بۇگىن استانادا قازاقستان مۇسىلماندارى ءدىني باسقارماسىنىڭ ۇيىمداستىرۋىمەن ەۋرازيا مۇسىلماندارى عۇلامالارىنىڭ فورۋمى ءوتتى.
حالىقارالىق فورۋمنىڭ ماقساتى - ورتالىق ازيانىڭ تاريحي ءدىني مەكتەبىن دارىپتەۋ ارقىلى ءدىني ساۋاتتىلىقتى ارتتىرۋ، ەۋرازيا ەلدەرىنىڭ ورتاق ءپاتۋالار بازاسىن قالىپتاستىرۋ، ءدىني ەكسترەميزمنىڭ كەز-كەلگەن كورىنىسىنە قارسى يممۋنيتەتتى قالىپتاستىرۋ، سونداي-اق 2018 جىلى قازاقستاندا وتەتىن الەمدىك جانە ءداستۇرلى دىندەر ليدەرلەرىنىڭ كەزەكتى سەزىنە ۇسىنىمدار ازىرلەۋ بولىپ تابىلادى.
فورۋمعا قاتىسۋشىلار الدىندا ق ر ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ قۇتتىقتاۋ ءسوز سويلەدى.
«يسلام ءدىنى تاتۋلىق پەن تاعاتتىلىقتىڭ، جاسامپازدىق پەن جاراسىمدىلىقتىڭ ءدىنى ەكەنىن ءاردايىم ءوز ىسىمەن كورسەتىپ كەلەدى. بىزگە وسى مۇرانى ساقتاپ قالۋ وتە ماڭىزدى. حالىققا ءدىننىڭ ءداستۇرلى قاعيدالارىن دۇرىس ءتۇسىندىرۋ ءۇشىن قۇران مەن حاديستەرگە نەگىزدەلگەن بىلىكتى عۇلامالار مەن يمامداردى جۇمىلدىرىپ، بىزگە جەتكەن باي مۇرالارىمىزدى قايتا جاڭعىرتۋ ءۇشىن جۇمىس جاساۋىمىز كەرەك دەپ سانايمىن. دىننەن، ەڭ الدىمەن، رۋحاني، مورالدىق، ەتيكالىق قۇندىلىقتاردى الۋىمىز كەرەك»-دەپ اتاپ ءوتتى نۇرلان ەرمەكبايەۆ.
فورۋم جۇمىسىنا ق ر پارلامەنتى سەناتىنىڭ ءتوراعاسى قاسىم-جومارت توقايەۆ، سەنات پەن ءماجىلىس دەپۋتاتتارى، قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي - سەرىكباي قاجى وراز، ەۋروپا مەن ورتالىق ازيانىڭ 21 ەلىنەن 35 دەلەگات، اتاپ ايتقاندا باس مۋفتيلەر، ءدىني قايراتكەرلەر، يسلام ۇيىمدارى مەن وداقتارىنىڭ كوشباسشىلارى، زيالى قاۋىم وكىلدەرى، جازۋشىلار، تەولوگ-عالىمدار، وبلىستاردىڭ باس يمامدارى قاتىسۋدا.
فورۋم قورىتىندىسى بويىنشا «بۇگىنگى مۇسىلمان كەلبەتى» قۇجاتى قابىلدانىپ، فورۋم قاتىسۋشىلارىنىڭ قارارى جاريالانادى.
