دەنساۋلىق ساقتاۋ جانە الەۋمەتتىك دامۋ مينيسترلىگى “قازاقستانعا تاۋەلسىزدىك العان 1991 جىلدان بەرى شەتەلدەن 950 مىڭنان استام ەتنيكالىق قازاق ورالدى” دەپ حابارلاپتى. بۇل كورسەتكىش ولارعا كوپ بولىپ كورىنگەنمەن، شەتەلدە 5 ميلليون قانداسىمىز تۇراتىنىن ەسكەرسەك بۇل مالىمەت كوڭىل كونشىتپەيدى. ءبىز ەگەر بۇل قارقىنمەن جۇرسەك ەندى ءجۇز جىلدا قانداستارىمىز قازاق مەملەكەتىنىڭ ازاماتى بولىپ ۇلگەرمەيتىن سياقتى.

شەتتەگى قازاقتار تۇرىپ جاتقان ەلدەردە جىلدان جىلعا از ساندى ۇلتتاردىڭ جويىلۋ ءقاۋپى ءتونىپ،  تىلىنەن ايىرىلىپ جاتقان بۇگىنگى تاڭدا ولاردى ەلگە تەزىرەك اكەلۋ - ەڭ ءبىرىنشى بار قازاقتىڭ ورتاق وتانى قازاقستاننىڭ شارۋاسى. ەگەر بۇل جۇمىس جۇيەلى جۇرسە ەگەمەندىگىمىزدىڭ ماڭگىلىك بولۋى، ماڭگىلىك ەل ستراتەگيامىزدىڭ جۇزەگە اسۋى تەزدەي تۇسەر ەدى. سونداي-اق،  قازاق ۇلتىنىڭ ساندىق جانە ساپالىق جاعىنان وسۋىنە دە تىكەلەي اسەرى بولارى ءسوزسىز. شىنداپ كەلگەندە، قۇرىلىپ جاتقان ەكونوميكالىق وداعىمىز ساياسي وداققا اينالىپ كەتپەس ءۇشىن، سولتۇستىك وڭىردەرلەرگە كورشىمىز سۇقتانباۋى ءۇشىن ەڭ الدىمەن وسى ەلدىڭ يەسى قازاق  مىقتى بولۋى كەرەك.

الايدا 2013 جىلى كوشىپ كەلگەن قانداستارىمىزعا ازاماتتىقتى 4 جىلدان كەيىن بەرەتىن زاڭ قابىلداپ، "قازاق كوشىنە" ۇزىن ارقان، كەڭ تۇساۋ سالىنعان. كەيىن 2014 جىلى ۇكىمەت ءقامقوڭىل قازاققا ءۇمىت ۇشقىنىن سىيلاعانداي بولدى. ناقتىراق ايتساق، وتكەن جىلى ءساۋىر ايىنىڭ 22 كۇنى ق ر پرەزيدەنتi جانىنداعى وكق  بريفينگi بارىسىندا ەڭبەك  جانە  حالىقتى  الەۋمەتتىك قورعاۋ ءمينيسترى تامارا دۇيسەنوۆا “ەندىگى جەردە ورالمان اعايىندار ءبىر جىل ىشىندە قازاقستان ازاماتتىعىن الۋىنا بولادى” دەپ   ءمالiمدەگەن بولاتىن. ودان ىلە-شالا 6 مامىردا دۇنيەجۇزى قازاقتارىنىڭ قاۋىمداستىعىندا وتكەن «كوشى-قوننىڭ بۇگىنگى جاعدايى» اتتى  دوڭگەلەك ۇستەلدە ەڭبەك جانە حالىقتى الەۋمەتتىك قورعاۋ مينيسترلىگىنىڭ كوشى-قون كوميتەتى ءتوراعاسىنىڭ ورىنباسارى اسىلان قارجاۋبايەۆ ورالماندارعا ءبىر جىل ىشىندە ازاماتتىق بەرەتىن جاڭا زاڭ جوباسىن دايىنداپ جاتقاندارىن ايتا كەلىپ كۇزدە پارلامەنتكە ۇسىنىپ جىل اياعىنا دەيىن جاڭا زاڭ قابىلداناتىنىن ايتقان. بۇل سوزدەرىن جاز بويى بىرنەشە رەت قايتالاعان قارجاۋبايەۆ مىرزا 28 قازان كۇنى تاعى ق ر پرەزيدەنتى جانىنداعى وكق-نىڭ بريفينگىندە شەتەلدەن كەلگەن قانداستار 6 اي ىشىندە ازاماتتىق الۋعا بولادى دەپ ءسۇيىنشى سۇراعان. قاراپايىم قازاق - ءبىز دە قالىسپاي بۇل كىسى ايتقان سايىن سايتتاردا، الەۋمەنتتىك جەلىلەردە قانداستاردان ءسۇيىنشىمىزدى سۇراي بەرگەنبىز.

مىنە، وزدەرىڭىز كورىپ وتىرسىزدار. شەتىمىزدەن وتىرىكشى اتاندىق. تامارا حانىم مەن قارجاۋبايەۆ مىرزا كىمگە سەنگەنىن بىلمەيمىز، ءبىز ولارعا سەنىپ ءبىراز قازاقتى "دۇرلىكتىردىك". ەندى وتانىنا قاراپ جاۋتاڭداپ وتىرعان الىستاعى اعايىنعا ايتار ءۋاج، قارايتىن بەت جوق.

ءبىر ادامدى ەمەس، ءبىر قاۋىم قازاقتى الداۋ - ۇيرەنگەن ۇكىمتكە بولماسا، بىزگە قيىنداۋ ءتيىپ جاتىر.

تايسالما، تامارا، قۇتقار، قارجاۋبايەۆ!!!

تۇردىبەك قۇرمەتحان