بىلتىر قازاندا وتكەن تۇرسكوي تۇراقتى كەڭەسىنىڭ 32ء-شى وتىرىسىندا قابىلدانعان شەشىم بويىنشا، تۇركىمەنستاننىڭ مارى قالاسى – 2015 جىلدىڭ تۇركى دۇنيەسىنىڭ مادەني باس قالاسى بولىپ بەكىتىلدى. وسىعان وراي قازاننان كەلەسى ەستافەتانى العان مارى قالاسىندا «مارى – تۇركى دۇنيەسىنىڭ مادەني باس قالاسى 2015» جىلىنىڭ سالتاناتتى اشىلۋ ءراسىمى ءوتتى.

مارىداعى «رۋحىەت» مەملەكەتتىك سارايىندا وتكەن شاراعا تۇركىمەنستاننىڭ ءماجىلىس دەپۋتاتتارى، تۇركىتىلدەس ەلدەردىڭ مادەنيەت ۆەدومستۆالارى مەن قوعامدىق ۇيىمداردىڭ وكىلدەرى، عالىمدار مەن مادەنيەت مايتالماندارى، جۋرناليستەر مەن جاستار قاتىستى. سونداي-اق، حالىقارالىق تۇركسوي ۇيىمىنىڭ وكىلدەرى مەن قازاقستان، ءازىربايجان، قىرعىزستان، تۇركيا، ماكەدونيا، بوسنيا گەرسوگاۆينا، ۆەنگريا، بولگاريا، گاگاۋزيا (مولدوۆا رەسپۋبليكاسى)، رەسەي فەدەارسياسىنىڭ قۇرامىنداعى تاتارستان، باشقورتستان، حاكاسيا، تۋۆا، ساحا-ياكۋتيا، كالمىكيا، التاي سىندى تۇركى الەمىنىڭ تۇكپىر-تۇكپىرىنەن شىعارماشىلىق توپتار ورىن الدى.

سالتاناتتى اشىلۋ راسىمىنە ارنايى سالەم حات جولداعان تۇركىمەنستان پرەزيدەنتى گۋربانگۋلى بەردىمۇحامەدوۆ تاريحي شاراعا قاتىسىپ وتىرعان بارلىق قوناقتاردى ايتۋلى مەرەكەلىك كۇنمەن قۇتتىقتاپ، ادامزات وركەنيەتىنىڭ تاريحىندا ەلەۋلى ورنى بار ەجەلگى مارى قالاسىنىڭ تۇركى دۇنيەسىندەگى ءمانىن اشىپ، تۇرىكمەن حالقىنىڭ ەجەلدەن كەلە جاتقان ءسالت-داستۇرى، ونەرى مەن مادەنيەتى الەم حالىقتارىنىڭ جاقىنداسۋىنا قىزمەت ەتەتىندىگىن تىلگە تيەك ەتتى. مەرەكەلىك شارانىڭ تاريحي ماڭىزدىلىعىن بايان ەتكەن تۇركسوي باس حاتشىسى دۇيسەن قاسەيىنوۆ تۇركىمەنستان پرەزيدەنتىنە حالىقارالىق شارانىڭ وتۋىنە قولداۋ كورسەتىپ، تۇركى دۇنيەسىنىڭ ونەر مەن مادەنيەت سالاسىنا قوسقان سۇبەلى ۇلەسى ءۇشىن العىس ءبىلدىردى. «بۇگىنگى كۇنى، - دەگەن تۇركسوي باس حاتشىسى، - «تۇركى دۇنيەسىنىڭ مادەني باس قالاسى» جوباسىنىڭ اياسىندا ەتافەتانى قابىلداپ العان ەجەلگى مارى قالاسى يۋنەسكو-نىڭ بۇكىل الەمدىك تىزىمىنە ەنگەنى بارشاعا ءمالىم. وسى قاسيەتتى جەردە الەمدىك وركەنيەتىنىڭ ەجەلگى ورتالىقتارى مەن جالپى مادەني مۇرانىڭ قۇندىلىقتارىن سەزىنۋگە بولادى. سوندىقتان مارى قالىسىنىڭ تەڭدەسسىز مادەني مۇراسى تۇركى دۇنيەسىنىڭ مادەني ورتالىق بولۋعا ابدەن لايىقتى،» - دەپ شارانىڭ ءمانىن تەرەڭدەتە ءتۇستى.

شارا شەڭبەرىندە وتكەن كونسەرتكە ەلىمىزدىڭ تالانتتى ونەرپازدارى قاتىستى. «اق جايىق» ءانسامبلىنىڭ ت.اقبوكەن، ا.نوعايبايەۆا، ءا.نابييەۆا، ا.ەرجانوۆا، ت.جۇماعالييەۆ، گ.جۇماتايەۆا، ا.جالعاپوۆ، ب.اقتايەۆ، ە.بايمۇراتوۆ، س.بايمەنوۆا سىندى ونەرپازدارى قازاقتىڭ ءداستۇرلى مۋزىكاسىمەن تۇركىتىلدەس ەلدەردەن كەلگەن قوناقتاردى ءتانتى ەتتى. اسىرەسە بەلگىلى دومبىراشى تەمىر اقبوكەننىڭ تۇرىكمەننىڭ ۇلتتىق اسپابى دۋتارمەن قازاقتىڭ كۇيلەرىنەن پوپپۋري ورىنداعاندا تۇرىكمەن جۇرتشىلىعى ءدان ريزا بولدى، - حابارلايدى تۇركسوي-داعى قازاقستاننىڭ وكىلى مالىك وتاربايەۆ.