رەسپۋبليكالىق اكادەميالىق نەمىس تەاترى، «Astana Musical» تەاترى، «استانا سازى» ەتنو-فولكلورلىق ءانسامبلى ۆەنالىق MuTh-دە ونەر كورسەتتى دەپ حابارلايدى Qamshy.kz اقپارات اگەنتتىگى. 

شىعارماشىلىق ۇجىم ءوزىنىڭ مادەني مىندەتىن ۇلكەن جەتىستىكپەن اتقارىپ، قازاقستاننىڭ ۇلتتىق ونەرىنىڭ ۇزدىك ۇلگىلەرىن الەمگە تانىتتى. «رۋحاني جاڭعىرۋ» باعدارلاماسىنىڭ اياسىندا قازاقستان رەسپۋبليكاسىنىڭ مادەنيەت جانە سپورت مينيسترلىگى ۇيىمداستىرعان «ۇلى دالا تەاترى» گاسترولدىك ساپارمەن پاريج، بەرلين، بەلگيا، ۆەنا جانە ماسكەۋگە باردى. تەاتر ۇجىمى گاسترولدىك ساپار بارىسىندا ەۋروپانىڭ ءار قالاسىنىڭ ساحناسىندا تەاتر تانۋشىلار، سىنشىلار، ەلشىلىك وكىلدەرىنىڭ قاتىسۋىمەن كورەرمەندەرگە ونەرلەرىن پاش ەتتى.

قازاقستاننىڭ شىعارماشىلىق ۇجىمى قازاق جانە الەم جاۋھارلارى بولىپ سانالاتىن ۇزدىك مۋزىكالىق شىعارمالاردى تانىتتى. بۇل «استانا سازى» ەتنو-فولكلورلىق ءانسامبلىنىڭ سۇيەمەلدەۋىمەن «Astana Musical» تەاترىنىڭ «قىز جىبەك» قويىلىمى، نەمىس تەاترىنىڭ قويىلىمىنداعى «قاراگوز» تۋىندىسى.

«رۋحاني جاڭعىرۋ» باعدارلاماسى اياسىنداعى يميدجدىك جوبا ءبىز ءۇشىن وتە ماڭىزدى. ءبىزدىڭ تەاترعا قازاقستاندا حالىقارالىق دەڭگەيدەگى تەاتر ۇجىمدارى، ۇلتتىق درااتۋرگيا بار ەكەندىگىن كورسەتۋ مۇمكىندىگى بەرىلىپ وتىر. ءبىزدى جىلى قابىلداپ، ونەرىمىزگە جوعارى باعا بەرگەن ەۋروپا كورەرمەنى ەرەكشە قۋانتادى»، - دەپ اتاپ ءوتتى نەمىس تەاترىنىڭ جەتەكشىسى ناتاليا دۋبس.

سۇلۋ قاراگوزدىڭ دارىندى سىرىم اقىنعا ماحابباتى تۋرالى اڭىز ناتاليا دۋبس سياقتى تالانتتى رەجيسسەردىڭ قويلىمى ارقىلى جاڭا تارتىمدى سيپاتقا يە بولدى. ول بۇۇ-نىڭ التى تىلدەرىنىڭ ءبىرى نەمىس تىلىندە العاش رەت جارىققا شىقتى. بىرەگەي تۋىندىنىڭ كوركەمدىگى مەن تەرەڭدىگىن تانىمال بەرلين حورەوگرافى فلوريانا بيلباونىڭ دايىنداعان ءبيى جانداندىرا تۇسەدى. سپەكتاكلگە ءان جازعان گەرمانيا كومپوزيتورى Iayrope. سىنشىلاردىڭ پىكىرى بويىنشا «قاراگوزدىڭ» جاڭا قويىلىمى كلاسسيكا جانرىن سۇيەتىن كورەرمەن مەن جالپى ونەردى باعالايتىن جۇرتشىلىققا ەرەكشە اسەر ەتتى.

«قازاق دراماتۋرگياسىنىڭ جارقىن تۋىندىلارىنىڭ ءبىرى ەموسيالىق ساتتەرگە تولى. ەسكى سالت-داستۇرگە بوي ۇسىنعان ءبىر-بىرىن سۇيەتىن ەكى عاشىق بولەك ءومىر سۇرۋدە. قازاقستاندىق ساحنا ءۇشىن جانر ءتۇرى ەرەكشە. قازاقستاندا تەك ورىس، قازاق ەمەس، نەمىس جانە باسقا دا تىلدەردە سپەكتاكل كورۋ مۇمكىندىگى بار ەكەندىگى قۋانتادى»، - دەپ اتاپ ءوتتى كورەرمەن، تانىمال ينستابلوگگەر انەل نويباۋەر.

جاس قازاق تەاترى ۆەنا تۇرعىندارىنا دالا تەاتر ەلەمەنتتەرى بار ەتنو-فولكلورلىق ميۋزيكل «قىز جىبەك» قويىلىمىن سىيلادى. «قىز جىبەك» – قازاق فولكلورىنىڭ ءىنجۋ-مارجانى. سۇيىسپەنشىلىكتىڭ ءانۇرانى بولىپ تابىلاتىن تۋىندى – حالىقتىڭ پوەزيالىق مۇراسىنىڭ بارلىق سالتاناتتى ۇلىلىعىن سىڭىرگەن.

ەل بىرلىگى مەن تۇتاستىعى يدەياسى قاتار ءورىلىپ، حالىقتىڭ وي-ارمانى مەن اڭسارى تانىلاتىن، بوياۋى جارقىن قويىلىمدا ۇلتتىڭ ءومىرى مەن تىعىز بايلانىستى داستۇرلەر دە  - باتا ءسوز، قارعىس، جوقتاۋ، زار، كوڭىل ايتۋ، قوشتاسۋ جانە ت.ب. – جاقسى كورىنىس تاپقان.

كورەرمەندەردىڭ ايتۋى بويىنشا، قويىلىمنىڭ ۇلتتىق نازىك حوش ءيىسى بىردەن سەزىلەدى، قازاق مادەنيەتىن ايرىقشا ەرەكشەلىكتەرىمەن ايشىقتايدى.

Muth ۆەنالىق تەاترىنىڭ ديرەكتورى وتتو دجانكوۆيچ «قىز جىبەك» سپەكتاكلى قازاقستاندىق جاس تەاتردىڭ ءسوزسىز جەتىستىگى ەكەندىگىن اتاپ ءوتتى. وعان ادام تولى زال، كورەرمەندەردىڭ شىنايى ىستىق ىقىلاسى تولىق دالەل. «سپەكتاكل قازاق تىلىندە بولدى. الايدا اۋدارما كەرەك بولمادى، ويتكەنى مەن جۇرەگىممەن ءتۇسىندىم. ارتىستەر مەن كوماندانىڭ كاسىبيلىگىنە ءتانتى بولدىم»، - دەپ ويىن قورىتىندىلادى ول.

عاسىرلار قويناۋىنان سىر شەرتەتىن «قىز جىبەك» قازاقتىڭ ليرو-ەپوستىق جىرىنىڭ جاۋھارى. تراگەديا كەيىپكەرلەرى جىبەك پەن تولەگەن الەمگە ايگىلى رومەو مەن دجۋلەتتاداي قازاق حالقى ءۇشىن ماحابباتتىڭ سيمۆولى ىسپەتتەس. وقيعالار نەگىزىنەن جاس باتىر تولەگەن، قىز جىبەك جانە ەل اراسىندا ەرجۇرەكتىگىمەن، كۇش-قايراتىمەن اتى شىققان باتىر بەكەجان اراسىنداعى قارىم-قاتىناستار توڭىرەگىندە ءوربيدى دە، اقىرى تولەگەن قىزعانىشتىڭ قۇربانى بولادى.

«قازاقستان رەسپۋبليكاسىنىڭ مادەنيەت جانە سپورت مينيسترلىگى جۇزەگە اسىرىپ وتىرعان «جاھاندىق الەمدەگى زاماناۋي قازاقستاندىق مادەنيەت» جوباسى قازاقستاندىق شىعارماشىلىق جوبالار مەن قازاقستاندىق ۇجىمداردىڭ جاڭا يدەيالارىنا تىڭ سەرپىن بەرەدى دەپ ويلايمىن. بۇل ءوز مۇمكىندىكتەرىمىزدى جوعارى دەڭگەيگە كوتەرۋ جانە الەمگە ۇلتتىق مادەنيەتتىڭ جەتىستىكتەرىن كورسەتۋ ءۇشىن تاماشا مۇمكىندىك»، – دەيدى «Astana Musical» تەاترىنىڭ كوركەمدىك جەتەكشىسى اسحات ماەميروۆ.

«العاشقى كورىنىستەن باستاپ-اق مەنى ۇلكەن قۋانىش كەرنەدى. قازاقستانداعى ءومىرىمدى، تەاترداعى جۇمىسىم ەسىمە ءتۇستى. «كوزىمنىڭ قاراسىن» سپەكتاكل سوڭىندا ارتىستەرمەن بىرگە ايتتىم. كەرەمەت قۇرام، تاماشا ويىن. ەكى جىل ىشىندە جاستاردىڭ ءبىر-بىرىن تانىپ، بىرگە جۇمىس ىستەپ كەتكەندىگىنە تامساندىم. «استانا ميۋزيكل» تەاترىنا كەرەمەت تۋىندىنى وسىنداي دەڭگەيدە ويناپ ۇسىنعاندارىڭا العىسىم شەكسىز» - دەيدى ۆەنا قالاسى سيمفونيالىق وركەسترىنىڭ مۋزىكانتى  ماريا ورينينسكايا.

«قىز جىبەك» كەيىپكەرلەرى ارقىلى ءبىز ەۋروپادا تانىلعان رومەو مەن دجۋلەتتانى كورەمىز. جىبەكتىڭ بەينەسى حالىقتىڭ جۇرەگىندە ساقتالعان سۇلۋلىق، ماحاببات پەن ادالدىقتىڭ جارقىن بەينەسى. «قىز جىبەك» اڭىزى زاماناۋي قازاق قوعامىنىڭ ورتاق مۇراسى بولىپ تابىلاتىن عاسىرلىق رۋحاني جانە ادامگەرشىلىك قۇندىلىقتاردى بەينەلەيدى.