كەزدەسۋ بارىسىندا قازاقستان مەن امىرلىكتەر اراسىنداعى ءوزارا ىقپالداستىقتىڭ قازىرگى جاعدايى، سونداي-اق ساياسي، ەكونوميكالىق جانە مادەني-گۋمانيتارلىق سالالارداعى ىنتىماقتاستىقتىڭ پەرسپەكتيۆالارى تالقىلاندى.

– قازاقستان پرەزيدەنتى نۇرسۇلتان نازاربايەۆ پەن بىرىككەن اراب امىرلىكتەرىنىڭ باسشىسى شەيح حاليفا ءال ناحاياننىڭ تىعىز ءارى ءوزارا سەنىمدى بايلانىستارىنىڭ ارقاسىندا ەلدەرىمىز اراسىندا دوستىق قارىم-قاتىناس ورنادى، – دەدى مەملەكەتتىك حاتشى.

گ. ءابدىقالىقوۆا قازاقستاننىڭ 4.0-يندۋسترياسى ەلەمەنتتەرىن ەنگىزۋدى جانە الەمنىڭ وزىق دامىعان وتىز ەلىنىڭ قاتارىنا قوسىلۋدى كوزدەيتىن مەملەكەت باسشىسىنىڭ «ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇمكىندىكتەرى» اتتى جولداۋىن ىسكە اسىرۋعا كىرىسكەنىن اتاپ ءوتتى.

– ءبىز بۇۇ قاۋىپسىزدىك كەڭەسىنىڭ تۇراقتى ەمەس مۇشەسىمىز. تاياۋدا نۇرسۇلتان نازاربايەۆ قاۋىپسىزدىك كەڭەسىنىڭ وتىرىسىنداعى سويلەگەن سوزىندە حالىقارالىق ومىردە ساياسي سەنىم مەن جۇيەلى ديالوگتىڭ ماڭىزدى ەكەنىنە نازار اۋدارعان بولاتىن، – دەدى مەملەكەتتىك حاتشى.

گۇلشارا ءابدىقالىقوۆا «استانا» حالىقارالىق قارجى ورتالىعى مەن امىرلىكتەردىڭ قارجى ورتالىقتارى اراسىندا ءوزارا بەلسەندى ءىس-قيمىلدى جالعاستىرۋدىڭ ماڭىزدى ەكەنىن اتاپ ءوتتى.

سوڭىندا مەملەكەتتىك حاتشى بىرىككەن اراب امىرلىكتەرىنىڭ حالىقارالىق «استانا ەكسپو-2017» مامانداندىرىلعان كورمەسىنە بەلسەندى اتسالىسقانى ءۇشىن ريزاشىلىق ءبىلدىرىپ، دۋبايداعى كەلەسى ەكسپو-2020 كورمەسىنىڭ جوعارى دەڭگەيدە وتەتىنىنە سەنىم ءبىلدىردى.

– قازاقستان بىرىككەن اراب امىرلىكتەرىمەن تولىققاندى ستراتەگيالىق سەرىكتەستىك ورناتۋعا مۇددەلى جانە ەكسپو-2020 كورمەسىنە بەلسەندى اتسالىساتىن بولادى، – دەدى گ.ءابدىقالىقوۆا.