ورتالىق كوممۋنيكاسيالار قىزمەتىندە ق ر ينۆەستيسيالار جانە دامۋ ءمينيسترى جەڭىس قاسىمبەك مەملەكەت باسشىسىنىڭ «ءتورتىنشى ونەركاسىپتىك ريەۆوليۋسيا جاعدايىنداعى دامۋدىڭ جاڭا مۇمكىندىكتەرى» اتتى قازاقستان حالقىنا جولداۋى اياسىندا ونەركاسىپ، كولىك جانە لوگيستيكالىق ينفراقۇرىلىمدى سيفرلاندىرۋ، قۇرىلىس پەن كوممۋنالدىق سەكتورعا زاماناۋي تەحنولوگيالاردى ەنگىزۋ، تۇرعىن ۇيگە قولجەتىمدىلىكتى قامتاماسىز ەتۋ مەن جەرگىلىكتى جولدار جەلىسىن دامىتۋ بويىنشا ءجۇرىپ جاتقان جۇمىستارعا بايلانىستى باسپا ءسوز كونفەرەنسياسىن وتكىزدى. 

ونىڭ ايتۋىنشا، باعدارلامانى ويداعىداي ىسكە اسىرۋدىڭ ناتيجەسىندە  2017 جىلى وڭدەۋ ونەركاسىبىنىڭ ءوسىمى 5،1%-عا جەتتى. بيىل جىل سوڭىنا دەيىن 1 ترلن تەڭگە قارجىعا 150 جاڭا جوبانى ىسكە قوسۋ جوسپارلانىپ وتىر. وندا شامامەن 15 مىڭ تۇراقتى جۇمىس ورنى اشىلادى.

«مەملەكەت باسشىسىنىڭ تاپسىرماسىنا سايكەس، جاڭا جاھاندىق تەحنولوگيالىق ترەندتەردى ەسكەرە وتىرىپ، ءۇشىنشى بەسجىلدىقتىڭ تۇجىرىمداماسىن ازىرلەۋگە كىرىستىك. ول ونەركاسىپتى سيفرلاندىرۋعا جانە جاڭا تەحنولوگيالاردى ەنگىزۋگە باعىتتالعان. بۇل جۇمىسقا بيزنەستى، عىلىمي ورتا مەن ساراپشىلاردى تارتتىق. تۇجىرىمدامانى جىل سوڭىنا دەيىن بەكىتۋدى جوسپارلاپ وتىرمىز»،-دەپ اتاپ ءوتتى جەڭىس قاسىمبەك.

«سيفرلى قازاقستان» مەملەكەتتىك باعدارلاماسىن ىسكە اسىرۋ اياسىندا ونەركاسىپ كاسىپورىندارىن سيفرلاندىرۋدىڭ ءبىرقاتار پيلوتتىق جوباسىن ىسكە قوسامىز. ولار سيفرلى تەحنولوگيانى ەنگىزۋ مۇمكىندىگىن كورسەتەتىن الاڭ بولادى. مينيسترلىك اۆتوموبيل، تەمىرجول جانە اۋە كولىگى سالالارىنا اقپاراتتىق جۇيە ەنگىزۋ جۇمىستارىن بەلسەندى تۇردە جۇرگىزىپ جاتىر.

«نۇرلى جەر» باعدارلاماسىن ىسكە اسىرۋدىڭ ناتيجەسىندە 100 مىڭنان استام وتباسى جاڭا باسپاناعا قول جەتكىزدى.

2017 جىلدىڭ قورىتىندىسى بويىنشا قازاقستاندا پايدالانۋعا بەرىلگەن تۇرعىن ءۇي كولەمى 11 ملن شارشى مەتردەن استى. ياعني، 2016 جىلعا قاراعاندا 6،2%-عا جوعارى. تۇرعىن ۇيگە قولجەتىمدىلىكتى قامتاماسىز ەتۋ ماقساتىندا ارزان قۇرىلىس پەن يپوتەكالىق كرەديت بەرۋ ماسەلەلەرى بويىنشا جۇمىس جۇرگىزەمىز. 2030 جىلعا قاراي تۇرعىن ءۇي كورسەتكىشىن ءبىر تۇرعىنعا شاققاندا 30 شارشى مەترگە دەيىن جەتكىزۋ جوسپارلانۋدا.

كوممەرسيالىق بانكتەر بيىل قۇرىلىس سالۋشىلارعا 70 ملرد تەڭگەگە سۋبسيديالاناتىن نەسيە بەرەدى. مەملەكەت باسشىسى جاريالاعان «بەس الەۋمەتتىك باستامانى» ىسكە اسىرۋ اياسىندا وسى ايدا جاڭا «7-20-25» يپوتەكالىق باعدارلاماسىنىڭ نورمالارىن ەسەپكە الا وتىرىپ، «نۇرلى جەر» باعدارلاماسىنا وزگەرىس ەنگىزىلەدى.

«بۇل مەحانيزم ارقىلى ءاربىر جۇمىس ىستەيتىن ادام نەسيەگە پاتەر ساتىپ الا الادى. قازاقستاندىقتاردىڭ كوبىنىڭ ءتيىمدى شارتتار ارقىلى باسپانا ساتىپ الۋعا مۇمكىندىگى بولادى. بيىلعى جىلدىڭ ەكىنشى جارتىسىندا بارلىق ساناتتاعى ازاماتتار ءۇشىن العاشقى ارزان يپوتەكا بەرىلەدى»،-دەدى مينيستر جەڭىس قاسىمبەك.

قازىرگى ۋاقىتتا جاڭا باعدارلامانى نەعۇرلىم ءتيىمدى ىسكە اسىرۋ ءۇشىن تالاپتارىن جەڭىلدەتۋ بويىنشا ۇلتتىق بانك بانك قازاقستان رەسپۋبليكاسىنىڭ زاڭناماسىنا ءبىرقاتار تۇزەتۋلەر دايىنداپ جاتىر.

مينيستر جەڭىس قاسىمبەكتىڭ ايتۋىنشا، اۋىلدىق ەلدى مەكەندەردى ورتالىقتاندىرىلعان اۋىز سۋمەن جابدىقتاۋ قولجەتىمدىلىگىن 59%-عا، ال قالالاردا 94%-عا جەتكىزۋ جوسپارلانۋدا (اۋىلدار ءۇشىن -57،4 %، قالالار – 93،8%). بيىل اۋىلدى جەرلەردى سۋمەن جابدىقتاۋدى دامىتۋعا شامامەن 100 ملرد. تەڭگە قاراستىرىلدى (ق ر يدم - 68،2 ملرد تەڭگە، ق ر اشم – 14،8 ملرد تەڭگە، جەرگىلىكتى بيۋدجەت – 22 ملرد تەڭگە).

2017 جىلى تاسىمالدانعان ترانزيتتىك كونتەينەرلەر سانى 347،5 مىڭ جيىرما فۋتتىق ەكۆيۆالەنتتى قۇرادى (جوسپار – 320 مىڭ جفە). بۇل 2016 جىلعىمەن سالىستىرعاندا 30%-عا ارتىق (244 مىڭ جفە). 2020 جىلى ءترانزيتتى كونتەينەرلەر تاسىمال كولەمىن  جىلىنا 2 ملن. كونتەينەرگە دەيىن جەتكىزۋ جوسپارلانىپ وتىر.

وڭىرىشىلىك موبيلدىلىكتى ارتتىرۋ ماقساتىندا مەملەكەت باسشىسى جەرگىلىكتى جول جەلىسىن جوندەپ، قايتا جاڭارتۋ ءۇشىن قارجىلاندىرۋ كولەمىن ۇلعايتۋدى تاپسىردى. بۇل باعىتتاعى جۇمىستار بەلسەندى تۇردە اتقارىلۋدا.

«بيىل قارجىلاندىرۋ كولەمى 85 ملرد تەڭگەنى قۇرادى. 2018 جىلعى بيۋدجەتتى ناقتىلاۋ كەزىندە مينيسترلىك قوسىمشا 30 ملرد تەڭگە ءبولدى.

وبلىس اكىمدىكتەرى دە جەرگىلىكتى بيۋدجەتتەن قارجى قاراستىردى. جالپى، قارجىلاندىرۋ كولەمى 145 ملرد. .ەڭگەنى قۇرايدى، ول 4 مىڭ شاقىرىم جولدى جوندەۋ جۇمىستارىنا جۇمسالادى. الداعى جىلدارى قارجىلاندىرۋ سوماسى 150 ملرد. تەڭگەگە دەيىن جەتكىزىلەدى. ول قارجىعا جىل سايىن شامامەن 5 مىڭ شاقىرىم جول جوندەلەدى»،-دەدى جەڭىس قاسىمبەك.

بيىل «نۇرلى جول» باعدارلاماسىن جۇزەگە اسىرۋ اياسىندا 4،2 مىڭ شاقىرىم رەسپۋبليكالىق ماڭىزى بار اۆتوجولدار جانە 3 مىڭ شاقىرىم جەرگىلىكتى جەلىلەر رەكونسترۋكسيالانادى. قابىلدانعان شارالار الداعى جەتى جىلدا جەرگىلىكتى جولداردىڭ 85%-ىن جاقسارتۋعا مۇمكىندىك بەرەدى.

ءوز كەزەگىندە مينيسترلىك اۆتوجولداردى سالۋعا بولىنگەن قاراجاتتىڭ تيىمدىلىگى مەن اشىقتىعىن باقىلاۋدى كۇشەيتەدى.