قىتايدا لاتىن قارپىندەگى ميكروبلوگ الاڭى - «tyttey.com» دۇنيەگە كەلدى. قۇرىلعانىنا ءۇش كۇن عانا بولعان ميكروبلوگقا قازىرگە دەيىن 300-دەن اسا ادام تىركەلسە، ونىڭ 10 شاقتىسى قازاقستاننىڭ ازاماتتارى بولىپ شىقتى. گەرمانيا، فرانسيا جانە اقش ەلدەرىنەن دە «tyttey»-گە ءۇن قوسۋشى قازاقتاردىڭ سانى كۇن ساناپ ارتۋدا.

جاقىن كۇندەرى قىتايدىڭ قازاق ءتىلدى سايتتارىنىڭ قىزۋ تالقىداعى تاقىرىبى – لاتىن الىپبيىنە كوشۋ ماسەلەسى ەكەنىنە كۋا بولىپ ءجۇرمىز. ەلباسىمىز نۇرسۇلتان ءابىش ۇلى نازاربايەۆتىڭ 2012 جىلعى قازاقستان حالقىنا جولداۋىندا «قازاق ءالفاۆيتىن 2025 جىلعا قاراي لاتىن گرافيكاسىنا كوشىرۋگە دايىندىق جۇمىسىن وسى باستان قولعا الۋ قاجەت. بۇل قازاق ءتىلىن جاڭعىرتىپ قانا قويماي، ونى وسى زامانعى اقپاراتتىڭ تىلىنە اينالدىرادى» دەگەنى قىتايداعى قانداستارىمىزدى ءبىر قۋانتىپ تاستادى. بۇنى وتكەن جىلدىڭ ەڭ جاعىمدى جاڭالىعىنا بالاعان قانداستارىمىز لاتىنعا كوشۋگە قۇلشىنىستارىن ءىس ارقىلى دالەلدەي باستادى.

عالامتور ارقىلى تالاي قازاقتىڭ باسىن قوسىپ جۇرگەن قىتايداعى ەڭ العاش قۇرىلعان قازاق سايتتارىنىڭ ءبىرى، توتە جانە كيريلل قارپىندە اقپارات تاراتاتىن بىردەن-بىر پورتال - www.senkazakh.com «تيتتەي» (www.tyttey.com) دەپ اتالاتىن ميكروبلوگتار الاڭىن اشتى. الەمدە بۇل تەكتەس www.twitter.com جۇيەسىنىڭ ميلليونداعان قولدانۋشىسى بار بولسا، قىتايدىڭ www.weibo.com-ىنا 500 ميلليونداي ادام تىركەلگەن.

«ميكروبلوگ جۇيەسىنىڭ اتى «تيتتەي» بولعانىمەن كوتەرگەن جۇگى ارۋىر. www.tyttey.com قازاق ءتىلدى سايتتار الەمىنە ۇلكەن ءبىر جاڭالىق، عالامتور قولدانۋشىلارىنا جاڭا ءبىر ۇعىم سىيلايتىنىنا سەنىمىم زور»،-دەيدى «سەن-قازاق» سايتىنىڭ جەتەكشىسى اقىتبەك شەريزات ۇلى.

شىنىمەن دە بۇنى قازاق قوعامىنداعى تىڭ جاڭالىق دەپ ايتۋعا ابدەن قاقىلىمىز. ويتكەنى ەلىمىزدە ءالى كۇنگە بۇنداي قازاقستاندىق جۇيە اشىلا قويعان جوق. ءبىزدىڭ دە قولداناتىنىمىز www.twitter.com.

«كۇللى قازاق بالاسىنىڭ رۋحاني بىرلىگى ءۇشىن لاتىن قارپىنە كوشۋىمىز كەرەك. «تيتتەي» اتتى جۇيەنى اشۋداعى ماقساتىمىز – بارلىق قانداستارىمىزدىڭ ۇيالى تەلەفون سياقتى زاماناۋي تەحنيكالىق قۇرالداردا ءوز جازۋىمىزبەن تىلدەسۋىن باستاپ، سول ارقىلى انا ءتىلىمىزدىڭ ءورىسىن كەڭەيتۋ»،- دەيدى اتالمىش جۇيەنى قۇرۋشىلاردىڭ ءبىرى، شىڭجاڭ گازەتىنىڭ اۋدارماشىسى قۇلقايتەكتى نۇرلان جانايقان ۇلى.

قازاق ەلى كيريلل ءقارپىن قولدانعالى جارتى عاسىردان استام ۋاقىت بولسا دا قىتايداعى قانداستارىمىز ءالى كۇنگە احمەت بايتۇرسىنوۆتىڭ توتە جازۋىندا ءجۇر. ەكى ءتۇرلى ءالىپبي قولدانۋ ەكى ەل قازاقتارىنىڭ مادەني اۋىس-كۇيىسىنە كەرى اسەرىن تيگىزىپ كەلگەنى انىق. ونىڭ ۇستىنە ونداعى قازاقتىڭ ءتىلى سول ەلدىڭ ساياساتىنىڭ سالدارىنان توز-توزى شىعا باستادى. سوندىقتان دا جۇڭگو قازاقتارى كۇللى قازاققا ورتاق الىپبيگە كوشۋدى زور ۇمىتپەن كۇتىپ وتىرعانىن ايتا كەتكەن ءجون. وسىعان وراي «انا تىلگە تيتتەي ۇلەس قوس!» دەگەن ۇراندى كوتەرگەن «سەن-قازاق» سايتىنىڭ ازاماتتارى ءابدۋالي قايداروۆتىڭ جاساعان لاتىن جوباسىن وزدەرىنە يكەمدەپ، www.tyttey.com-نىڭ جۇمىسىن باستاپ وتىر.

ەندەشە، بار قازاقتىڭ بالاسى «تيتتەي»-گە تىركەلىپ، تيتتەي ءۇن قوسىڭىز دەگىمىز كەلەدى!

مايگۇل سۇلتان