استاناداعى قازمەديا ورتالىعىندا باستالعان قازاق سايتىنىڭ بۇگىنگى ماسەلەلەرى مەن دامۋىنا ارنالعان تۇڭعىش كونفەرەنسيانىڭ قۇتتىقتاۋ ءسوزىن «نۇر وتان» حدپ حاتشىسى ەرلان قارين باستادى. ونىڭ ايتۋىنشا تۇڭعىش رەت كەڭ كولەمدى ۇيىمداستىرىلعان قازاق سايتتارىنىڭ رەداكتورلارىنا ارنالعان بۇل كونفەرەنسيا «قازاق» گازەتىنىڭ شىققانىنا 100 جىل تولۋىنا دا ورايلاستىرىپ وتىر ەكەن. ءوتىپ جاتقان القالى جيىن قازاق ينتەرنەتىنىڭ دامۋ ەرەكشەلىكتەرى مەن وزەكتى ماسەلەلەرىن، ديزاينى جانە تەحنيكالىق سۇيەمەلدەۋدى قولداۋ، كوممەرسيالاندىرۋ ماسەلەلەرىمەن قوسا IT سالاسىنداعى تەرمينولوگيا جانە ءقارىپ ماسەلەسنى، جاڭا مەديا مەن قازاق ينتەرنەتى جۋرناليستيكاسى قاتارلى تاقىرىپتاردى تالقىلاماق. «بۇل رەتكى باسقوسۋدىڭ جانە ءبىر ەرەكشەلىگىن اتاپ وتەر بولسام، بۇگىن امەريكادان جانە قىتايدان Skype ارقىلى بايلانىسقا شىعاتىن قازاق سايتتارىنىڭ بەلگىلى تۇلعالارى ءبىزدىڭ تالقىلاناتىن تاقىرىپتارىمىزعا ءوز پىكىرلەرىن قوساتىن بولادى»،-دەدى ەرلان تىنىمباي ۇلى. ەرلان قارين قۇتتىقتاۋ سوزىندە كونفەرەنسيانى وتكىزۋ ويىن ورتاعا قويعان ازاماتتار ساياساتكەر ايدوس سارىم مەن «اباي-اقپارات» اگەنتتىگىنىڭ باسشىسى داۋرەن قۋات ەكەنىن اتاپ ءوتتى. كونفەرەنسيادا ءتورت قۇجات قابىلداۋدى ماقسات ەتكەن ۇيىمداستىرۋشىلار ەڭ الدىمەن ينتەرنەت قاۋىمداستىعىن، ياعني قازاق سايتتارىنىڭ رەداكتورلارىنا ارنالعان قۇجاتتى دايىنداپ وتىرعاندىعىن جەتكىزدى. سونىمەن قاتار قازاق ينتەرنەتىنىڭ دامۋىن مەملەكەتتىك ورگاندارمەن بايلانىستىراتىن، اۋىل-ايماقتارعا ينتەرنەت جەلىلەرىنىڭ بارۋى، WIFI جەلىلەرىنىڭ ورناۋىنا ارنالعان قۇجات پەن لاتىن قارپىنە كوشۋ جايلى قۇجاتتى قابىلداۋدى دا كوزدەلىپ وتىر.