الماتىنىڭ المالى اۋداندىق سوتىندا مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ بۇرىنعى ديرەكتورى ەرلان بىلالگە ۇكىم شىقتى، دەپ جازادى Qamshy.kz اقپارات اگەنتتىگى.

سۋديا قۋانىش ءارىپوۆ ەرلان ءبىلالدى قىلمىستىق كودەكستىڭ 24-بابىنىڭ ءۇشىنشى تارماعى (قىلمىسقا دايىندالۋ جانە قىلمىسقا وقتالۋ) جانە 366-بابىنىڭ ەكىنشى تارماعى (پارا الۋ) بويىنشا ايىپتى دەپ تانىپ، 52،5 ميلليون تەڭگە ايىپپۇل سالدى. ايىپپۇلدى ءبىر اي ىشىندە تولەمەسە، ءۇش جىلدان جەتى جىلعا دەيىن تۇرمەگە وتىرۋى مۇمكىن ەكەنىن ەسكەرتتى. سونىمەن قوسا مەملەكەتتىك قىزمەتپەن اينالىسۋ قۇقىعىنان ايىرىلدى.

قۋانىش ءارىپوۆ «قازاقستاننىڭ ەڭبەك سىڭىرگەن قايراتكەرى»، «قۇرمەت» وردەنىنەن ايىرۋ تۋرالى ۇسىنىس جاسادى.

ەستەرىڭىزگە سالساق، ەرلان ءبىلال 5 قاڭتاردا ۇستالعان ەدى.  8 قاڭتاردا زيالى قاۋىم وكىلدەرى ەرلان ءبىلالدى قورعاپ، ءسوز سويلەدى. 16 قاڭتاردا اكتەردىڭ 1 205 000 تەڭگە كولەمىندە كەپىلگە اقشا تولەگەنى بەلگىلى بولدى. 25 قاڭتاردا الماتىداعى المالى اۋداندىق سوتىندا ەرلان ءبىلالدىڭ سوتى باستالدى. 

سوتتاعى سوڭعى سوزىندە ەرلان ءبىلال ءوز كىناسىن مويىنداپ، جاساعان ىسىنە وكىنەتىنىن ايتقان. ءارتىس سۋديادان دەنساۋلىعى مەن وتباسىلىق جاعدايىن ەسكەرۋدى ءوتىندى. باس بوستاندىعىنان ايىرماۋدى، مۇمكىندىگىنشە ايىپپۇل سوماسىن تومەندەتۋدى سۇرادى.