بانكير ەرجان تاتىشيەۆتىڭ ءولىمى بويىنشا سوتتا قىلمىس سەبەپتەرىنىڭ ءبىرى ايتىلدى، دەپ حابارلادى Qamshy.kz اقپارات اگەنتتىگى استانا ارناسىنىڭ دەرەگىنە سۇيەنىپ. 

«تۇرانالەم» بانكىنىڭ باسقارما باسشىسىن ءولتىردى دەگەن ايىپ مۇراتحان توقماديگە تاعىلىپ وتىر. سوتتا بانكتىڭ قاۋىپسىزدىك قىزمەتى باسشىسى بولىپ ىستەگەن نيكولاي كۋزمەنكو جاۋاپ بەردى. ونىڭ ايتۋىنشا، تۇرمەدەن شىققانان كەيىن بۇكىل اكتيۆىنەن ايىرىلعان مۇحتار ءابليازوۆ ەرجان تاتىشيەۆكە اشۋلى بولعان كورىنەدى.

«شىققان كەزدە، تاتىشيەۆ نەمەسە بانك ونىڭ ۇلەسىن قايتارادى دەپ ويلادى. ءبىراق ارتى جانجالعا ۇلاستى: ءبىرى ۋادە بەردى، ەكىنشىسى ورىندامادى. ماعان مۇحتار ەسىنەن اداسقانداي بولىپ كورىندى. سونداي دارىندى ادام، گروسسمەيستەر، شاحماتشى، ول ىس-ارەكەتىن 12-15 جىل بۇرىن ەسەپتەيدى. ەندى كەلىپ ويى ىسكە اسپاي قالدى. وعان اقشادان بۇرىن، جالپى پروسەسس ماڭىزدى بولدى»، — دەيدى كۋزمەنكو.

قازاقستاننىڭ ارنايى قىزمەتى 2017 جىلى 12 ماۋسىمدا «قازشىنىقۇرىلىس» ج ش س باس ديرەكتورىنىڭ كەڭەسشىسى مۇراتحان ءتوقماديدى ۇستادى.

بيزنەسمەن ءىرى كولەمدە مۇلىك يەمدەنۋ ءۇشىن بوپسالاۋمەن اينالىستى دەپ ايىپتالىپ، سوت ونى ءۇش جىلعا باس بوستاندىعىنان ايىردى.

كەيىنىرەك مۇراتحان ءتوقمادي «بتا بانك» باسقارماسىنىڭ بۇرىنعى باسشىسى ەرجان تاتىشيەۆتى ولتىرگەنىن مويىندادى.