ق ر پارلامەنتى سەناتىندا ازاماتتىق قوعام ماسەلەلەرى بويىنشا وتكەن دوڭگەلەك ۇستەل وتىرىسىندا ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ ءدىني سالاداعى زاڭ جوباسىنىڭ كەيبىر نورمالارىنا تۇسىنىكتەمە بەردى.
«كەيبىر ادامداردىڭ قاتە تۇسىنىكتەرى نەمەسە ادەيى جاسالىپ وتىرعان جالعان، بۇرمالاعان مالىمەتتەرى بويىنشا مىنانى ايتقىم كەلەدى، زاڭنىڭ وزىندە مەكتەپ كيىمى، مىندەتتى ەكپە ەگۋ نورمالارى تۋرالى ءسوز قوزعالماعان، ساقال، شالبار ت.ب. سياقتى سوزدەر مۇلدەم جوق»، - دەپ باسا ايتتى مينيستر.
ن. ەرمەكبايەۆتىڭ ايتۋىنشا، زاڭ جوباسى قوعام مەن مەملەكەت الدىندا ادامدار ءوز مىندەتتەرىن ساقتاي وتىرىپ، ولاردىڭ قۇقىقتارى مەن ەركىندىكتەرىن قامتاماسىز ەتۋ ماسەلەسىن باستاپقى ورىنعا قويىپ وتىر. زاڭ جوباسىنىڭ باستاپقى ۇسىنىلعان نورمالارى تۇسكەن ۇسىنىستاردى ەسەپكە الا وتىرىپ تۇزەتىلۋ ۇستىندە.
ءدىني سالاداعى زاڭ جوباسى ەلىمىزدەگى تۇراقتىلىق پەن قاۋىپسىزدىكتىڭ بەرىك ىرگەتاسىن قالىپتاستىرۋعا باعىتتالعان.
«قازاقستان رەسپۋبليكاسىنىڭ ازاماتتىق قوعامدى دامىتۋ ماسەلەلەرى بويىنشا زاڭناماسىن جەتىلدىرۋ» تاقىرىبىندا وتكەن دوڭگەلەك ۇستەل وتىرىسىنا دەپۋتاتتار مەن مەملەكەتتىك ورگان وكىلدەرى، قوعامدىق بىرلەستىك جەتەكشىلەرى قاتىسىپ، مەملەكەتتىك ورگاندار مەن ۇكىمەتتىك ەمەس ۇيىمداردىڭ اراسىنداعى ءوزارا ءىس-قيمىل ماسەلەلەرى بويىنشا پىكىر الماستى. اتاپ ايتقاندا، قوعامدىق كەڭەستەردىڭ مىندەتتەرى، ۇكىمەتتىك ەمەس ۇيىمداردىڭ الەۋمەتتىك ارىپتەستىگىن نىعايتۋ، مەملەكەتتىك الەۋمەتتىك تاپسىرىس ساپاسىن ارتتىرۋ، ۇكىمەتتىك ەمەس ۇيىمدارعا گرانتتار ءبولۋ، ۆولونتەرلىق قىزمەتتى دامىتۋ، «رۋحاني جاڭعىرۋ» باعدارلاماسى اياسىندا «اتامەكەن» كىشى باعدارلاماسىن ىسكە اسىرۋ بارىسى تالقىلاندى.
پىكىر قالدىرۋ