دايش تەرروريستىك توبى تۇرعىندارعا قاتىستى قانداي قاتىگەز ارەكەتتەردى قولداناتىنى بەلگىسىز. سيريادا رەپورتاج جاساۋ وتە ءقاۋىپتى. سوندىقتان جۋرناليستەر دايش باسىپ العان جەرلەرگە كوپ بارا بەرمەيدى.  الايدا ءوز ءومىرىن قاتەرگە تىگىپ سيرياداعى جاعداي تۋرالى اقپاراتتى جۋرناليستەرگە جەتكىزىپ وتىرعان تۇرعىندار بار. بي-بي-سي كوررەسپوندەنتى سوڭعى ءۇش ايدا راككا تۇرعىنىمەن حابارلاسىپ تۇردى. ول كۇندەلىك جازادى. وندا دايش سودىرلارى باسىپ العان قالاداعى تۇرعىنداردىڭ جاعدايى باياندالادى.

بۇعان دەيىن كۋاگەر كۇندەلىگىنىڭ 1ء-شى، 2ء-شى ءبولىمىن جاريالادىق.

كۋاگەر كۇندەلىگى (3ء-شى ءبولىم):

ريەۆوليۋسيادان كەيىن ءۇمىت وتى قايتا جانعان ەدى. مەن شەتەلگە كەتىپ، بەيبىت ەلدە ءومىر سۇرەمىن دەپ ارماندادىم. ءبىراق بۇل ارمان ارمان كۇيىندە قالدى.

ءقازىر تاڭعى ۋاقىت. مەن بولمەمدە وتىرىپ بومبانىڭ جارىلعانىن، كورشى بالالاردىڭ جىلاعانىن ەستىپ جاتىرمىن. بۇل اينالادا بولىپ جاتقان اششى شىندىق. سوندىقتان مەن ارمانداۋدى قويىپ، ءتىرى قالۋدىڭ بارلىق امالدارىن جاساۋىم قاجەت ەكەنىن ءتۇسىندىم. 

اعام ەكەۋىمىز نە بولىپ جاتقانىن ءبىلۋ ءۇشىن دالاعا شىقتىق. كورشىمىز بالاسىن ىزدەپ ءجۇر ەكەن. وتكەن كەتكەن ادامداردان بالاسىن سۇرايدى. ول نان الۋعا شىققان ەكەن.

ادامداردىڭ ايتۋىنشا، بومبا ابدۋل مۇحاممەدتىڭ ۇيىنە تۇسكەن. بارلىعىمىز سول جاققا قاراي جۇگىرىپ باردىق. قاراساق ادامداردىڭ دەنە مۇشەلەرى ءار جەردە جاتتى. كوز جۇمعانداردىڭ ءبىرى جۇكتى ەدى. كورشىلەردىڭ ايتۋىنشا، ايەل بىرنەشە كۇننەن كەيىن بوسانۋ كەرەك ەدى.

ۇشاقتار ۇشىپ كەتكەننەن كەيىن، ءوزىم جۇمىس ىستەيتىن دۇكەنگە كەلدىم. باستىعىم كۇلىمسىرەپ شاي ءىشىپ وتىر ەكەن. ءبىراق وسى جولى تەمەكى شەكپەدى. سەبەبى ول ادەتتە شايدى تەمەكى شەگىپ وتىرىپ ىشەتىن. دايش سودىرلارى تەمەكى تارتۋعا تىيىم سالعان. ولار باستىعىمنان تەمەكىنىڭ ءيىسىن سەزىپ، كوپشىلىكتىڭ كوزىنشە ونى قورلاعان. ودان كەيىن قىلمىسكەر سەكىلدى ۇرىپ تاستاعان. ءبىز سويلەسىپ وتىرعاندا دۇكەنگە قاعاز ۇستاعان بىرنەشە ادام كىردى. ولار بىزگە قاعازدى بەردى دە ەشتەڭە ايتپاستان شىعىپ كەتتى. قاعازدا دايش-تىڭ دۇكەندەردە تەلەديدار قويۋعا تىيىم سالىنعانى جازىلعان ەكەن. تەلەديداردى الىپ تاستاۋعا ءبىر اپتا بەردى. سىرتقى الەمنەن قول ۇزگەنىمىز ازداي ونى كوگىلدىر ەكران ارقىلى دا قاراي المايتىن بولدىق.

ءبىراز ۋاقىتتان كەيىن دۇكەنگە دوسىم كەلدى. ونى دايش ادامدارى تۇتقىنداعاننان كەيىن بىرنەشە اي بويى كورمەگەن ەدىك. بۇل ونىڭ ءتورتىنشى رەت قاماۋعا الىنۋى ەدى. «بەكەم بول. ءبىز سەنى دايش سودىرلارى ءولتىرىپ تاستادى دەپ ويلادىق» دەدىم مەن.

انام تەلەفون شالىپ، ۇيگە كەلەردە ازىق-تۇلىك ساتىپ الۋ كەرەكتىگىن ايتتى. الايدا مەنىڭ اقشام از ەدى. جولدا تاماقتى نەلىكتەن  از ساتىپ العانىم تۋرالى ءتۇرلى سىلتاۋلاردى ويلاپ باردىم. ءبىراق انام مەنىڭ امان-ەسەن ۇيگە جەتكەنىمنىڭ وزىنە ريزا بولدى.