ەۋرازيا ءبىرىنشى ارناسىنداعى «قايىرلى تاڭ» باعدارلاماسىندا قوناق بولعان زاماناۋي جىراۋ، جۋرناليست جان احمادييەۆ الەۋمەتتىك جەلىدەگى كوپ تالقىلانعان داۋلى ۆيدەوعا بايلانىستى پىكىر ءبىلدىردى. «جەزوكشەلەردى» قامشىمەن ساباعانىنا ءوزى وكىنبەيتىن سەكىلدى.
«كەلەسى جولى جەزوكشەلەر كوشەگە شىعۋدان قورقاتىن بولادى. سەبەبى ولار قامشىمەن ساباپ كەتپەيدى مە ەكەن دەپ ءار كليەنتىنەن قورقاتىن بولادى»، - دەيدى جان احمادييەۆ.
بۇعان قوسا بولاشاققا جوسپارلارىمەن بولىسكەن ول ءوزىن دەپۋتات رەتىندە كورەتىنىن ايتىپ قالدى.
«سوڭعى كەزدە وسىنداي ۇسىنىستار كوبەيىپ كەتتى. دەپۋتات بولسام، ءبىراز نارسە وزگەرتەر ەدىم. قازىرگى تاڭدا ونداي ادامدار مۇنداي قىزمەتكە بەلگىلى ءبىر ماقساتتى، ءوزىنىڭ جەكە باسىنىڭ قامىن كوزدەپ بارادى. مەن قاراپايىم حالىقتىڭ ورتاسىندا جۇرگەننەن كەيىن حالىقپەن بىرگە بولعىڭ كەلەدى. اتتەڭ-اي دەيسىڭ، قولدا كىشكەنە بيلىك بولسا، وزگەرىستەر جاسار ەدىم. بىرىنشىدەن قازاقتىڭ دارەجەسىن كوتەرەر ەدىم. قازاق ستويانكادا جۇمىس ىستەيدى، قازاق – كۇزەتشى، قازاق كىم – قازاق كوندۋكتور. سوندا قازاق باسقا جۇمىس جاساي الماي ما؟ ماقساتىم – قازاقتىڭ ءسوزىن سويلەۋ، قازاقتىڭ جىرتىسىن جىرتۋ»، - دەيدى زاماناۋي جىراۋ.
ايتا كەتەيىك، ناۋرىزدىڭ اياعىندا جان احمادييەۆتىڭ «جەزوكشەلەردى» قامشىمەن ساباعان ۆيدەوسى الەۋمەتتىك جەلىدە تاراپ، قوعام پىكىرى ەكىگە بولىنگەن. ءبىر بولىگى زاماناۋي جىراۋدى قولداپ، ءىسىن دۇرىس دەسە، ەندى ءبىرى مۇنى قارا پيارعا بالادى. ال بىرنەشە كۇننەن كەيىن ۆيدەونىڭ الدىن الا جوسپارلانعانى ءارى ونداعى «جەزوكشەلەر» احمادييەۆتىڭ ايەلى مەن تانىستارى بولىپ شىققانى انىقتالعان.
