اقتوبەدە «جىر ارقاۋى - جاڭعىرۋ» اتتى رەسپۋبليكالىق اقىندار ايتىسى ءوتتى. تاۋەلسىزدىك كۇنىنە ارنالعان ايتىستا «التىن دومبىرا» يەسى انىقتالدى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساي وتىرىپ.

بۇگىن اقتوبەدە رەسپۋبليكالىق اقىندار ايتىسى ءوتتى. بارلىعى 5 جۇپ التى ساعات بويى اقتوبەلىكتەردى جىرعا بولەپ، ەل ىشىندەگى وزەكتى ماسەلەردى قوزعادى. اقىندار ءتىل، ۇلتتىق رۋح پەن ەل بولاشاعى تۋرالى جىرلادى. قىز بەن جىگىت ايتىسىندا ادەمى ءازىل ايتىلدى.

اقتىق سىنعا سارا توقتامىس پەن جانداربەك بۇلعاقوۆ، جارقىنبەك ناۋشابەك پەن سىرىم اۋەسحان، اينۇر تۇرسىنبايەۆا مەن اسەت دۇيسەبايەۆ شىقتى. «ايتىس - قازاق حالقىنا عانا ءتان ۇلى ونەر. جىگىتتى تالانتىنا ساي تۇستەگەن اقىندار ايتىسى وتە تارتىستى ءوتتى. ەشكىم ەشكىمنەن كەم ەمەس»،- دەدى قازاقستاننىڭ حالىق اقىنى، قازىلار القاسىنىڭ ءتوراعاسى قونىسباي ءابىل.

كەيىن جۇلدەگەرلەر انىقتالدى. قازىلار القاسىنىڭ شەشىمىمەن دانيار الدابەرگەنوۆ، قۋانىش شارمانوۆ، مۋرادىم ەرلانوۆ جانە ساعادات نۇرمانوۆقا العىس حات پەن 350 مىڭ تەڭگە اقشالاي سىيلىقپەن ماراپاتتالدى. ءىىى ورىن اينۇر تۇرسىنبايەۆا، سارا توقتامىس جانە اسەت دۇيسەبايەۆقا بۇيىردى. ولار 750 مىڭ تەڭگە كولەمىندەگى سىيلىققا يە بولدى. ەكىنشى ورىندى جارقىنبەك ناۋشابەكوۆ الدى. وعان 1 ميلليون تەڭگە قارجىلاي سىيلىق بەرىلدى. ءبىرىنشى ورىن العان سىرىم اۋەسحانعا 2 ملن تەڭگەلىك سىيلىق تابىستالدى. ال باس جۇلدەگە تىگىلگەن 3 ميلليون تەڭگە مەن «التىن دومبىرانى» جانداربەك بۇلعاقوۆ جەڭىپ الدى.

«اقتوبەلىكتەر التى ساعات بويى ايتىس تىڭداپ، تاپجىلماي قۇرمەت كورسەتتى. اقىندارىمىز ونەرلەرىن اياپ قالعان جوق. ايبىنىمىزدى اسىردى، رۋحىمىزدى تاسىتتى. ءبارىمىز شابىتتانىپ وتىرمىز»،- دەدى مادەنيەت جانە سپورت مينيسترلىگى تىلدەردى دامىتۋ جانە قوعامدىق ساياسي جۇمىس كوميتەتىنىڭ ءتوراعاسى قۋات بوراش.