كەشە تارازدا جوعالعان بالانىڭ ولىمىنە قاتىستى دەرەكتەر بەلگىلى بولدى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساي وتىرىپ.

ەسكە سالا كەتسەك، 18 قاراشادا تاراز ماڭىنداعى ساحارنىي اۋىلىندا №6 مەكتەپتىڭ 4-سىنىپ وقۋشىسى نيكولاي نيكيتيۋكتىڭ جوعالعانى تۋرالى اقپارات تاراعان بولاتىن. ول دوستارىمەن بىرگە ستاديوننان شىققان، ءبىراق ۇيىنە بارماعان.

اتا-اناسى كەشكىسىن پوليسياعا جۇگىنىپ، بارلىق جەرگىلىكتى اقپارات ارنالارى مەن الەۋمەتتىك جەلىلەر ارقىلى حابارلاما تاراتقان. بالانى ىزدەۋگە تاراز قالاسى ءىىد جانە پب-2 جەكە قۇرامى تۇگەل جۇمىلدىرىلعان. جاۋعان قار ىزدەردى جاۋىپ، ىزدەستىرۋدى قيىنداتىپ جىبەردى. كەلەسى كۇنى پوليسەيلەر ستاديونعا جاقىن جەردەگى سالىنىپ جاتقان بالاباقشانىڭ ماڭىنداعى بۇتالاردىڭ اراسىنان بالانىڭ ءمايىتىن تاپتى.

بالانىڭ موينىندا بۋىندىرۋدىڭ بەلگىلەرى بولعان. تەرگەۋ بارىسىندا قازا تاپقان بالانىڭ دوسى، №6 ورتا مەكتەپتە وقيتىن 14 جاستاعى ن.ء-دى انىقتادى. ول پوليسەيلەرگە سول كۇنى نيكيتامەن بىرگە جەلىم يىسكەگەنىن ايتتى.

جامبىل وبلىستىق ءىىد جاسوسپىرىمدەر ىستەرى ءبولىمىنىڭ اقپاراتىنا سايكەس، تەرگەۋ بارىسىندا ن. ستاديونداعى نيكيتانى شاقىرىپ العانى، سوسىن ەكەۋى كەتكەنى انىقتالدى. كەيىن سالىنىپ جاتقان بالاباقشانىڭ اۋماعىنداعى ۆيدەوكامەرا ەكى بالانىڭ كىرگەنىن، ءبىراق ن. جالعىز شىققانىن كورسەتەدى.

«قاساقانا ادام ءولتىرۋ» بابى بويىنشا قىلمىستىق ءىس قوزعالدى. ن. ۇرلىققا قاتىسى بار بولعانى ءۇشىن بۇرىن وبلىستىق ءىىد جىب-دە ەسەپتە تۇرعان. بالا ءولىمىنىڭ سەبەپتەرىن انىقتاۋ ءۇشىن سوت-مەديسينالىق ساراپتاماسى بەلگىلەندى.

كۇدىكتى اتا-اناسىنىڭ كەپىلدىگىنە بايلانىستى جىبەرىلدى. №6 ورتا مەكتەپتە تۇزەۋ سىنىپتارى بار ەكەنى بەلگىلى. سونداي سىنىپتاردىڭ بىرىندە «پسيحيكالىق دامۋ بوگەلىسى» بار ن. دا وقىعان.