الماتىدا نازەركە ءارىپتى ءولتىردى دەگەن كۇدىكپەن ۇستالعان تالعار اۋدانىنىڭ 33 جاستاعى تۇرعىنى يسقاقوۆ قۇرباننىڭ سوتى باستالدى، دەپ Qamshy.kz اقپارات اگەنتتىگى قازاقپاراتقا سۇيەنە وتىرىپ جازادى. 

ءىستى قىلمىستىق ىستەر بويىنشا اۋدانارالىق مامانداندىرىلعان سوتى قاراپ جاتىر. سوت جابىق رەجىمدە وتۋدە. قايتىس بولعان نازەركە ءارىپتىڭ اناسى ساۋلە ساربايەۆا قازاقپارات تىلشىسىنە بەرگەن سۇحباتىندا قىلمىسكەرگە ەڭ قاتال جازا تاعايىنداۋ ءۇشىن بارىن سالاتىنىن ايتتى. «مەن ول ادامنىڭ ءومىر بويى تۇرمەدە وتىرعانىن قالايمىن.

سەبەبى، بۇرىن دا ازاماتتىق نەكەدەگى ايەلىن 18 جەرىنەن پىشاقتاپ ولتىرگەن، بىرنەشە رەت زورلىق جاساعان. سول ءۇشىن 11 جىلعا كەسىلىپ، ونىڭ 9 جىلىن وتىرىپ شىققان. سوندا وسىنداي قانىشەر ادامدى قالايشا بوساتۋعا بولادى؟ مەن ونى ءومىر بويى تۇرمەدە وتىرۋىنا قول جەتكىزۋگە تىرىسامىن. ول تاعى 10 جىلدا شىعاتىن بولسا، وندا باسقا قىزداردىڭ وبالىنا قالادى»، - دەدى مارقۇم نازەركەنىڭ اناسى، جاپا شەگۋشى ساۋلە ساربايەۆا. ونىڭ ايتۋىنشا، ىسقاقوۆ نازەركەنى ولتىرگەنىن مويىنداپ وتىر.

ءقازىر سوتتالۋشىنىڭ قورعاۋشىسى زورلاۋ فاكتىسىنىڭ بولماعانىن دالەلدەۋگە تىرىسىپ جاتىر. «سوتتا دا زورلادى دەگەن ايىپتى تاقپاڭىز دەيدى. جاي عانا ءولتىردىم دەپ موينىنا الدى. قىلمىسكەر ودان قورقىپ تۇرعان جوق. ول زورلىق كورسەتكەنىن موينىنا العىسى كەلمەي تۇر. ءبىراق وعان دالەل جەتەرلىك، قىزىمنىڭ ءىش كيىمى بولماعان، ادام ولتىرۋگە زورلىقتان باسقا موتيۆ بولماعان. قىزىم مەنىڭ باي ەمەس، ونىڭ قالتاسىندا ۋىس-ۋىس اقشا جوق. تەك تازا پاك قىز بولعاندىقتان، ارتىن جاسىرۋ ءۇشىن ءولتىرىپ تاستادى»، - دەدى ول.

سوتتالۋشىنىڭ اناسى نازەركەنىڭ اتا-اناسىنا بارىپ بالاسىنىڭ ەسى دۇرىس ەمەستىگىن العا تارتىپ اقتاپ الۋعا تىرىسقان. الايدا، سوت ساراپتامالارىنىڭ ناتيجەسىندە كۇدىكتىنىڭ اقىل-ەسى دۇرىس ەكەنى دالەلدەندى. الماتى قالاسى مەن تالعار اراسىندا كولىگىمەن جولاۋشى تاسۋمەن اينالىساتىن كۇدىكتى ءوز كىناسىن  مويىنداعان. ءىس ماتەريالدارىنا سايكەس، كۇدىكتى نازەركەنى سول كۇنى قالاعا جەتكىزىپ سالماق بولعان. جارتى جولدا بويجەتكەندى زورلاپ، بۋىندىرىپ ءولتىرىپ كەڭساي زيراتى جاققا اپارىپ تاستاعان. ايتا كەتۋ كەرەك، 10 شىلدە كۇنى 18 جاستاعى نازەركە ءارىپ تۇزدىباستاۋ اۋىلىنداعى ۇيىنەن شىعىپ سول بەتتە ورالماعان. كەيىن 6 قىركۇيەكتە نازەركەگە ۇقسايتىن قىزدىڭ دەنەسى كەڭساي زيراتىنان تابىلدى.