Qamshy.kz اقپارات اگەنتتىگى اپپاق ءسابيت دەگەن لاقاپ اتپەن تانىمال سابيتبەك ءومىرزاقوۆ باستاعان قىلمىستىق توپتان ءزابىر كورىپ، دەنساۋلىعىنان ايرىلعان قىزىلوردالىق نۇرلان تۇرمانوۆ تۋرالى جازعان ەدى. 2013 جىلى بولعان بۇل وقيعانىڭ ءالى كۇنگە نۇكتەسى قويىلعان جوق. نۇرلان تۇرمانوۆ جەرگىلىكتى قۇزىرلى ورگانداردان باستاپ جوعارعى سوتقا دەيىن شاعىم تۇسىرگەن. جابىرلەنۋشى اپپاق سابيتكە بەرىلگەن 4 جىل جازا مەرزىمىن از دەپ سانايدى. ول ەندى بۇل ءىستى جىلى جاۋىپ قويا سالماي، قايتادان كوتەرىپ وتىر.

Qamshy.kz پورتالى – ەركىن اقپارات الاڭى.  اتالمىش ىسكە قاتىستى پىكىر بىلدىرەمىن دەگەن قۇزىرلى ورگاندار نەمەسە جاۋاپتى تۇلعالار بولسا، ءاردايىم مىنبەرىمىز دايىن ەكەنىن مالىمدەيمىز.

سايتىمىزعا شىققان ماقالادا قاراقشىلاردىڭ نۇرلان تۇرمانوۆتى اياۋسىز سوققىعا جىعىپ، ودان 20 مىڭ اقش دوللارىن بوپسالاعانى بۇگە-شىگەسىنە دەيىن جازىلعان. جابىرلەنۋشىنىڭ سوزىنشە، اپپاق ءسابيت ونى لاس تىرلىكتەرگە يتەرمەلەپ، وزىمەن بىرگە زاڭسىز مۇناي تاسىمالداۋ ىسىنە كۇشتەپ كوندىرمەك بولعان. تەرگەۋ بارىسىندا سابيتبەك ءومىرزاقوۆتىڭ بۇدان دا وزگە اۋىر قىلمىستارعا قاتىسى بارى انىقتالعان.

– نەبىر قىلمىس جاساپ، كوپتىڭ كوز جاسىن ارقالاعان اپپاق ءسابيت وزىنە لايىق جازاسىن الماي، نەبارى ءتورت جىلعا عانا باس بوستاندىعىنان ايىرىلدى، – دەپ قىنجىلادى نۇرلان تۇرمانوۆ.

اپپاق ءسابيتتىڭ كەزىندە نەمەن اينالىسقانىن نۇرلان تۇرمانوۆ جاقسى بىلەدى ەكەن. ونىڭ ايتۋىنشا، ۇيىمداسقان قىلمىستىق توپ مۇناي ۇرلاعان، كاسىپكەرلەردى بوپسالاعان، ءتۇرلى كافە، رەستوران يەلەرىنەن اقشا سورىپ، كونبەگەندەرىن «سىندىرىپ تاستاعان». ال ولاردىڭ كوپشىلىگى اپپاق سابيتتەن جاپا شەككەنىن ايتۋعا قورقادى.

نۇرلان تۇرمانوۆتىڭ ايتۋىنشا، سابيتبەك ءومىرزاقوۆتىڭ ءتورت رەت ادام بوپسالاعانى دالەلدەنىپتى. الايدا سوت سابيتبەك ءومىرزاقوۆتى ءتورت-اق جىلعا باس بوستاندىعىنان ايىرۋمەن شەكتەلگەن ەكەن.

– ق ر زاڭى بويىنشا ادام بوپسالاۋعا تاعايىندالاتىن جازا 7 جىلدان باستالادى. ءتورت رەت مۇنداي قىلمىسقا قاتىسى بار ادامدى نە سەبەپتى ءتورت-اق جىلعا سوتتايدى. مۇنىڭ ءبارى جوعارىدان شەشىلىپ وتىر، – دەيدى نۇرلان تۇرمانوۆ.

نۇرلاننىڭ ءىسى بويىنشا تەرگەۋ دە جۇرگىزىلمەگەن. باسىندا «بۇزاقىلىق» بابىمەن قىلمىستىق ءىس قوزعالعانىمەن، دالەل جەتكىلىكسىز دەگەن جەلەۋمەن ونى دا جاۋىپ تاستاعان.

ادىلدىك ىزدەپ، تابانىنان توزعان نۇرلان تۇرمانوۆ بۇل ءىستى قاراپ، اپپاق سابيتكە جەڭىل جازا تاعايىنداعان زاڭ وكىلىن ق ر قىلمىستىق كودەكسىن بۇرمالاعانى ءۇشىن جاۋاپكەرشىلىككە تارتىپ، ايىپتاۋشى پروكۋروردى دا قىزمەتىنەن بوساتۋدى تالاپ ەتىپ وتىر.

سايتىمىزدا بىرنەشە رەت جاريالانعان ماقالالاردا نۇرلان تۇرمانوۆتىڭ التى رەت ەلباسىنا ۇندەۋ سالىپ، ۇلتتىق قاۋىپسىزدىك كوميتەتىنە بىرنەشە حات جولداعانىن، تالاي قۇزىرلى مەكەمەنىڭ تابالدىرىعىن توزدىرعانىن ايتقانبىز.

«قىزىلوردا پوليسياسى مەن پروكۋراتۋراسى قىلمىس الەمىن قامقورلىعىنا العان با؟» اتتى ماقالادا وقيعانىڭ قالاي بولعانى ەگجەي-تەگجەيلى باياندالعان. نۇرلان تۇرمانوۆتىڭ ايتۋىنشا، اپپاق ءسابيت ءوزىنىڭ سىبايلاستارىمەن بىرگە ونى ءبىر ءتۇن بويى قاتتى ازاپتاعان، «وتباسىڭدى ولتىرەمىز» دەپ قورقىتقان.  جابىرلەنۋشى نۇرلان تۇرمانوۆ: «سوعان قاراماستان، قاراقشىنىڭ بۇل قىلمىسىنا زاڭ ورىندارى كوزجۇمبايلىق تانىتتى. اپپاق ءسابيت پەن قاراعاندىنىڭ تاعى ءبىر قىلمىسكەرى ايدوس بەركىنبايەۆتىڭ جوعارى جاقتا «كوكەلەرى» بار، سولار مەنىڭ ارىزىمدى باسىپ تاستاپ وتىر»، – دەپ كۇدىكتەنەدى.

– نەگە سوت مەنىڭ ءىسىمدى قوزعامايدى؟ ونىڭ ۇستىنەن بوپسالاۋعا قاتىستى جازىلعان ارىز-شاعىمداردى قارايدى دا، مەنىكىنە كوڭىل بولمەيدى؟ سەبەبى مەنىڭ ءىسىمدى قوزعاسا، كوپ ادام قىزمەتىنەن كەتەدى. اپپاق سابيتپەن بىرگە قىلمىسقا قاتىسى بار لاۋازىمدى ادامدار دا ورنىن بوساتادى. مىسالى، مەنىڭ ءىسىم ءبىر رەت قارالعان كەزدە وبلىس پروكۋرورىنىڭ ورىنباسارى جۇمىستان قۋىلدى، – دەيدى نۇرلان تۇرمانوۆ.

الەۋمەتتىك جەلىدە تاراعان ۆيدەودان اپپاق ءسابيتتىڭ تۇرمەدە شالقىپ ءومىر ءسۇرىپ جاتقانى بايقالادى. الدىندا داستارحان جايناپ تۇر، ءوزى قىمىز شايقاپ وتىر. قۇددى ءبىر رەستوران دەرسىڭ.

نۇرلان تۇرمانوۆتىڭ سوزىنشە، اپپاق ءسابيتتىڭ بوستاندىقتا جۇرگەن ىنىلەرى مەن باسقا دا ادامدارى ونىڭ قىلمىستىق ارەكەتتەرىن ىسكە اسىرىپ ءجۇر. ولار كونتراباندامەن، بايقوڭىردان ءتۇرلى ساپالى مەتالداردى تاسىمالداۋمەن اينالىساتىن كورىنەدى.

ءوز وتباسىن، ءوز قۇقىعىن قورعاماق بولىپ ادىلدىك ىزدەگەن نۇرلان تۇرمان رەداكسيامىزعا بىرنەشە رەت حابارلاسقان ەدى. ءبىز وسىنىڭ بارلىعىن نەگىزگە الىپ، قۇزىرلى ورگاندارعا بىرنەشە ساۋال جولدادىق.

– مەنىڭ ءىسىمدى قوزعاسا، اپپاق سابيتكە جەتى جىل قوسادى. سەبەبى ەڭ اۋىر قىلمىسى بولىپ تۇرعانى – مەنىڭ ءىسىم، قالعانى – بولماشى عانا نارسەلەر. ال ماعان كورسەتكەن قورلىعى جابۋلى كۇيىندە قالسا، ءبىر جىلدان كەيىن-اق بوساپ شىعۋعا مۇمكىندىگى بار، – دەيدى جابىرلەنۋشى.

نۇرلان تۇرمانوۆ ەلباسى نۇرسۇلتان نازاربايەۆتان، ۇقق ءتوراعاسى كارىم ماسىموۆتەن جانە باس پروكۋرور قايرات قوجامجاروۆتان كومەك سۇرايدى.

– قانشا ۋاقىت وتسە دە، مەنىڭ ارىزىم نە سەبەپتى قارالماي كەلە جاتىر؟ قىلمىسكەرلەر وزدەرىنە لايىق جازاسىن الماي ما؟

ق ر زاڭى كۇشتىلەردىڭ ىرقىنا كونە بەرە مە؟ قاشان ادىلدىك ورنايدى؟ - دەپ كۇيىنەدى نۇرلان تۇرمانوۆ.