اقتاۋ تۇرعىندارى مۇز ايدىنىندا وتكەن اكسيا بارىسىندا ءبىرىن-بىرى تاپتادى، - دەپ حابارلادى "لادا" باسىلىمى.

ەسكە سالا كەتەيىك، قازاقستاندىق بانكتەردىڭ ءبىرى تۇرعىندارعا تەگىن كونكي تەبۋ مۇمكىندىگىن ەلىمىزدىڭ بىرنەشە قالاسىندا ۇسىنعان بولاتىن. مۇز ايدىنىنىڭ ماڭىنداعى قۇجىناعان حالىقتىڭ ۆيدەوسى ءقازىر الەۋمەتتىك جەلىلەردە دە ءورىپ ءجۇر.

ەندى سۇراق تۋادى، نەگە وسى قازاقستاندىقتار تەگىن دۇنيەگە اۋەس؟ اقتاۋداعى ابىگەردى سىرعاناۋدىڭ سيقىرىنا ەرگەن جۇرتتىڭ اۋەستىگىنە تەلۋگە بولا ما؟ ەگەر مۇنداي جاعداي العاش رەت ورىن الىپ وتىرسا، سونداي بايلام جاساۋعا دا بولار ەدى. الايدا تەگىن نەمەسە ارزان دۇنيە ءۇشىن حالىقتىڭ ءبىر-بىرىن تاپتاپ كەتە جازداعانى العاش رەت ەمەس قوي. وتكەن جىلى اتىراۋدا دا وسىعان ۇقساس وقيعا بولعان. سۇيىق مايعا 50 پايىزدىق جەڭىلدىك جاساعان سۋپەرماركەتتەردىڭ ءبىرى جۇرت ءنوپىرىنىڭ استىندا قالدى. قۇجىناعان حالىق ساتۋشىلاردىڭ ءوزىن تاپتاپ كەتە جازداعان. ەگەر «اقتاۋ مەن اتىراۋ جۇرتى-اق ءسويتىپ جۇرەدى ەكەن» دەگىڭىز كەلسە، مىسالدى الماتىدان كەلتىرەمىز. 2016 جىلى ءىرى ساۋدا ورتالىقتارىنىڭ ءبىرى كليەنت تارتۋ ماقساتىندا ەلدە جوق اكسيا ويلاپ تاپقان ەدى. اكسيانىڭ شارتى بويىنشا دۇكەن كاسساسىنا شەشىنگەن قالپىندا كەلگەن ادام 5 مىڭ تەڭگەگە دەيىنگى تاۋاردى تەگىن الادى. العاندار از بولعان جوق. دامبالشاڭ كۇيىندە پاكەت-پاكەت تاۋار كوتەرگەندەردىڭ قاتارىنا قىز-كەلىنشەكتەر دە قوسىلىپ كەتتى.

ەندى وسىنى نەدەن دەپ ويلايسىز؟ قازاقستان حالقى قالتاسىنداعى تيىنىن وزىنەن ايايتىن سونشالىقتى ساراڭ با؟ اسىپ كەتسە، مۇز ايدىنىنىڭ بيلەتى بىرەر مىڭ تەڭگەنىڭ شاماسى. الماتى دۇكەنىنىڭ بەرەتىنى – 5 مىڭنىڭ تاۋارى. سول ءۇشىن اق قار، كوك مۇزدا بار شارۋانى ىسىرىپ قويىپ، تەگىنگە ۇمتىلۋعا، 5 مىڭنىڭ تاۋارى ءۇشىن جەردەن شىققانداي بولىپ، لىپامەن جۇرۋگە يتەرمەلەيتىن قانداي كۇش، نەندەي سيقىر؟

بىلەسىز، قازاق بيلىگى ەلىمىزدى دامىعان وتىزدىقتىڭ قاتارىنا قوسپاق نيەتتە. قازاقستاننىڭ قازىرگى دەڭگەيىنىڭ وزىنە بيلىكتىڭ كوڭىلى توعايادى. قالاسا، «ارتتا قالعان»، «جاعدايى مۇشكىل» مەملەكەتتەرگە گۋمانيتارلىق كومەك بەرەدى. ارعىنى ايتپاي-اق قويايىق، سوڭعى جىلداردىڭ وزىندە ەلىمىز شەتەلگە 10 ملرد. تەڭگەدەن استام گۋمانيتارلىق كومەك جاساپتى. مۇنى بىلتىر ءماجىلىس ءتوراعاسىنىڭ ورىنباسارى ۆ.بوجكونىڭ اۋزىن تولتىرىپ تۇرىپ ايتقانى ەسىمىزدە.

ءبىزدى مازالايتىنى مىناۋ عوي. شەتەلدىكتەر ارزان سۇيىق ماي ءۇشىن وپىر-توپىر ۇيلىعىپ جاتقان، جارتى دوربا ازىق-تۇلىك ءۇشىن تىرداي بولىپ جۇرگەن قازاقستاندىقتاردى كورسە، نە ويلايدى؟ وعان داۋ جوق، «ە، بۇلارىڭ ناعىز ساراڭ، شىق بەرمەس شىعايبايدىڭ ءوزى ەكەن» دەيدى. ال ەندى سىزگە سۇراق: قالاي ويلايسىز، قازاقستاننىڭ حالقى ساراڭ با، الدە حالقىنىڭ اۋپىرىمدەپ ارەڭ كۇن كورىپ جۇرگەنىن بىلمەيتىن، ەستىمەيتىن بيلىگى كەرەڭ بە؟

سانسىزباي نۇربابا