اقش 20 جاسقا دەيىنگى جاس جەتكىنشەكتەردىڭ قازا بولۋ كورسەتكىشىنە بايلانىستى كوش باستاپ تۇر، دەپ حابارلايدى Qamshy.kz اقپارات اگەنتتىگى Life.ru سايتىنا سىلتەمە جاساي وتىرىپ. –

بالتيمورداعى دجون حوپكينس اۋرۋحاناسىنىڭ زەرتتەۋشىلەرى الەمدىك دەنساۋلىق ساقتاۋ ۇيىمىنداعى دەرەكتەردى پايدالانا وتىرىپ 1961 مەن 2010 جىلدار ارالىعىنداعى ادام ءولىمىنىڭ سەبەپتەرىن انىقتاعان. كىشكەنتاي بالالار مەن جاسوسپىرىمدەردىڭ كوز جۇمۋ سەبەپتەرىن انىقتاۋ بارىسىندا 20 جاسقا دەيىنگى امەريكالىق جاس جەتكىنشەكتەر وزگە ەلدەرگە قاراعاندا 57%-عا ارتىق كوز جۇمعان ەكەن. ولاردىڭ قاتارىندا كانادا، اۆستراليا، فرانسيا، شۆەسيا جانە ۇلىبريتانيا ەلدەرى دە بار.

عالىمداردىڭ ايتۋىنشا، اقش-تا كىشكەنتاي بالالار مەن جاسوسپىرىمدەردىڭ ءولىمى ارتىپ كەلەدى ەكەن. 2001-2010 جىلدار ارالىعىندا اقش-تا 20 جاسقا دەيىنگى جاس جەتكىنشەكتەردىڭ ءولىمى وزگە ەلدەرمەن سالىستىرعاندا 76%-عا كوپ بولعان.

سونىمەن قاتار، جاس جەتكىنشەكتەردىڭ كوپشىلىگى وق ءتيىپ جاراقاتتانۋ ناتيجەسىندە كوز جۇمادى ەكەن. عالىمداردىڭ ايتۋىنشا، 15 پەن 19 جاس ارالىعىنداعى بالالاردىڭ 82%-ى وق ءتيىپ جاراقاتتانۋ سالدارىنان قازا تاپقان.