17 جاسىندا اۋىر دەرتكە شالدىققان ديانا شۆاباۋەر ەسىمدى ايەلدىڭ شىنايى وقيعاسىن Qamshy.kz اقپارات اگەنتتىگى Woman.ru-عا سىلتەمە بەرىپ  جازادى.

مەن ءوزىمنىڭ اۋرۋعا شالدىققانىمدى 17 جاسىمدا ءبىلدىم. ول ۋاقىتتا 11-سىنىپتا وقىپ جۇرگەنمىن. شاڭعى سپورتىمەن اينالىسىپ، ۇلكەن جەتىستىكتەرگە جەتتىم. ءبىر جولى قۇربىم قولىمداعى كوگەرگەن ىزدەردى بايقادى. مەن ولاردىڭ قايدان پايدا بولعانىن ءاۋ باستا بىلگەن جوقپىن، كەيىننەن دەنەمدە كوگەرگەن ىزدەر قاپتاپ كەتتى. قاتتى الاڭدادىم، سەبەبى مەن ءوزىمدى قانداي دا ءبىر اۋرۋعا شالدىعام دەپ ويلاعان جوقپىن. اۋراحاناعا بارىپ قارالعاندا، ساراپتاما ناتيجەلەرىم وتە ناشار بولدى.  دارىگەرلەر مۇنى ونكولوگيا دەپ بولجادى.

   نياگان قالاسىنداعى اۋرۋحانادا جۇرەگىم توقتاپ قالدى. دارىگەرلەر دە نە بولعانىن تۇسىنگەن جوق. ماعان دونوردىڭ قانى كەرەك بولدى. سەبەبى مەنىڭ قانىمداعى  ەريتروسيتتەر مولشەرى وتە از ەدى. ماسكەۋگە جىبەرىلگەن ساراپتاما ناتيجەسىندە مەنىڭ  ءقاۋىپتى دەرتكە شالدىققانىم انىقتالدى. بۇل ونكولوگيا ەمەس ەدى، الايدا سوعان وتە ۇقساس "اپلاستيالىق انەميانىڭ" اۋىر ءتۇرى ەكەن.

ماماندار ماعان "سۇيەك كەمىگىمدى" (كوستنىي موزگ) اۋىستىرۋ كەرەك ەكەنىن ايتتى. وتا جاسالعانعا دەيىن تەك ەكى اي عانا ءومىرىم قالعانىن ايتقاندا، سەنگەن جوقپىن.  تەلەفونىمدى ءوشىرىپ، الەۋمەتتىك جەلىلەردەن شىعىپ، دوستارىممەن دە ارالاسپاي، جىگىتىممەن دە ايىرىلىسىپ كەتتىم. «ءبارى جاقسى بولادى» دەپ ايتقان ادامدارعا جىنىم كەلەتىن. ەشتەڭە ەستىگىم كەلگەن جوق. ءوز قايعىمدى ءوزىم كوتەردىم.

وتباسىمنىڭ ەمدەلۋگە جۇمسايتىن قاراجاتى بولعان جوق، سول سەبەپتى كوپتەگەن قورلاردىڭ كومەگىمەن ەمىمدى تولەپ بەرەتىن دەمەۋشى تابىلدى. ول مەنى يزرايلدەگى اۋرۋحاناعا جىبەردى.

يزرايلدە بولعاندا دا ءوزىمدى ناشار سەزىندىم: السىزدىكتى سەزىنىپ ءجۇردىم،  دەنەمنىڭ بارلىق بولىگىنە، ءتىپتى اۋىز قۋىسىما دەيىن كوگەرگەن ىزدەر شىعا باستادى. ءار ءتورت ساعات سايىن مۇرنىنمنان قان توقتاماي اعاتىن. 

ءتورت ايدان كەيىن دونوردىڭ تابىلعانىن حابارلادى. وپەراسيانى باستاۋ ءۇشىن حيمياتەراپيا جۇرگىزۋ كەرەك بولدى. الايدا، ول ءۇشىن ەڭ ءبىرىنشى مەنىڭ يممۋندىق جۇيەمدى بىلايشا ايتقاندا «ءولتىرۋ» كەرەك ەدى. دارىگەرلەر حيمياتەراپيانىڭ  الدىندا انالىق جاسۋشالارىما وتا جاسالۋ كەرەك ەكەنىن ايتتى. بۇل مەنىڭ بولاشاقتا بالالى بولۋىما قانداي دا ءبىر قيىندىقتار تۋماۋ ءۇشىن جاسالاتىن شارا ەدى. الايدا، ەكپەلەر سالۋ كەزىندى ورەسكەل قاتە كەتىپ، وتا ءساتسىز جاسالدى. دارىگەرلەر ەندى ەشقاسشان بالالى بولا المايتىنىمدى ايتتى. ءوزىمنىڭ ەشقاشان انا باقىتىن سەزىنە المايتىنىمدى بىلگەن كەزدە قاتتى قايعىرىپ، جىلادىم..

ۇلكەن دوزاداعى حيمياتەراپيانى ادامنىڭ اعزاسى دونورلىق جاڭا مۇشەگە قارسىلىق تانىتپاس ءۇشىن جاسايدى. 18 جاستا بولسام دا، مەنىڭ اعزام مەن مۇشەلەرىم 80 جاستاعى ادامدىكىندەي قارتايىپ كەتكەن ەدى.

«حيميا» بىتكەننەن كەيىن ەكى ساعات ىشىندە گەرمانيادان كەلگەن دونوردىڭ «سۇيەك كەمىگىن» الىپ  وتا جاساۋ كەرەك بولدى. دارىگەرلەر قانىمدى تازارتىپ، قايتا قۇيدى. وپەراسيا كەزىندە قىسىمىم كوتەرىلىپ 240-قا  دەيىن جەتتى. كوزىم كورمەي، سويلەي الماي، ءتىپتى قيمىلداي الماي قالدىم.

مەن ءۇشىن ەڭ قيىنى- وكپەمنىڭ ءىسىپ كەتۋى بولدى. وكپەم 97 پايىز قانعا تولىپ كەتتى. وتىرسام دا، تۇرسام دا اۋزىمان قان قۇيىلاتىن دارەجەگە جەتتى. تىنىسىم تارىلىپ، بارعان سايىن دەمالىسىم قىسقارا بەردى. سول ءتۇنى سەگىز دارىگەر قاسىما كەلىپ مەنىڭ ولەتىن ۋاقىتىمدى بەلگىلەۋ ءۇشىن كەلىپ كۇتىپ ءجۇردى. ولار مەنىڭ اناما: «تۋىستارىڭىزعا حابارلاسىپ، قوشتاسا بەرىڭىز»-، دەدى. اناما مەنى جىبەرۋىن، مەنىمەن قوشتاسۋىن ءوتىندىم.

ىشىمنەن "مەن نەبارى 18-دەمىن. ولگىم كەلمەيدى" دەپ ويلادىم، قۇدايعا دۇعا ەتتىم. قاسىمداعى دارىگەر وتتەك ماسكاسىن اۋزىما سالىپ، جىلاپ تۇرىپ: «تىنىس ال!» دەپ ايقايلاپ جىبەردى. ونىڭ كوز جاسى بەتىمە توگىلىپ جاتىپ، ۇيىقتاپ كەتىپپىن.

ەرتەسىندە ماماندار وكپەمنىڭ  تازارعانىن، ازداپ تاماق ىشە باستادىم. الايدا بۇدان كەيىنگى ءومىرىم دە وڭاي بولعان جوق. اياق-قولىم جۇرمەي، توسەكتە جاتا بەرەتىنمىن. ءوز كۇشىممەن تاماقتانا دا، ءتىسىمدى دە جۋا المايتىنمىن. كىشكەنە ءسابي سياقتى ءجۇرۋدى، قادام باسۋدى جاڭادان ۇيرەندىم.

مەنىڭ ءومىرىمدى  پەرىشتەلەر ساقتاپ قالدى دەپ ويلايمىن. بارلىعى ءتورت رەت «ءولىپ-تىرىلدىم». ءقازىر جاعدايىم جامان ەمەس. مەنىڭشە قۇداي ماعان سىناق جىبەردى. بۇل جاعدايعا دەيىن مەن تىم ءوزىمشىل، وز-وزىمە سەنىمدى، تاككاپپار قىز بولاتىنمىن. كورىكتى، اقىلدى، سپورتتىڭ دا ۇزدىگى ەدىم. وسى تاككاپارلىعىم ءۇشىن جازالاندىم.

شىنىمدى ايتسام، ءوزىمدى ءوز جاسىمنان 20 جاسقا ۇلكەن سەزىنەمىن. وسىنىڭ بارلىعى ءبىر ءوزىمنىڭ باسىمنان وتكەنىنە سەنۋ قيىن. انام قالاي قينالعانىن بىلسەڭىزدەر عوي...