رەسەي پرەزيدەنتى ۆلاديمير پۋتين مەن اقش پرەزيدەنتى دونالد ترامپ ۆەتنامداعى ساميتتە كەزدەستى. بۇل تۋرالى گازەتا.رۋ جازادى. رەسەي دەلەگاسياسى ۆەتنامنىڭ دانانگ قالاسىنا كەلمەي تۇرىپ، اقش-تىڭ مەملەكەتتىك حاتشىسى رەكس تيللەرسون ەكى پرەزيدەنت اراسىنداعى كەلىسسوزدەر بولمايتىنىن ايتقان. سونىمەن بىرگە، امەريكالىق جاق بۇل كەلىسسوزدەر جۇرگىزىلەتىندەي تالقىلاناتىن ماسەلەلەردىڭ دە جوقتىعىن ايتتى. وسىدان كەيىن، رەسەيلىك دەلەگاسيا قاتتى تاڭىرقاپ قالعان كورىنەدى. سەبەبى، ترامپتىڭ ءوزى ءدال وسى كەزدەسۋدى قالاعان، ءتىپتى تالقىلاناتىن ماسەلەلەر تاقىرىپتارىن دا ۇسىنعان.
ەكى مەملەكەت باسشىلارىنىڭ كەزدەسۋى جۇما كۇنى تۇستەن كەيىن بولۋى كەرەك بولاتىن.
رەسەي پرەزيدەنتىنىڭ باسپا ءسوز حاتشىسى دميتريي پەسكوۆ «ازىرگە ەشتەڭە تۇسىنىكسىز. امەريكالىق ارىپتەستەرىمىزدەن قايشىلىقتى اقپارات كەلىپ جاتىر»-دەدى.
ال، الەۋمەتتىك جەلىدە بارلىعى ترامپتىڭ مۇنداي ارەكەتىن دورەكىلىك دەپ باعالاعان.
ءتىپتى ترامپ دانانگتە پۋتيننەن ادەيى قاشقاقتاپ جۇرگەندەي بولعان. سامميت بارىسىندا: «اقش ەندى ەرەجە بۇزۋشىلىق، ەكونوميكالىق اگرەسسيا، ۇرلىق سياقتى نارسەلەرگە كوز جۇما قارامايدى»-دەدى ترامپ. سودان كەيىن ءسامميتتى اياقسىز قالدىرىپ شىعىپ كەتكەن. پۋتينمەن كەزدەسۋگە دە، اسەان بلوگىنا كىرەتىن مەملەكەتتەرمەن كەزدەسۋگە دە كەلمەي قويعان. بۇعان ارينە، رەسەيلىك ديپلوماتتار قاتتى نالىپ قالعان.
الايدا، كەزدەسۋدىڭ سوڭعى مۇمكىندىگى جۇما كۇنى بولعان: ترامپ ءوز ورنىندا وتىرعان ءپۋتيننىڭ قاسىنا تۇك بولماعانداي كەلىپ، قولىن الىپ، ارقاسىن قاققان. ۆەتنامنىڭ ۇلتتىق كيىمدەرىن كيگەن ەكەۋى قول الىسىپ سۋرەتكە تۇسكەن.
فوتوسەسسيادان كەيىن، مەملەكەت ليدەرلەرى ءسامميتتىڭ سالتاناتتى كەشكى اسىنا اتتانعان. ارادا ءبىراز ۋاقىت وتكەن سوڭ، ترامپ سالتاناتتى كەشكى استان، پۋتينمەن سول كۇيى سويلەسپەستەن كەتىپ قالعان.
پىكىر قالدىرۋ