بەلگىلى دارىگەر، بيولوگيا عىلىمدارىنىڭ دوكتورى سالتانات بايقوشقاروۆا 1960 جىلى 2 اقپاندا دۇنيەگە كەلدى.

سالتانات بايقوشقاروۆا 2017 جىلى «قازاقستاننىڭ 100 جاڭا ەسىمى»  تىزىمىنە ەنگەن. «قۇرمەت» وردەنىمەن، «ق ر دەنساۋلىق ساقتاۋ مينيسترلىگىنىڭ «دەنساۋلىق cاقتاۋ ىسىنە قوسقان ۇلەسى ءۇشىن» مەدالىمەن ماراپاتتالعان. ۇلتتىق مەديسينا اسسوسياسياسىنىڭ «التىن دارىگەر» اتاعىن يەلەنگەن.

سالتانات بەردەن قىزى ەل مەديسيناسىنىڭ دامۋىنا ولشەۋسىز ۇلەس قوسىپ كەلەدى. ءالى دە اسار اسۋى الدا ەكەنىنە ءشۇبا جوق. قازاق بالالارىنىڭ بولاشاعى ءۇشىن ەڭبەك ەتىپ جۇرگەن دارىگەر جاقىندا Qamshy.kz اقپارات  اگەنتتىگى ۇيىمداستىرعان «الاش ارىستارىنىڭ ءىزباسارى» اتاعىن الدى. ايتا كەتەيىك، ول كىسى بۇكىل قازاقستان بويىنشا جۇرگىزىلگەن ساۋالناما ناتيجەسىندە وسى اتاققا لايىق دەپ تانىلدى.

سالتانات بايقوشقاروۆانىڭ دەنساۋلىق ساقتاۋ سالاسىنا سىڭىرگەن ەڭبەگى زور. ول قازاقستانداعى العاشقى دەنەدەن تىس ۇرىقتاندىرۋ (دتۇ) لابوراتورياسىنىڭ – «ەكومەد» ەمحاناسىنىڭ نەگىزىن قالادى. قازاقستاندا جانە ورتالىق ازيادا تۇڭعىش رەت دتۇ ءادىسىن قولداندى.

سالتانات بايقوشقاروۆا ەڭبەك جولىن 1988 جىلى دارىگەر-لابورانت بولىپ باستادى. مەديسيناداعى العاشقى ادىمىنان-اق ەرلەر بەدەۋلىگىنىڭ سەبەبىن زەرتتەدى. جاساندى ۇرىقتاندىرۋ باعىتىندا ءتۇرلى ادىستەردى ەنگىزدى. ءسويتىپ ءجۇرىپ، قازاقستاندا ءبىرىنشى «قۇتىداعى بالانىڭ» دۇنيەگە كەلۋىنە سەپتىگىن تيگىزدى.

سالتانات بايقوشقاروۆا 50-دەن استام عىلىمي جۇمىس جازعان. تەك قازاقستانعا عانا ەمەس، الەمگە ايگىلى سالتانات بايقوشقاروۆانى تۋعان كۇنىمەن قۇتتىقتاي وتىرىپ، زور دەنساۋلىق پەن ۇزاق ءومىر تىلەيمىز. قازاقستانداعى مەديسينا سالاسىنىڭ قارىشتاپ دامۋىنا اتسالىسىپ، عىلىمي جاڭالىقتارىمەن قۋانتا بەرەتىنىنە كامىل سەنەمىز!