تۇرىكمەنستاننىڭ داشوعىز قالاسىنداعى مەكتەپتەردە، تاعى ءبىرقاتار اۋدان ورتالىقتارىندا دارىگەرلەر مەن پوليسەيلەر وقۋشىلاردىڭ تەلەفوندارىنان پورنوگرافيالىق ۆيدەو جانە فوتو ىزدەپ، قىزداردى گينەكولوگيالىق تەكسەرۋگە جىبەرگەن، دەپ جازدى Qamshy.kz اقپارات اگەنتتىگى centralasian.org سايتىنىڭ دەرەگىن نەگىزگە الا وتىرىپ.
مۇنداي تەكسەرىسكە وبلىس اكىمىنىڭ ءبىلىم جانە مادەنيەت جونىندەگى ورىنباسارى تاپسىرما بەرگەن، دەپ حابارلادى ازاتلىك دەرەككوزى.
«تەكسەرۋگە كەلگەندەر بارلىعىمىزدىڭ تەلەفوندارىمىزدى جيناپ الدى. ولار نە تەكسەرەتىنىن ءتۇسىندىرىپ جاتپادى. ءبىراق كەيىن ولار پورنوگرافيالىق فايلدار ىزدەگەنىن ايتتى. وقۋشىلاردىڭ بارلىعىنان دەرلىك مۇنداي فايلدار تابىلدى»، — دەدى داشوعىز وبلىسى، گۋربانسولتان اۋدانىنداعى ورتا مەكتەپ وقۋشىسى.
ونىڭ ايتۋىنشا، پورنوگرافيالىق فايلدار تابىلعان سوڭ ءموبيلدى تەلەفوندارىن الىپ قويىپ، مەكتەپ وقۋشىلارىمەن اتا-انالارمەن بىرگە اڭگىمەلەسكەن.
«جوعارعى سىنىپتاعى قىزداردى ءبىر سىزىققا تۇرعىزىپ قويىپ، مەكتەپ مەدپۋنكتىندە تەكسەرگەن. پاكتىگى تابىلماعان قىزداردىڭ شەشەلەرىن شاقىرتىپ، بۇكىل مەكتەپكە ماسقارالاعان. وسى تەكسەرۋدەن سوڭ مەكتەپ ديرەكتورىن جۇمىستان شىعاردى»، — دەيدى دەرەككوز.
