الماتىدا كوممۋنالدىق قىزمەتكە جاڭا تەحنيكالار ساتىپ الىندى. شاھار باسشىسى باۋىرجان بايبەك قىستا قالا كوشەلەرىن تازالايتىن ارنايى تەحنيكالاردى كوردى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساي وتىرىپ.

بۇگىن الماتى اكىمى باۋىرجان بايبەك قالا بيۋدجەتىنىڭ ەسەبىنەن كوممۋنالدىق قىزمەتكە الىنعان جاڭا ارنايى تەحنيكالارىن قاراپ شىقتى. بۇلار «كاماز» شاسسيىندەگى قۇرامالى 14 تازالاعىش ماشينالار، وتىمدىلىگى جوعارى «Unimog» ءۇش كوپفۋنكسيونالدى تازالاعىش كولىك، ەكى «Snowbooster» قار تازالايتىن ماشينالار، كونۆەيەر-ۆاكۋۋمدى «Dulevو» ماشيناسى، قار تازالايتىن «16 Pony» ماشيناسى، 20 مينيتراكتورلار مەن مينيتيەگىشتەر.

«قالادا جاياۋ جۇرگىنشىلەرگە جاعداي جاسالىپ جاتىر. دەمەك، قىستا تروتۋارلاردى تازالاۋعا ەرەكشە ءمان بەرىلەدى. قالانىڭ تاريحي ورتالىعىنىڭ ۇشتەن ءبىرىنىڭ جاڭارۋىنا وراي ارنايى تەحنيكالار - كوپفۋنكسيونالدى «Pony» ماشيناسى، ميني تيەگىشتەر، جەڭىل تراكتورلار الىندى. جۇمىسشىلار اقاۋ كەلتىرمەيتىن قۇرالداردى پايدالاناتىن بولادى»، — دەدى تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ باسشىسى اسەت ماسابايەۆ. 

اسەت ماسابايەۆتىڭ ايتۋىنشا، قالادا تازالاناتىن جولدىڭ جالپى كولەمى - 20 ملن شارشى مەتر. قىستا كوشە تازالاۋمەن 15 مەردىگەر ۇيىم، 1116 ارنايى تەحنيكا بىرلىگى اينالىسادى. جول تازالاۋمەن اينالىساتىن جۇمىسشىلار قاتارىن 1،2 دەن 2،7 مىڭ ادامعا كوبەيتۋ كوزدەلگەن.

«بۇلاردان وزگە قالا اۋداندارىندا وندىرىستىك بازالار قۇرىلعان، سونىڭ ارقاسىندا كوشە تازالاۋ جىلدامدىعى 1،5 ەسەگە ارتادى. جۇمىسشىلار شوعىرلاناتىن ورىندارعا ولاردىڭ كيىمدەرىن اۋىستىرۋعا، ىستىق شاي ءىشىپ، جىلىنۋىنا مۇمكىندىك بەرەتىن ءمودۋلدى كونتەينەرلەر قويىلادى»، — دەدى ول.