قىتايلىق سزيانسۋ (Jiangsu) پروۆينسياسىنىڭ ونەركاسىپتىك ساياباعىندا 3D-پرينتەرىنىڭ كومەگىمەن سالىنعان تۇرعىن ۇيلەر كورمەسى ءوتتى. عيماراتتاردىڭ ءبىرىنىڭ بيىكتىگى 5 قابات، دەپ حابارلادى The Daily Mail باسىلىمى.

ۇيلەر بيىكتىگى 21 فۋت (6،4 مەتر)، ەنى 32 فۋت (9،75 مەتر) جانە ۇزىندىعى 500 فۋت (152،4 مەتر) نىساندار دايىنداۋعا مۇمكىندىك بەرەتىن پرينتەردىڭ كومەگىمەن سالىنادى. باسىپ شىعارۋ ءۇشىن ماتەريال رەتىندە قوسالقى قۇرىلىس قالدىقتارىنىڭ قوسپاسى، شىنى، بولات جانە سەمەنت پايدالانىلادى. بۇل «قوسپا» ءۇي قابىرعاسى  قاجەتتى قالىڭدىققا جەتكەنشە، قاباتتالىپ جاعىلا بەرەدى.

مۇنداي نىسانداردى العاش رەت 2014 جىلى Shanghai WinSun Decoration Design Engineering Co كومپانياسى جاساپ شىعاردى. ۇلكەن پرينتەردىڭ كومەگىمەن بەتوننان ون شاقتى بىردەي عيمارات دايىندادى. ءار عيمارات قۇنى - 3،1 مىڭ فۋنت ستەرلينگ.

كورمەگە قويىلعان دانالاردىڭ ىشىندە ەڭ از گاباريتتىسى 100 مىڭ فۋنت ستەرلينگكە ساتىلۋدا. قۇنىنا قاراماستان كومپانيا ءۇي باسىپ شىعارۋ ءۇشىن جۇزدەگەن تاپسىرىس العان. ونىڭ ىشىندە مىسىر ۇكىمەتى دە بار. Winsun كومپانياسىنىڭ باس ديرەكتورى ما يۋ حي (Ma Yi He) مۇنداي ءۇيدى ءبىر تاۋلىكتە جاساپ شىعارۋعا بولاتىنىن اتاپ ءوتتى.

ونىڭ ايتۋىنشا، قۇرىلىستىڭ بۇل تۇرىندە قالدىقتار قايتا ءبىر رەت وڭدەلەدى. ول كەلەشەكتىڭ قۇرىلىس الاڭدارى بارىنشا تىنىش، نەعۇرلىم تازا ءارى كوز قۋانتارلىق بولاتىنىنا سەنىمدى.

"قازينفورم"