ۇلى ابايدىڭ 170 جىلدىق مەرەيتويىنا وراي، شىعىس قازاقستاندا جازعا سالىم ابايدىڭ ءومىرى مەن شىعارماشىلىعىمەن بايلانىستى تاريحي  ورىنداردى ارالايتىن «ابايمەن وتكەن كۇندەر» تۋريستىك باعدارى  اشىلادى، دەپ حابارلايدى شقو اقپاراتتىق ورتالىعى.

ۇلى ابايدىڭ 170 جىلدىعىن شىعىس جۇرتشىلىعى وبلىس كولەمىندە كەڭ اۋقىمدا اتاپ ءوتۋدى جوسپارلاپ وتىر. تارقاتا ايتقاندا، نەگىزگى ءىس-شارالار حاكىمنىڭ تۋعان جەرى جيدەبايدا ۇيىمداستىرىلىپ، وبلىستىڭ بارلىق مادەني مەكەمەلەرى مەن ءبىلىم وردالارىندا ۇلى اقىندى ۇلىقتاۋ شارالارى وتكىزىلەدى. اقىننىڭ مەرەيتويىن اتاپ وتۋگە ايماقتىڭ بيزنەس جانە كوممەرسيالىق ەمەس ۇيىمدارى، قوعامدىق بىرلەستىكتەر، كورنەكتى ونەر جانە مادەنيەت قايراتكەرلەرى، وبلىس تۇرعىندارى جۇمىلدىرىلماق.

مەرەيتوي قارساڭىندا اباي اۋدانىنداعى جيدەباي اۋىلى، «اباي-شاكارىم» مەموريالدىق كەشەنى، ابايدىڭ جيدەبايداعى ءمۇراجاي-ۇيى تۋريستەردىڭ كوپتەپ كەلەتىن ورىنىنا اينالاتىندىقتان، شقو اكىمدىگى تۋريستەرگە قولايلى جاعداي جاساپ، وڭىرلىك ءتۋريزمدى دامىتۋعا دەن قويىپ وتىر. اباي اۋدانىنا جۇمىس ساپارى بارىسىندا وبلىس اكىمى دانيال احمەتوۆ ءمۇراجاي-ۇيىنىڭ جانىنداعى قۇرىلىسى اياقتالماعان نىساندى جىل بويى جۇمىس ىستەيتىن قىسقى تيپتەگى قوناق ءۇي تۇرىندە سالۋ ءۇشىن مەملەكەت تاراپىنان قارجى بولىنەتىنىن مالىمدەگەن بولاتىن. سونداي-اق، اعىمداعى جىلى جازدا ابايدىڭ ءومىرى مەن شىعارماشىلىعىمەن بايلانىستى تاريحي  ورىنداردى ارالايتىن «ابايمەن وتكەن كۇندەر» تۋريستىك باعدارى جۇمىس جۇرگىزبەك.

سونىمەن قاتار، ۇلى اقىننىڭ مەرەيتويىنا وراي، وڭىردە  كورنەكتى مەسەنات مەدعات قۇلجانوۆتىڭ قولداۋىمەن اتاقتى اعىلشىن كومپوزيتورى كارل دجەنكينس جازعان «اباي-شاكارىم» وراتورياسىمەن شقو اكىمىنىڭ سيمفونيالىق وركەسترى ارتىستەرى، ارالاس حور مەن فولكلورلىق توبىنىڭ كونسەرتى، بۇكىلالەمدىك پوەزيا كۇنى (21 ناۋرىز) «اباي پوەزياسى» الەم تىلدەرىندە» فەستيۆالى، جيدەبايدا رەسپۋبليكالىق اقىندار ايتىسى، قارا سوزدەر بويىنشا مونوسپەكتاكلدەر، اباي شىعارمالارى بويىنشا كونسەرتتىك باعدارلامالار وتكىزىلەدى. وسكەمەن مەن سەمەي قالالارىندا «ءبىزدىڭ اباي» ەلەكتروندىق كىتاپحاناسىنىڭ تۇساۋى كەسىلەدى. اتالمىش سايتقا «اباي وقىعان كىتاپتار» سيرەك قورىنىڭ ۆيرتۋالدى كورمەسىنىڭ كىتاپتارى ەنەدى.