 000. اكىمشىلىك وكىلدەرى شىرشانىڭ شىعىنىن قالانىڭ 80 جىلدىق مەرەيتويىنىڭ قارساڭىندا ۇيىمداستىرىلىپ جاتقان شارالارمەن بايلانىستىرادى. 80 جىلدىقتى سەكەڭدەگەن «سنەگۋروچكاسىمەن» ەمەس، جابىلعان 8 مەكتەبىن قالپىنا كەلتىرۋ ارقىلى تويلاسا يگى ەدى.
ەسەپتەپ قاراساڭىز، بۇل قاراجات قاراعاندى ءۇشىن ناۋىرىز ايىندا سۋعا كومىلگەن كوكپەكتى اۋىلىن تۇگەلىمەن جاڭالاۋعا كەتكەن قارجىمەن پاراپار. وبلىستا قانشا مۇگەدەك بار؟ ۇيسىز-كۇيسىز جۇرگەن جاس وتباسىلار قانشاما؟ ەل الاڭداپ، ەلباسى سابىرعا شاقىرىپ وتىرعان «كريزيس» قالاي بولادى؟
بۇل ماسەلەلەر تاۋەلسىزدىك مەرەكەسىن جەتىم قىزدىڭ تويىنداي وتكىزگەن قاراعاندى باسشىلىعىنا «قىزىق ەمەس» بولسا كەرەك. الدە باۋىرجان ابدىشيەۆ، سەرىك احمەتوۆ سىندى قاراعاندىلىق "ازاماتتاردىڭ" قاتارىن كوبەيتپەك پە؟
ورىنباسار باقىتبەك
