بۇگىن قازاقستانداعى ادام قۇقىعى جونىندەگى بيۋرونىڭ پرەسس-زالىندا اباقتىداعى ساياسي تۇتقىن ماكس بوقايەۆتىڭ دەنساۋلىعى مەن وعان قاتىستى ورىن العان زاڭسىزدىقتارعا وراي باسپا ءسوز ءماجىلىسى ءوتتى دەپ حابارلايدى Qamshy.kz اقپارات اگەنتتىگى bureau.kz سايتىنىڭ دەرەگىنە سۇيەنىپ. ونىڭ قورعاۋشىسىنىڭ ايتۋىنشا، ءقازىر م.بوقايەۆ جارتى جىلعا قاتاڭ رەجيمگە اۋىستىرىلعان. ونىمەن قوسا، ءوز تۇرعىلىقتى وڭىرىنە اۋىستىرۋ تۋرالى شاعىمىن سوت تاعى دا قاناعاتتاندىرماي تاستادى.

ماكس بوقايەۆقا قاتىستى سوڭعى زاڭسىزدىقتار تۋرالى باسپا ءسوز ءماجىلىسى سپيكەرلەرى ونىڭ قورعاۋشىسى ايمان وماروۆا، بيۋرو جەتەكشىسى ەۆگەنيي جوۆتيس جانە «امان-ساۋلىق» قوعامدىق قورىنىڭ جەتەكشىسى، دارىگەر باقىت تۇمەنوۆا ايتىپ بەردى.

قورعاۋشىسىنىڭ ايتۋىنشا، تۇرمە باسشىلىعى ماكس بوقايەۆتىڭ جاتتىعۋ جاساۋدان باس تارقانىن جەلەۋ ەتىپ، ونى قاتاڭ رەجيمگە اۋىستىرعان. ال نەگىزىندە، ءوزىنىڭ دەنساۋلىق جاعدايىنا بايلانىستى ماكس بوقايەۆقا سۋىققا شىعۋعا دارىگەرلەر تىيىم سالعان. ادۆوكات ا.وماروۆا بوقايەۆ جاتتىعۋدى جاساۋدان باس تارپاعان، تەك 25 گرادۋستىق سۋىقتا دەنساۋلىعىنا بايلانىستى دالادا جاساۋدان باس تارقان. ءوز كامەراسىندا جاساعان. ءبىراق، ساياسي تۇتقىننىڭ دەنساۋلىق جاعدايى قاپەرگە الىنباستان ول قاتاڭ رەجيمگە اۋىستىرىلعان.

قورعاۋشىنىڭ ايتۋىنشا، بۇل ادەيى جاسالىپ وتىرعان قۇيتىرقى ءىس. سەبەبى، ونداي جاعداي بارلىق ساياسي تۇتقىندارعا پايدالانىلادى. ءار-تۇرلى سىلتاۋمەن ءتارتىپتى بۇزدى دەگەن ەسكەرتۋلەردى كوبەيتىپ، ماكس بوقايەۆتى بۇدان دا قاتاڭ رەجيمدى تۇرمەگە اۋىستىرۋ جوسپارى بار ما دەپ بولجايدى.

ال ايازدا جاتتىعۋ جاساۋ رەجيمىن ەۆگەنيي جوۆتيس حالىقارالىق زاڭ نورمالارىنا قارسى دەپ اتا ءوتتى. ونىڭ ايتۋىنشا، ادامدى بوستاندىعىنان ايىرۋدىڭ ءوزى جازا، ال ونىمەن قوسا ونى ءوز ەركىنەن تىس قانداي دا ىسكە ماجبۇرلەۋ، قورلاۋعا تەڭ. سوندىقتان، ول جاتتىعۋلاردىڭ دەنساۋلىق پەن پسيحولوگيالىق جاعدايعا تەك كەرى اسەرى بولارىن ايتتى.

«جاتتىعۋعا، قانداي دا فيزيكالىق ىسكە اسكەردى مىندەتتەۋگە بولادى. سەبەبى، اسكەرگە ادەتتە 27 جاسقا دەيىنگى، ءتيىستى مەديسينالىق تەكسەرۋدەن وتكەن، جارامدى دەگەن ازاماتتار بارادى. ال تۇرمەگە تۇسكەن ادامنىڭ بارلىعىنىڭ دەنساۋلىعى ونداي ءماجبۇرلى جاتتىعۋعا جارامدى دەگەن ءسوز ەمەس. سوندىقتان، بۇل ەش زاڭدىلىققا جاتپايدى»، - دەيدى ەۆگەنيي جوۆتيس.

«امان-ساۋلىق» قوعامدىق قورىنىڭ جەتەكشىسى جۋىردا ماكس بوقايەۆتىڭ تۋىستارىنىڭ كەلگەنىن، ونىڭ بارلىق تەكسەرۋلەرىنىڭ قورىتىندىسى قولىندا ەكەنىن ايتىپ، 25 گرادۋستىق ايازدا جاتتىعۋ جاساۋعا بولمايتىنىن، دەنساۋلىعى ۋشىعىپ كەتۋى مۇمكىن ەكەنىن جەتكىزدى.

«ماكس بوقايەۆتا ەكى بىردەي سوزىلمالى اۋرۋ بار – وستەوحاندروز  جانە گەپاتيت س. ونداي دياگنوزدارمەن ارنايى تاعام رەجيمى جانە ساۋلىق گيمناستيكاسى جاسالۋى ءتيىس. ءبىراق، تۇرمە جاعدايىندا ول ارينە مۇمكىن ەمەس. سوندىقتان، ەڭ بولماسا 25 گرادۋس ايازدا جاتتىعۋ جاساۋعا ماجبۇرلەمەي، ونى جايىنا قالدىرسا دەيمىن. سەبەبى، م.بوقايەۆقا سۋىقتاۋعا بولمايدى»، - دەيدى تۇمەنوۆا.

قۇقىققورعاۋشى ەۆگەنيي جوۆتيس ماكس بوقايەۆتىڭ قاتارداعى تۇتقىن ەمەس، ساياسي تۇتقىن ەكەنىن ەسكە سالىپ، ەندىگى ماقسات وعان قاتىستى بولعان بارلىق زاڭسىز ىستەرگە قارسى شاعىم جازىپ، ونى قاتاڭ رەجيمنەن شىعارۋ ەكەنىن ايتتى. سونىمەن قاتار، ماكس بوقايەۆ پەن تالعات ايانعا قاتىستى سوت شەشىمىنىڭ ساياسي نەگىزى بار، زاڭسىز ەكەنىن بارلىق حالىقارالىق قۇقىققورعاۋ ۇيىمدارى قازاقستان بيلىگىنە ەسكەرتكەنىن، ولاردى بوساتۋدى تالاپ ەتكەنىن ەسكە سالىپ، ساياسي تۇتقىنداردىڭ بوستاندىعى ءۇشىن كۇرەس جالعاساتىنىن ايتتى.