«تانشولپان» - «Qazaqstan» ۇلتتىق ارناسىنىڭ ەڭ ۇزاق مەرزىمدى جوباسى جانە قازاق تەليەۆيزياسى تاريحىنداعى العاشقى تاڭەرتەڭگىلىك باعدارلاما. بىرەگەي تەلەونىمنىڭ نەگىزىن قالاۋشى قازاقستاننىڭ حالىق جازۋشىسى - شەرحان مۇرتازا 1992 جىلى 14 جەلتوقسان كۇنى العاش رەت بۇل تۋىندىنى ەفيرگە شىعاردى. جۇرگىزۋشى تىزگىنىن تەليەۆيزيا سالاسىنىڭ شەبەرلەرى يمانباي جۇباي مەن لاۋرا ءجۇسىپجانوۆا ۇستادى. تاۋەلسىزدىك العان جاس مەملەكەتتىڭ قاتارداعى تۇرعىنى ءۇشىن ءدال سول قاراپايىم دۇيسەنبىنىڭ ارايلى تاڭى ەستەن كەتپەگەنى ءسوزسىز. كورەرمەندەر نازارىنا «اراي»، «جاڭا كۇن»، «ءتاڭسارى»، «ويان، قازاق»، «كوڭىلاشار»، «قايىرلى تاڭ، قازاقستان!»، «اسسالاۋماعالەيكۋم، اعايىن!» اتاۋلارىمەن دە تانىمال بولعان، ال 2010 جىلى جوبا قايتادان «تاڭشولپان» دەگەن العاشقى اتاۋىنا يە بولدى.
ءار جىلدارى اۆتورلىق قۇرام وزگەرگەنىمەن، شەرحان مۇرتازانىڭ مەجەلەگەن بەلەستەرى تەك شارىقتاي ءتۇستى. قازاقستاندىقتاردىڭ تاڭى ءتۇرلى-تۇستى بوياۋلارعا تولىپ، باعدارلامانىڭ رەيتينگى كۇننەن-كۇنگە ارتىپ كەلەدى. 25 جىل بويى «تاڭشولپان» سۇيىكتى كورەرمەندەرىنە كوتەرىڭكى كوڭىل-كۇي سىيلاپ كەلەدى.
اسەرلى اڭگىمە، اۋەزدى ءان، قىزىقتى دەرەك، تانىمدىق سيۋجەت، الەمدىك اقپارات، جاعىمدى جاڭالىق – مۇنىڭ ءبارى «تاڭشولپاندا».اقپاراتتىق-سازدى باعدارلاما تىكەلەي ەفيردە دۇيسەنبى-جۇما كۇندەرى ساعات 7.00-دەن 10.00-عا دەيىن جانە جەكسەنبى كۇنى 8.15-تەن 11.15-تە سان الۋان تاقىرىپتى قامتىپ، ۇلانعايىر قازاق دالاسىنىڭ تۇكپىر-تۇكپىرىنە ءان مەن جىردان شاشۋ شاشادى. العاشقى ەفيرلەر تىزگىنىن لياززات تانىسباي، گۇلميرا دايرابايەۆا، حاديشا جامەكوۆا، لاۋرا ءجۇسىپجانوۆا، ارحات سادىقوۆ، رۋگينا لودجۋ، جاسقىلىق شۇيتەنوۆ باسقارعان. قازىرگى كەزدە تىكەلەي ەفيردە ءوز ءىسىنىڭ شەبەرلەرى جانسەرىك بەرىكقازى ۇلى، يرينا تەن، نازەركە نۇرتاس، دانيار ەسەن، گۇلنۇر ورازىمبەتوۆا جانە بايان باقكەلدى ءۇش ساعات بويى كورەرمەندەر ءۇشىن جۇمىس ىستەيدى.
«تاڭشولپان» تەلەجوباسى جان-جاقتىلىعىمەن ەرەكشەلەنەدى. ماسەلەن، الەۋمەتتىك جاعىنان از قامتىلعان جانداردى قۋانىشقا بولەۋ ماقساتىندا «مەيىرىم» رۋبريكاسى جارىققا شىعادى. ەلىمىزدەگى جانە شەت مەملەكەتتەردەگى وزگە ۇلت وكىلدەرىنىڭ ءداستۇرىن دارىپتەيتىن «وزگە ۇلت»، ءۇي ديزاينى مەن باسپانانى ساندەۋگە كەڭەس بەرەر «Interior»، قارجى جانە زاڭ سالالارى جايلى تاپتىرماس جوبا «كەڭەس»، وتكەن جىلدارعا شولۋ جاسايتىن «Retro» جانە باسقا دا قىزىقتى رۋبريكالارمەن كورەرمەن كوڭىلىنەن شىعىپ كەلەدى.
بۇگىن «تاڭشولپان» جوباسىنىڭ جيىرما بەس جىلدىعىنا وراي، اعا بۋىننان يمانباي جۇباي مەن ءلاززات تانىسباي جانە جانسەرىك بەرىكقازى ۇلى مەن يرينا تەن بىرلەسىپ تىكەلەي ەفيرگە شىقتى.
