ق ر مادەنيەت جانە سپورت مينيسترلىگىنىڭ قولداۋىمەن «قازاقكونسەرت» مەملەكەتتىك كونسەرتتىك ۇيىمىنىڭ «Astana Musical» تەاترى ەلىمىزدىڭ رۋحاني قۇندىلىقتارىنا اينالعان حالىق اندەرى مەن حالىق كومپوزيتورلارىنىڭ شىعارمالارى، ۇلتتىق وپەرا مەن كلاسسيكالىق مۋزىكانىڭ ءىنجۋ-مارجاندارى نەگىزىندە دالا تەاترىنىڭ ەلەمەنتتەرىن پايدالانا وتىرىپ «ۇلى دالا تەاترى» اتاۋىمەن «قىز جىبەك»  ەتنو-فولكلورلىق ميۋزيكلى استانا جۇرتشىلىعىنىڭ نازارىنا ۇسىنىلادى دەپ حابارلايدى Qamshy.kz اقپارات اگەنتتىگى. 

ەۋروپالىقتاردى ءتانتى ەتكەن ميۋزيكل 16-17 جەلتوقسان كۇندەرى استانا قالاسىندا قويىلىپ، تاۋەلسىزدىك مەرەكەسىنە وراي ەلوردا تۇرعىندارى مەن قوناقتارىنا ەرەكشە تارتۋ بولماق.

قويۋشى-رەجيسسەرى جانە جوبا اۆتورى – «Astana Musical» تەاترىنىڭ كوركەمدىك جەتەكشىسى، «قازاقكونسەرت» مكۇ ديرەكتورى، قازاقستاننىڭ ەڭبەك سىڭىرگەن قايراتكەرى اسحات ماەميروۆ.  سونىمەن قاتار، قويىلىم بارىسىندا «استانا سازى» ەتنو-فولكلورلىق ءانسامبلى ونەر كورسەتەدى.

عاسىرلار قويناۋىنان سىر شەرتەتىن «قىز جىبەك» قازاقتىڭ ليرو-ەپوستىق جىرىنىڭ جاۋھارى. تراگەديا كەيىپكەرلەرى جىبەك پەن تولەگەن الەمگە ايگىلى رومەو مەن دجۋلەتتاداي قازاق حالقى ءۇشىن ماحابباتتىڭ سيمۆولى ىسپەتتەس. وقيعالار نەگىزىنەن جاس باتىر تولەگەن، قىز جىبەك جانە ەل اراسىندا ەرجۇرەكتىگىمەن، كۇش-قايراتىمەن اتى شىققان باتىر بەكەجان اراسىنداعى قارىم-قاتىناستار توڭىرەگىندە ءوربيدى دە، اقىرى تولەگەن قىزعانىشتىڭ قۇربانى بولادى. سۇيگەنىنسىز جىبەككە دە ءومىر جوق...  ەل بىرلىگى مەن تۇتاستىعى يدەياسى قاتار ءورىلىپ، حالىقتىڭ وي-ارمانى مەن اڭسارى تانىلاتىن، بوياۋى جارقىن  قويىلىمدا ۇلتتىڭ ءومىرى مەن تىعىز بايلانىستى داستۇرلەر دە  - باتا ءسوز، قارعىس، جوقتاۋ، زار، كوڭىل ايتۋ، قوشتاسۋ جانە ت.ب. – جاقسى كورىنىس تاپقان. جىبەك بەينەسى - سۇلۋلىق پەن اسەمدىكتىڭ نىشانى، قازاق حالقىنىڭ ماقتانىشى، رۋحاني ەسكەرتكىش. دالا تەاترىنىڭ نەگىزىندە ساحنالانعان «ۇلى دالا تەاترى» ەتنو-فولكلەرلىك ميۋزيكلىنەن كورەرمەن قازاق حالقىنىڭ  ۇلتتىق داستۇرىمەن ەتەنە تانىسۋعا مۇمكىندىك الادى. سونداي-اق، سپەكتاكلدە قوس اقىننىڭ ءسوز تارتىسى، وي قاقتىعىسىمەن قاتار سۋىرىپسالمالىق قابىلەتىن دارىپتەيتىن قازاقتىڭ ۇلتتىق ونەرى اقىندار ايتىسى ورىن العان.