18 ناۋرىزدا وتەتىن پرەزيدەنت سايلاۋىندا رەسەي حالقى ءوز تاڭداۋىن جاسايدى. الەۋمەتتىك-ەكونوميكالىق، ساياسي شەشىمدەر قابىلداپ، رەفورما جۇرگىزۋگە 4 جىل از بولعاندىقتان، بيىل پرەزيدەنت 6 جىلعا سايلانادى. Qamshy.kz اقپارات اگەنتتىگى رەسەي پرەزيدەنتتىگىنە ۇمىتكەرلەر ءتىزىمىن وقىرمان نازارىنا ۇسىنادى.

ۆلاديمير پۋتين

ۆلاديمير پۋتين ولە-ولگەنشە پرەزيدەنت بولىعىسى كەلەتىن سياقتى. ول بۇعان دەيىن ءۇش رەت سايلاۋدا جەڭىسكە جەتتى. ءبىر رەت ءوز ورىنتاعىن دميتريي مەدۆەديەۆكە بەرگەنىمەن، ونىڭ كوزباياۋشىلىق ەكەنىن، شىن مانىندە بار بيلىك ءپۋتيننىڭ قولىندا تۇرعانىن جۇرت ءبىلدى. پرەزيدەنتتىكپەن ۋاقىتشا قوشتاسقان پۋتين سول ارالىقتا مەدۆەديەۆكە جول كورسەتىپ، باعىت-باعدار سىلتەپ وتىردى. ساراپشىلار الداعى سايلاۋدا دا ءپۋتيننىڭ وزاتىنىنا سەنىمدى.

كسەنيا سوبچاك

كسەنيا سوبچاك اتاقتى. الايدا اسا بەدەلدى تۇلعا ەمەس. ۆلاديمير ءپۋتيننىڭ بۇرىنعى باسشىسى، سانكت-پەتەربۋرگ گۋبەرناتورى بولعان اناتوليي سوبچاكتىڭ تۋعان قىزى. كسەنيا بۇدان بۇرىن پۋتينمەن اكەسى تۋرالى تۇسىرىلەتىن فيلمگە بايلانىستى كەزدەسىپ، ءوزىن پرەزيدەنتىككە ۇسىناتىنىن مالىمدەگەن ەكەن. سوبچاكتىڭ ايتۋىنشا، پۋتين مۇنىسىن ونشا ۇناتا قويماعان. كەيبىر رەسەيلىك ب ا ق: «كسەنيا سوبچاكتىڭ ۇمىتكەر رەتىندە ۇسىنىلۋى – حالىق نازارىن وپپوزيسيونەر الەكسەي ناۆالنىيدان اۋدارۋ ءۇشىن ادەيى ويلاپ تابىلعان امال»، – دەيدى.

ال الەكسەي ناۆالنىي – بىرنەشە رەت تانىمال شەنەۋنىكتەردى سىبايلاس جەمقورلىققا قاتىسى بار دەپ ايىپتاعان وپپوزيسيونەر. ول بۇرىن سوتتالعانى ءۇشىن سايلاۋعا قاتىسا المادى.
كسەنيا سوبچاك ايەل بولسا دا، وزگە كانديداتتاردان گورى باتىل پىكىرلەر ءبىلدىرىپ، ءوز ويىن اشىق ايتادى. وسىعان دەيىن ول شەشەنستان باسشىسى رامزان قادىروۆ پەن ورىس پروۆاسلاۆ شىركەۋىن قاتتى سىناعان.

سەرگەي بابۋرين

90-جىلدارى ساياساتكەر رەتىندە تانىمال بولعان. قازىرگى ۋاقىتتا بۇرىنعىداي اتاقتى ەمەس. كەزىندە كەڭەستىك رەسەي فەدەراسيالىق سوسياليستىك رەسپۋبليكاسى جوعارعى كەڭەسىنىڭ جانە مەملەكەتتىك دۋمانىڭ دەپۋتاتى جانە دۋمانىڭ ۆيسە-سپيكەرى بولىپ قىزمەت اتقارعان. كەيىنگى ۋاقىتتا ەشقانداي قىزمەتكە تاعايىندالمادى.

سەرگەي بابۋرين – «رەسەي جالپىحالىقتىق وداعى» پارتياسىڭ نەگىزىن سالۋشى. اتالمىش پارتيا وكىلدەرى سەرگەي ءبابۋريندى پرەزيدەنتتىككە ۇمىتكەر رەتىندە ۇسىنىپ وتىر.

ۆلاديمير جيرينوۆسكيي

قازاقستاندا تۇرىپ، «سۋ ىشكەن قۇدىعىنا تۇكىرگەن» ۆلاديمير جيرينوۆسكيي بيىل التىنشى رەت سايلاۋعا قاتىستى. ارزان اتاق پەن قارا پيارعا قۇمار جيرينوۆسكيي بۇعان دەيىنگى سايلاۋدا، ءتىپتى، 2-ورىنعا دا يە بولا المادى. ول 2004 جىلى سايلاۋ كەزىندە ءوزىنىڭ ورنىنا كۇزەتشىسى ولەگ مالىشكيندى قويىپ، سايلاۋعا قاتىسۋدان باس تارتتى. قانشا رەت جەڭىلىسكە ۇشىراسا دا، سايلاۋعا قاتىسۋدان شارشاعان ەمەس.

گريگوريي ياۆلينسكيي

گريگوريي ياۆلينسكيي 90-جىلدارى «الما» («يابلوكو») پارتياسىنىڭ باسشىسى رەتىندە تانىلعان. وسىعان دەيىن ەكى رەت، 1996 جانە 2000 جىلى وتكەن سايلاۋعا قاتىسىپ، جولى بولمادى. ءۇشىنشى رەت 1 ميلليون قول جيناي الماعاندىقتان، سايلاۋعا قاتىستىرىلمادى.

پاۆەل گرۋدينين

اياق استىنان كانديداتتىققا ۇسىنىلعان كەڭشار ديرەكتورى ءستاليندى جانە قۇلپىنايدى جاقسى كورەدى. كوپشىلىكتىڭ ويى تۇگىل تۇسىنە كىرمەگەن پرەزيدەنت تاعىنا ۇمىتكەر پاۆەل گرۋدينين جەلتوقساننىڭ سوڭىنا دەيىن ءوزىنىڭ ونداي جوسپارى تۋرالى ايتپاعان.

لەنين اتىنداعى كەڭشار ديرەكتورى رەسەيدەگى ەڭ تانىمال قۇلپىناي ءوندىرۋشىنىڭ ءبىرى رەتىندە بەلگىلى. وسى ۋاقىتقا دەيىن كوممۋنيستەر ارالاسپاعان گرۋدينين 2000 جىلى ءپۋتيننىڭ سەنىمدى وكىلى، 2010 جىلعا دەيىن «ءبىرتۇتاس رەسەي» پارتياسىنىڭ قۇرامىندا بولدى.

شەتەلدىك ب ا ق دەرەگىنە سەنسەك، پاۆەل گرۋديننىڭ شەتەلدەگى شوتىندا مول قاراجاتى بار. ول ءوزى باسقارعان شارۋاشىلىقتىڭ جەر تەلىمىن زاڭسىز ساتقان. گرۋديننىڭ پىكىرىنشە، ستالين – سوڭعى 100 جىلداعى ەڭ ۇزدىك باسشى.

ماكسيم سۋرايكين

رەسەي فەدەراسياسى كوممۋنيستتىك پارتياسىنىڭ بىردەن-بىر تانىمال مۇشەسى. العاشىندا رف كومۋننيستتىك پارتياسىنىڭ مۇشەسى بولعان ماكسيم سۋرايكين كەيىن ءوز ۇيىمىن قۇرا باستايدى. ول 2010 جىلى «رەسەي كوممۋنيستتەرى» ۇيىمىن باسقارادى. 2012 جىلى پارتيا مۇشەلەرىنىڭ سانىن 500-دەن اسىرعاننان كەيىن پارتيا رەتىندە تىركەپ، ءوزى سول پارتيانىڭ كوسەمى بولىپ سايلاندى.

2013 جىلى ماسكەۋ مەرىنىڭ سايلاۋىندا كانديدات رەتىندە باعىن سىناپ كورمەك بولدى. الايدا قۇجاتتارىن ۋاقىتىندا تاپسىرماعاندىقتان، سايلاۋعا قاتىسا المادى.

بوريس تيتوۆ

2012 جىلعا دەيىن جەكە كاسىپكەرلەردىڭ قۇقىعى جونىندەگى ۋاكىلەتتى وكىلى بولىپ قىزمەت اتقارعان. بىلتىر جازدا سايلاۋعا قاتىسپايتىنىن ايتقان بوريس تيتوۆ جەلتوقسان ايىندا ول ويىنان اينىپ قالدى. تيتوۆتىڭ وتباسى «ابراۋ-ديۋرسو» اتتى اققاينار (شامپان) زاۋىتىنا يەلىك ەتەدى، بوريس تيتوۆتىڭ ءوزى زاۋىتتىڭ ديرەكتورلار كەڭەسىن باسقارعان.

بوريس تيتوۆ بۇرىن-سوڭدى سايلاۋعا قاتىسپاعان.