18 قاڭتار كۇنى كەشكىسىن شىمكەنتتەگى باۋىرجان مومىش ۇلى كوشەسىندە كولىكتە كەلە جاتقان جىگىتكە وق اتىلىپ، جۇرگىزۋشى اۋىر جاراقاتپەن اۋرۋحانانىڭ جانساقتاۋ بولىمىنە جەتكىزىلدى.

وقيعا بىلاي وربىگەن. 1993 جىلى تۋعان ازامات "تويوتا كامري" ماركالى كولىكپەن كەلە جاتقان كەزىندە بەلگىسىز بىرەۋلەر اۆتوماشينامەن قۋىپ جەتىپ، قارۋدان بىرنەشە رەت وق اتقان.

ول باسىنا تيگەن بىتىرادان جاراقات الادى. قاڭعىعان وقتان كوشەدە كەلە جاتقان قىز بالا دا جەڭىل جاراقاتتانعان.

وسى ىسكە قاتىستى شۇعىل ىزدەستىرۋ جۇمىستارى ناتيجەسىندە 5 جىگىت قولعا تۇسكەن. ولار ءقازىر قاماۋعا الىنىپ، قىلمىستىق ءىس قوزعالدى.

قالاداعى اباي اۋدانى پروكۋرورى ءابۋتالىپ مۇستافايەۆتىڭ مالىمدەۋى بويىنشا، ۇستالعان 5 ازاماتتىڭ جەكە باستارى انىقتالعان. تەرگەۋ امالدارى بارىسىندا قىلمىس كەزىندە تاعى ءبىر جىگىتتىڭ بولعانى بەلگىلى بولىپتى.

ءقازىر كۇدىكتى ىزدەستىرىلۋدە. تەرگەۋدى ىشكى ىستەر ورگاندارى جۇرگىزۋدە. 24.kz