قازاقستان نارىعى تاعى ءبىر وتاندىق ونىممەن تولىقتى. قازاقتىڭ ويۋ-ورنەكتەرىمەن كومكەرىلگەن اۆتوموبيل ورىندىقتارىنا ارنالعان جابۋلار نارىققا جول تارتتى.
جاڭا ۇلگىدەگى جابۋلاردىڭ ەرەكشەلىگى كوپ.
بىرىنشىدەن، جابۋلار امبەباپ، ءار جىل ماۋسىمىنا سايكەس كەلە بەرەدى. تەرى جاعىن قىستا، باسقا جىل مەزگىلدەرىندە كەلەسى جاعىن قاراتىپ پايدالانا بەرۋگە بولادى. ەكىنشىدەن، جابۋعا سالىنعان قازاقى قىزىل ورنەكتەر سالونعا ەرەكشە كورىنىس پەن اسەمدىك سىيلايدى. ۇشىنشىدەن، جابۋلار امبەباپ ءارى كەز-كەلگەن كولىك ورىندىعىنا كيگىزگەندە، جاراسا بەرەدى. كولىگىڭىزدى اۋىستىرىپ جاتساڭىز، جابۋدى اۋىستىرىپ قاجەت ەمەس. تورتىنشىدەن، جابۋ ماتەريالى ساپالى، ال ورنەكتەر ساپالى ماتەريالدا اسا دالدىكپەن تىگەتىن ماشينامەن توقىلعان، كەمى 5 جىل كادەگە جارايدى. سونىمەن قاتار سالوننىڭ كورىنەتىن جەرلەرىندە باۋلارى جوق، ولار جاسىرىلىپ، سالوندا ەستەتيكالىق تۇرعىدان ادەمى كورىنەدى
جاڭا ءونىمدى جاساۋشى كاسىپكەردىڭ ءاتى-جونى – قۇمار جۇماحان. ونىڭ ايتۋىنشا ول بۇل كاسىپكە بىلتىردان باستاپ كىرىسكەن. «وسىدان تۋرا جىل بۇرىن، احمەتبەك نۇرسيلا اعامىزدىڭ اقىلىن تىڭداپ جالاقىلى جۇمىستان كەتىپ قالعاي ءجايىمىز بار ەدى. ءناسىپتى كاسىپتەن تاباتىن جولمەن ءجۇرىپ كورۋگە نيەتتەنگەمىز. ءاۋ باستا ءىنىم ەكەۋىمىز كىشىگىرىم ءبىر جۇمىستان باستادىق. جۋىردا ءۇيتىپ-بۇيتىپ، تيىننان تەڭگە قۇراپ ءجۇرىپ شاعىن تىگىن شەبەرحاناسىن قۇرعان بولدىق، العاشقى جانە نەگىزگى ءونىم رەتىندە ويۋ-ورنەكپەن كومكەرىلگەن، ۇلتتىق ناقىشتاعى اۆتوكولىكتىڭ ورىنقاپتارىن شىعارىپ وتىرمىز. ءقازىر الماتى قالاسى بويىنشا ساتىلىمعا ءتۇستى» دەيدى قۇمار جۇماحان.
جاس كاسىپكەردىڭ جول كورسەتۋشىسى، اقىل-كەڭەس بەرۋشىسى بەلگىلى كاسىپكەر – احمەتبەك نۇرسيلا. قۇمار جۇماحان جابۋلاردى دايىنداۋ كەزىندە وسى ازاماتپەن ءجيى اقىلداسىپ وتىرعان. احمەتبەك اعامىزدىڭ ايتۋىنشا ول قۇمار جۇماحاننىڭ ونىمىمەن وتكەن جىلعى ترەنينگ كەزىندە تانىسىپتى.
احمەتبەك نۇرسيلا اعامىز فەيسبۋكتەگى پاراقشاسىنا «بىلتىر ءبىراز بيزنەس ترەنينگ جۇرگىزىپ ەدىم. سودان ءبىراز جاستار شىنىندا “ءبىر نارسە ىستەپ” كەتپتى. ءبىر جاس جىگىت كەلىپ: “اعا، ءوزى قىستا جىلى، جازدا سالقىن، بىرەسە قوڭىر، بىرەسە كوك بولا قالاتىن، ءوزى ۇلتتىق ويۋمەن ارلەنگەن ءبىر نارسە ويلاپ تاپتىم قازاقتىڭ 50% -نا كەرەك نارسە”، دەپ (جابۋدى) كورسەتكەن ەدى. «ءوي مىناۋىڭ تاماشا ەكەن، اناۋسىن، مىناۋسىن جەتىلدىرسەڭ كەرەمەت سۇرانىس بولاتىن ءتۇرى بار باۋىرىم نەدە بولسا تاۋەكەل، كىرىس» دەپ باتامدى بەردىم» دەپ جازادى.
ءونىمنىڭ رەسمي سايتى: 2sheber.kz
اقپارات كوزى: businessnews.kz
