استانادا «ابۋ دابي پلازا» جۇمىسشىلارىن ەڭبەككە ورنالاستىرۋ بويىنشا كەشەندى جوسپار ازىرلەنىپ جاتىر، دەپ حابارلايدى Qamshy.kz اقپارات اگەنتتىگى استانا اكىمدىگى سايتى دەرەگىن نەگىزگە الا وتىرىپ.
ەستەرىڭىزگە سالا كەتسەك، 2018 جىلدىڭ 5 اقپانىندا استانا قالالىق "نۇر وتان" پارتياسىنىڭ فيليالىنا "ابۋ دابي پلازا" نىسانى قۇرىلىسىنىڭ مەردىگەرلىك مەكەمەسىنىڭ 62 جۇمىسشىسى كەلىپ شاعىمداندى. قۇرىلىسشىلاردىڭ شاعىمدانۋىنا "World Monitoring" ج ش س، "ەكسپو ستروي" ج ش س، "كازاحستان ستروي تەحنو" ج ش س، "كازينجينيرينگ پروۆايدەر" ج ش س مەردىگەر مەكەمەلەرىمەن ەڭبەك كەلىسىمشارتىنىڭ مەرزىمى بىتۋىنە بايلانىستى كەلىسىمدى بۇزۋى سەبەپ بولعان.
قالا اكىمى ءا. يسەكەشيەۆ استانا قالالىق "نۇر وتان" پارتياسى فيليالى ءتوراعاسىنىڭ ءبىرىنشى ورىنباسارى ب. ساپاروۆتىڭ توراعالىعىمەن قۇرامىندا "استانا قالاسى ەڭبەك، جۇمىسپەن قامتۋ جانە الەۋمەتتىك قورعاۋ" مم، "استانا قالاسى ىشكى ساياسات باسقارماسى" مم، پروكۋراتۋرا جانە استانا قالالىق ءىىد، "اتامەكەن" ۇكپ، استانا قالاسى كاسىپوداق ورتالىعى مەن قوعامداستىق بار جۇمىس توبىن قۇردى.
8 اقپان كۇنى جۇمىس توبىمەن استانا قالالىق "نۇر وتان" پارتياسى فيليالىندا مەردىگەر مەكەمەنىڭ وكىلدەرىمەن جانە نىساننىڭ بۇرىنعى جۇمىسشىلارىمەن كەزدەسۋ وتكىزىلىپ، مەردىگەر مەكەمەلەردىڭ قىزمەتكەرلەر الدىندا الەۋمەتتىك جاۋاپكەرشىلىك پەن قۇقىقتىق قارىم قاتىناسى تالقىلاندى. كەزدەسۋدىڭ ناتيجەسىندە 4 مەردىگەر مەكەمە اتقارىلعان جۇمىستاردىڭ سپەسيفيكالىق كۇردەلىلىگى بارىن، سونداي-اق اۋىر جۇمىس كەستەسىن ەسكەرىپ، بۇرىنعى قىزمەتكەرلەرگە اقشالاي سىياقى بەرۋدى شەشتى. كەزدەسۋ بارىسىندا قۇرىلىسشىلارعا ق ر ەڭبەك كودەكسىنە سايكەس قۇقىقتارىن ءتۇسىندىردى جانە كەلەسى جولى جۇمىسقا ورنالاسار كەزدە ولاردىڭ استانالىق جۇمىسپەن قامتۋ ورتالىعىنا كەلىپ، ءوزىنىڭ زاڭدى مۇددەسىن ساقتاۋ ماقساتىندا ەڭبەك كەلىسىم شارتىن بەكىتەردە تەگىن زاڭ كەڭەسىن الۋعا بولاتىنىن ايتتى.
ودان باسقا جۇمىسشىلاردى ەڭبەككە ورنالاستىرۋ ماقساتىندا 10 اقپاندا استانا قالالىق "نۇر وتان" پارتياسىنىڭ فيليالىندا استاناداعى قۇرىلىس كومپانيالارىنىڭ باسشىلارىن شاقىرىپ، بوس ورىندارعا جارمەڭكە وتكىزدى. جارمەڭكە ناتيجەسىندە بوس ورىنعا 51 ادام جۇمىس بەرۋشىلەرگە ءوتىنىش قالدىردى. ال "ابۋ دابي پلازا" نىسانىنداعى قۇرىلىس-مونتاج جۇمىستارىن اياقتاۋ شارالارىنا قاتىستى سۋبمەردىگەر مەكەمەلەر جۇمىس ورنىن جوسپارلى تۇردە ازايتپاق. وسىعان بايلانىستى جۇمىس توبى جۇمىستان بوساپ قالعانداردى ەڭبەككە ورنالاستىرۋ بويىنشا كەشەندى جوسپار ازىرلەنۋدە.
