مەن ادەبيەتكە كەلىپ جاتقان جاستاردى ايايمىن. ويتكەنى ولاردىڭ ۇلگى-ونەگە الاتىن، جول كورسەتەتىن، نەنى وقۋ كەرەك ەكەنىن ۇيرەتەتىن رۋحاني ۇستازدارى جوق. ءبىزدىڭ قوعامدا شاكىرت تاربيەلەۋ ءۇردىسى جويىلىپ كەتتى. بۇگىنگى اقىن-جازۋشىلارىمىزدىڭ كوبىسى، اسىرەسە، الەم ادەبيەتىن جالپىلاما وقىعان. مىناۋ بىلەدى دەپ، كوككە كوتەرىپ جۇرگەن جاستارىمىزدىڭ كوپشىلىگى - ينتەرنەتتەن بىردەڭەنى شالا-پۇلا شولىپ، بىلگىشسىنىپ جۇرگەن «دانىشپاندار». ۇلى ادەبيەتتىڭ نە ەكەنىن بىلمەگەندىكتەن تاريحتى نەمەسە ءدىندى ادەبيەتتىڭ «پرەدمەتىنە» اينالدىرعىسى كەلىپ، ونەردىڭ جولىنان اداسىپ، وزگەلەردى دە شاتاستىرىپ، جالعان ونەر جاساپ جۇرگەن اقىن-جازۋشىلارىمىز قانشاما. تاريحي تۇلعالاردى جاپپاي ماقتاۋدى كوركەم شىعارماشىلىققا اينالدىرۋدىڭ كوزدەگەن ماقساتىن تۇسىنە الماي-اق قويدىم. سىزدەر ۇقساڭىزدار، ءتۇسىندىرىپ بەرىڭىزدەرشى، ماعان. ەڭ بولماعاندا ءبىر ۋاقىت ەۋروپا ادەبيەتىنە نازار سالىپ، تاريحي جانردىڭ نە سەبەپتەن تىعىرىققا تىرەلگەنىنىڭ سەبەبىن تارازىلاساق تا كوپ نارسەنى تۇسىنەر ەدىك-اۋ. ايتپەسە، شەكسپير نەمەسە گيۋگولاردىڭ تاريحي تۇلعالاردى اسىرا دارىپتەپ دراما نەمەسە رومان جازۋعا وي-ورەسى جەتپەدى دەپ ويلايسىز با؟ ءبىزدىڭ بۇگىنگى ادەبيەتىمىزدىڭ بەت العان باعىتى «بىلمە جانە بىلگەننىڭ ءتىلىن الما» بولىپ بارا جاتقان جوق پا وسى. تاياۋدا وتە تالانتتى سىنشى اعام تۇرسىنجان شاپايمەن اڭگىمەلەسكەنىمدە ول ماعان «ءوزىن-وزى جارنامالاۋ ءبىزدىڭ ۇلتتىق يدەيامىزعا اينالدى» دەگەن بولاتىن. شىنىندا دا ءبىز ءوزىمىزدى تىم كەرەمەت اۋليە سانايتىن اۋرۋعا شالدىعىپ قالعان جوقپىز با، وسى.

(امانگەلدى مىرزابەكتىڭ فەيسبۋكتەگى پاراقشاسىنان)