ءبىزدىڭ ەلىمىزدە وتاندىق ەسترادا ساحناسىندا ونەرمەن عانا ەمەس، جەكە كاسىپكەرلىكپەن دە اينالىسىپ ءناپاقاسىن تاۋىپ جۇرگەن جۇلدىزدار بارشىلىق. ءبىراق «كوزدەن، نە سوزدەن» قورىققان ونەر ادامدارى ءوزىنىڭ جەكە بيزنەستەرى تۋرالى اشىلىپ ايتا قويمايدى. «ۇزىنقۇلاقتان ەستىگەنىم بار ەدى، بيزنەسىڭىز قالاي بولىپ جاتىر؟» دەپ سۇراي قالساڭىز، «وزىمدىكى ەمەس، اعامدىكى، كۇيەۋىمدىكى، كورشىمدىكى» دەپ ات تونىن الا قاشىپ، ماڭىنا جولاتپايتىن انشىلەر دە جوق ەمەس. دەگەنمەن ولاردىڭ كەيبىرى «بەيرەسمي دۇنيە ەدى» دەپ بار ەكەنىن جاسىرماسا دا، ب ا ق كوزدەرىنە تاراپ كەتپەۋىن وتىنەدى. «مەنىكى بيزنەس ەمەس، اشەيىن ۇساق-تۇيەك دۇنيە» دەپ «سىپايىلىق» تانىتاتىندار دا بار. ءبىز بۇگىن ونەردەن بولەك كاسىبى تۋرالى اشىپ ايتا العان انشىلەر جايلى ءسوز قوزعاماقپىز.
ونەردە دە ومىردە دە جۇپتارى جاراسقان قۇرالاي مەن ميراس مۋزىكانىڭ قوس بىردەي جانرى: كلاسسيكا مەن ەسترادالىق اندەردى ناقىشىنا كەلتىرىپ ورىندايتىنى بەلگىلى. وتكەن جىلدىڭ كوكتەمىندە قوس ءانشى «ميراس-قۇرالاي» اتتى ءان ورتالىعىن اشىپ، جەكە سايتتارىن دا ىسكە قوسقان بولاتىن. بۇگىنگى تاڭدا ميراس پەن قۇرالايدىڭ قوسىمشا تابىس كوزىنىڭ ءبىرى - حالال حاۋىز.
- حالىق اراسىندا «حاۋىز – جىن-ويناق جايلاعان جەر» دەگەن پىكىر قالىپتاسقانى بەلگىلى. ءبىزدىڭ تۇسىنىگىمىزشە، ونىڭ ىشىندە اراق تا ىشىلەدى، تەمەكى دە تارتىلادى. مىنە، سونداي بولماسىن دەپ، ءبىز حاۋىزدى حالال ستاندارتى بويىنشا ىسكە قوستىق. ونىڭ ءىشى قاشاندا تازا، كەلۋشىلەرگە بارلىق قولايلى جاعداي جاسالعان، - دەيدى ميراس قايىربەك ۇلى.
ەستراداداعى تانىمال جۇلدىز سيۆي ماحمۋديءدىڭ ءبىر باسىندا تالاي ونەر بار. ول - ءانشى، اكتريسا، «ايالا» توبىنىڭ پروديۋسەرى. 2006 جىلى گولليۆۋدتا، لوس-اندجەلەستە الەمدىك بايقاۋعا قاتىسىپ، مودەلدىك ونەردەن دە تاجىريبە جيناقتاعان. بۇگىنگى تاڭدا سيۆي - اياۋلى جار، اسىل انا. ءيا، ءسيۆيدىڭ شەكەسى تورسىقتاي ەكى ۇلى بار. قاشاندا ونەرىمەن، نازىكتىگىمەن ەرەكشەلەنىپ تۇراتىن ءانشى، ەندى تانىمال بيزنەس-لەدي. توي كويلەكتەر، سالتاناتتى كەش كويلەكتەرى مەن كۇندەلىكتى كويلەكتەر جانە ءارتۇرلى اشەكەي بۇيىمدار ساتىلاتىن قوس قاباتتى دۇكەننىڭ يەسى.
- 15-16 جاسىمنان باستاپ، بيزنەسپەن اينالىسىپ، ونىڭ قىر-سىرىن ابدەن مەڭگەردىم دەسەم بولادى. ءقازىر بالالارىممەن وتىرعاندىقتان تابىسىمنىڭ قوماقتى بولىگى سول دۇكەننەن تۇسەدى، - دەپ اعىنان جارىلدى سيۆي حانىم.
MuzLife تەلەارناسىنىڭ باسشىسى، ەلگە تانىمال ەريك تاستامبەكوۆ وتكەن جىلدىڭ جەلتوقسان ايىندا بايان ەسەنتايەۆامەن بىرىگە وتىرىپ، «كوفەينيا» اشقان بولاتىن. ءسويتىپ 1999 جىلدان بەرى شوۋ-بيزنەسپەن ءجىتى اينالىسىپ جۇرگەن پروديۋسەر ءوزىن بيزنەسمەندەردىڭ قاتارىنا ءبىر-اق قوستى.
- بايان حانىم ەكەۋمىز ءتۇرلى كوفەينيالاردا جۇزدەسىپ، اڭگىمەلەسىپ، بولاشاققا جوسپارلار جاسايتىن «ادەتىمىز» بار ەدى. سوڭعى ەكى-ۇش جىلدا سونداي وتىرىستارعا قوماقتى قاراجات جۇمسالىپتى. سودان ەكەۋمىز اقىلداسا كەلە، ءوزىمىزدىڭ «كوفەينيامىزدى» اشايىق دەگەن يدەيا كەلدى، - دەيدى ەريك مىرزا.
ءبىراق، بيزنەستەن تۇسكەن تابىستى قالاي ءبولىپ الاتىندارىن ايتپاي، «كوممەرسيالىق قۇپيا» دەپ ساۋالدان وڭاي جالتارىپ كەتتى.
ارينە، «قوس كەمەنى قاتار ۇستاۋ» وڭاي شارۋا ەمەس. قازىرگى تاڭدا ەل اراسىندا «چيپ-چيپ» دەپ اتالىپ كەتكەن اسحات تارعىنوۆ الماتىعا كوشپەي تۇرعاندا، ماشينالاردى الىپ-ساتۋمەن اينالىسقان ەكەن. ءبىراق، انشىگە سۇرانىس وسكەننەن كەيىن، الماتىعا كوشىپ، بيزنەسىن دە دوعارىپ تاستاعان.
شاعىن بولسا دا، جەكە كاسىبى بار جىگىتتەردىڭ تاعى ءبىرى - «جىگىتتەر» توبىنىڭ ءسوليسى باعلان ءابدىرايىموۆ. ول ءوزىنىڭ ەر مىنەزىنە ساي، ناعىز ەرگە ءتان بيزنەسپەن اينالىسادى. «تۇلپار ەردىڭ – قاناتى» دەگەن سەنىممەن جۇرەتىن قازاقتار، استىنداعى اتتارىن «تەمىر تۇلپارعا» ايىرباستاعالى قاي زامان! سول «تۇلپارعا» جاڭا دوڭگەلەك العىڭىز كەلسە، باعلان مىرزاعا جولىققانىڭىز دۇرىس. - مەن ءوزىمنىڭ بيزنەسىمدى جاڭا ارناعا بۇرماق نيەتتەمىن. ەگەر بۇرىن دوڭگەلىكتەردى كورشى قىتايدان الدىرتقان بولسام، ەندى جاپوننىڭ برەند دوڭگەلىكتەرىنە كوشىپ جاتىرمىن، - دەپ ول ءوزىنىڭ ينستاگرامم پاراقشاسىن كەيدە كاسىبىنىڭ جارناماسى رەتىندە دە پايدالاناتىنىن جاسىرمادى.
ق ر ەڭبەك سىڭىرگەن مادەنيەت قايراتكەرى، ءانشى ەرلان كوكەيەۆءتىڭ بيزنەسپەن اينالىسىپ جۇرگەنىنە 6 جىل بولىپتى. ءدال سول جىلدارى ەلباسىنىڭ تاپسىرماسىمەن شاعىن جانە ورتا بيزنەسكە قولداۋ كورسەتىلىپ جاتقان ەدى. سونى ءتيىمدى پايدالانعان كوكەيەۆ مىرزا الماتىدا ءوزىنىڭ كلۋبىن اشقان. ال بۇدان ءبىر جىل بۇرىن استاناعا قونىس اۋدارىپ، كاسىبىن دە، ياعني، كلۋبىن ەلورداعا كوشىرىپ الىپتى.
- مەنىڭ ويىمشا، ونەر ادامدارىن تابىسقا جەتەلەيتىن – مۋزا. ال بيزنەسپەن اينالىسۋ - تەك ماتەريالدىق دۇنيە. اينالىسۋ كەرەك تە شىعار، سەبەبى ءبىز ماتەريالدىق عالامدا ءومىر ءسۇرىپ جاتىرمىز، - دەگەن ەرلان مىرزا ءوزىنىڭ كاسىپكەرلىك بەلسەندىلىگىن ەشقاشان جاسىرمايتىنىن العا تارتتى.
- بيزنەسى بار، ءبىراق ونى جاسىرىپ، ايتپايتىن ارىپتەستەرىمە قانداي دا ءبىر سىن جاساۋدان اۋلاقپىن. ءبىراق، ءوزىمنىڭ كاسىبىم تۋرالى بۇكپەسىز ايتىپ جۇرەمىن. سەبەبى، ونى جاسىرۋدان ماعان كەلەر پايدا جوق. كەرىسىنشە، مەن قاشاندا جارناماعا دايىنمىن، - دەيدى ول.
اۆتوكولىككە قاتىستى بيزنەسپەن اينالىسىپ جۇرگەن بۇركىت تە بۇگىن كوكتوبەدە ءۇي سالۋىنا بايلانىستى ءوزىنىڭ كاسىبىن ساتىپ جىبەرگەنىن ايتادى. دەسەك تە، ۋاقىتتىڭ تىعىزدىعىنا بايلانىستى، ونەرلى جۇپ تەك شىعارماشىلىققا كوبىرەك كوڭىل بولەمىن شەشىپتى.
مىنە، قازاق ەستراداسىنداعى ءان ورىنداۋمەن قاتار الىپ جۇرگەن كاسىبى بار جاندار تۋرالى ايتارىمىز ازىرشە وسى بولدى. قالاي دەسەك تە، كۇندەلىكتى تويعا كىرىپ-شىعۋى بار، كونسەرتتەر، ودان قالدى گاسترول، ءان جازدىرۋ، بەينەبايان ءتۇسىرۋ سياقتى كوپتەگەن ىستەرمەن اينالىسىپ ءجۇرىپ، بيزنەستىڭ دە تىزگىنىن ۇستاعان ونەر ادامدارىنىڭ وتە ەڭبەكقور ەكەنىنە كۇمان جوق.
كلارا ەرماعامبەتوۆا
Baq.kz
