مۇحتار اۋەزوۆ اتىنداعى قازاق مەملەكەتتىك اكادەميالىق تەاترىنىڭ ەكس-ديرەكتورى ەرلان ءبىلال سوتتان اتاق پەن ماراپاتتارىن تارتىپ الماۋدى سۇرادى، دەپ حابارلايدى Qamshy.kz اقپارات اگەنتتىگى Today.kz سايتىنىڭ دەرەگىنە سۇيەنىپ. 

«قۇرمەتتى سوت، ءدال ءقازىر جاعدايىم قيىن، ءبارى بىلەدى، وتە وكىنەمىن. مەنىڭ دەنساۋلىعىمدى، وتباسىلىق جاعدايىمدى، قارجىلىق كۇيىمدى نازارعا الۋىڭىزدى وتىنەمىن. ايىپپۇلدىڭ كولەمىن ازايتۋىڭىزدى سۇرايمىن. بۇل جازانى وتەۋ قيىن. مەن جازانى ايىپپۇل تۋرالى وتەۋگە البەتتە كەلىسەمىن، ءبىراق ادال ەڭبەگىممەن العان ماراپاتتارىمنان ايىرماۋىڭىزدى سۇراعىم كەلەدى. جاستار وداعى سىيلىعىنىڭ لاۋرەاتى ماراپاتىن 2003 جىلى انام قايتىس بولعان سوڭ الدىم. بۇل تەاتر ساحناسىندا شىعارماشىلىقپەن اينالىسۋىما، ءارى قاراي ءومىر سۇرۋىمەن ءۇمىتتىڭ بەلگىسىندەي بولعان ەدى. ءارى قاراي جۇرەتىن كۇش تاپتىم. ءۇش جىل بويى وز-وزىمە كەلە المادىم. (...) قازاقستان رەسپۋبليكاسىنىڭ ەڭبەك سىڭىرگەن قايراتكەرى اتاعىن اكەم قايتىس بولعان سوڭ الدىم. 25 جىل بويى دياگنوزىما قاراماستان تەاتردا جۇمىس ىستەدىم»، - دەدى ەرلان ءبىلال. 

تەاتردىڭ بۇرىنعى باسشىسى ىستەگەن ىسىنە وكىنەتىنىن بىرنەشە رەت ايتتى. 

«شىعارماشىلىق ادام رەتىندە ءولىپ قالماسىن دەسەڭىز، ماراپاتىمدى تارتىپ الا گورمەڭىز. قانت ديابەتى مەن ارتەريالدىق قىسىم - ادىمىمدى كەڭ اشۋىما مۇمكىندىك بەرمەيتىن اۋىر اۋرۋلار. وتە وكىنەمىن، مەن جازا باستىم.  سىزدەن وتىنەمىن، قۇرمەتتى سوت، مەنىڭ كۇيىمدى ءتۇسىنۋىڭىزدى وتىنەمىن. ءبارىمىز دە پەندەمىز. كۇندەردىڭ ءبىر كۇنىندە ءبارىمىز دە قاتەلەسۋىمىز مۇمكىن»، - دەدى ەرلان ءبىلال. 

ەرلان ءبىلال سوتتاعى سوڭعى ءسوزىن ايتىپ تۇرىپ جىلاپ جىبەردى. 

«وبەكتيۆتى بولۋىڭىزدى ءوتىنىپ سۇرايمىن. مەن ءوز كىنامدى مويىندايمىن. مەن قاتەلەستىم. ەگەر زاڭ رۇقسات بەرسە، بالالارىم ءۇشىن مەنى قولداساڭىز، ەلىمىزدىڭ گۇلدەنۋى ءۇشىن قايتادان بارىمدى سالىپ ەڭبەك ەتەتىن بولامىن، ستۋدەنتتەرگە ساباق بەرەمىن. انت ەتەمىن!»، - دەدى ەرلان ءبىلال.

ەستەرىڭىزگە سالساق، ەرلان ءبىلال 5 قاڭتاردا ۇستالعان ەدى.  8 قاڭتاردا زيالى قاۋىم وكىلدەرى ەرلان ءبىلالدى قورعاپ، ءسوز سويلەدى. 16 قاڭتاردا اكتەردىڭ 1 205 000 تەڭگە كولەمىندە كەپىلگە اقشا تولەگەنى بەلگىلى بولدى. 25 قاڭتاردا الماتىداعى المالى اۋداندىق سوتىندا ەرلان ءبىلالدىڭ سوتى باستالدى. 

ەرلان ءبىلال ءوز كىناسىن تولىق مويىنداپ، ىستەگەن ىسىنە وكىنەتىنىن ايتتى.