وتكەن اپتانىڭ سوڭىندا قىرعىز ءمۇفتياتىنىڭ رەسمي ۆەب-سايتى قاراۋ ويلى حاكەرلەردىڭ شابۋىلىنا ۇشىرادى. بۇل جايىندا قىرعىز ءدىن ىستەرى باسقارماسىنىڭ باسپا ءسوز حاتشىسى اسان سايلوۆ مالىمدەدى.

قورقاۋ حاكەرلەر ۆەب-سايتتىڭ باستى بەتىنە قارۋ كەزەنگەن قىزدىڭ سۋرەتىن ورنالاستىرىپ، وندا اعىلشىن تىلىندە: «Free Syrian. Free Palestina. Nothing is impossible» («ازات سيريا، ازات پالەستينا. مۇمكىن ەمەس نارسە جوق!») جازۋىن قالدىرعان.

بۇگىندە اتالمىش جايتتى تەكسەرىپ، قايتا قالپىنا كەلتىرۋ جۇمىستارى جۇرگىزىلۋدە. ال بۇل بۇزاقىلىق ارەكەتتىڭ استارىندا مەملەكەتتىڭ ۇستانىمىنا تەرىس كوزقاراستاعى، ەلدەگى ءدىني باعىتتى بۇرا تارتقىسى كەلەتىن توپتىڭ تۇرۋى ابدەن مۇمكىن دەگەن دە پىكىرلەر جوق ەمەس.

قازىرگى ۋاقىتتا ماماندار ءدىني باسقارمانىڭ ينتەرنەت-رەسۋرسىنا كىمدەردىڭ قانداي ماقساتپەن بۇزىپ كىرگەنىن انىقتاۋ ۇستىندە. ءىستىڭ ناتيجەسىنە قاراي پروكۋراتۋرا مەن ارنايى قىزمەت ورىندارىنا ارىز جىبەرىلەتىن بولادى.

"ۇممەت.كز"