«ميسس قازاقستان-2013» بايقاۋىنىڭ جەڭىمپازى ايداي يسايەۆا قازاقستاننىڭ نامىسىن «الەم ارۋى-2014» سۇلۋلىق بايقاۋىندا قورعايدى. «الەم ارۋى-2014» بايقاۋى 25 قاڭتاردا اقش-تىڭ مايامي قالاسىندا وتەدى. بايقاۋ بيىل 63-رەت ءداستۇرلى تۇردە وتكەلى جاتىر جانە الەمنىڭ 125 ەلىنىڭ سۇلۋى بايقاۋدا ب ا ق سىناماق. ءقازىر سۇلۋ بويجەتكەن مايامي قالاسىندا بايقاۋعا قىزۋ دايىندىق ۇستىندە. ايداي كۇندەلىكتى الەۋمەتتىك جەلىلەردە ءوزىنىڭ دايىندىق كەزىندەگى سۋرەتتەرىن جاريالاپ وتىر. دايىندىق وتە قارقىندى ءجۇرىپ جاتقان كورىنەدى.

ايداي يسايەۆا شىمكەنت قالاسىنىڭ تۋماسى جانە اسفەندياروۆ اتىنداعى قازاق ۇلتتىق مەديسينا ۋنيۆەرسيتەتىنىڭ تۇلەگى. قازىرگى تاڭدا ول الماتى قالالىق №1 ەمحانادا وتباسىلىق دارىگەر بولىپ قىزمەت ەتەدى. بايقاۋعا بايلانىستى ەمحانا باسشىلىعى بويجەتكەندى جۇمىستان بوساتىپ، 3 ايعا اقىسىز دەمالىسقا شىعارعان. بايقاۋعا دەيىنگى 3 ايدا ايداي ۋاقىتىن فيتنەس زالدارعا، تەلەارنالارعا سۇحبات بەرۋگە، اعىلشىن ءتىلىن ۇيرەنۋگە ارنادى جانە بايقاۋعا قىزۋ دايىندالدى. سونداي-اق، «الەم ارۋى» بايقاۋىندا كيەتىن كويلەكتەرىن سۇلۋعا وتاندىق ديزاينەرلەر ايدا كاۋمەنوۆا جانە نايل بايكۋچۋكوۆ ارنايى تىكتى.

سۇلۋ بويجەتكەن وسىعان دەيىن «شىمكەنت ارۋى»، «ۋنيۆەرسيتەت ارۋى»، «مەگا ارۋى»، «الماتى ارۋى»، «قازاقستان ارۋى» سىندى سۇلۋلىق بايقاۋلارىنا 17 جاسىنان باستاپ قاتىسىپ، باعىن سىناعان. «الەم ارۋى» ايدايدىڭ قاتىسىپ جاتقان ون ءبىرىنشى بايقاۋى. ەندى ارۋىمىز «الەم ارۋى» بايقاۋىنىڭ ۇزدىك وندىعىنا كىرۋدى كوزدەپ وتىر.

«ارينە، جەڭىس مەندە بولادى دەپ ارتىق ايتقىم كەلمەيدى. ءبىراق، ەلىمە بارىمدى سالۋعا  ۋادە بەرەمىن. وزىمە ارتىلعان ءۇمىتتى اقتاۋعا بارىنشا تىرىسامىن. نەگىزگى ماقساتىم – ۇزدىك وندىقتىڭ قاتارىنان كورىنۋ»،-دەپ ارۋىمىز ءبىر سۇحباتىندا حابارلاعان بولاتىن.

عالامشاردىڭ ەڭ سۇلۋ قىزى 25 قاڭتاردا اقتىق سىندا بەلگىلى بولادى. كونكۋرس بارىسى 200 ەلدە تىكەلەي ەفيردە كورسەتىلەدى. جەڭىمپازعا ءتاجدى «ۆەنەسۋەلا ارۋى» اتانعان گابريەلا يسلەر كيگىزەدى.

وسىعان دەيىن قازاقستاننىڭ نامىسىن قورعاۋعا بارعان سۇلۋلارىمىزعا جەڭىس بۇيىرمادى. وسى ورايدا ايداي يسايەۆاعا ساتتىلىك تىلەيمىز جانە ارۋىمىز جەڭىس تۇعىرىنان كورىنەر دەگەن سەنىمدەمىز.

"بايستارس"