كەشە قاراعاندىدا 16 كوشەنىڭ اتىن اۋىستىرۋ تۋرالى تىڭداۋ ءوتتى. بۇل جايىندا جۋرناليست ءلاززات قوجاحمەتوۆا ءوزىنىڭ Facebook پاراقشاسىندا حابارلادى. 

ءجۋرناليستىڭ ايتۋىنشا، ءتورت جىلدان كەيىن ءوتىپ تۇرعان تىڭداۋ ايقاي-شۋمەن وتكەن.

— بۇل كوشەلەردىڭ اتاۋىن سول كوشەلەردى ءوز قولىمەن تۇرعىزعاندار عانا وزگەرتۋى كەرەك،- دەدى ءبىر تۇرعىن، قاراعاندى قالاسى وزگە ۇلتتاردىڭ ارقاسىندا سالىندى دەگەن ەمەۋرىن تانىتىپ. بۇل ۇسىنىس جينالعانداردىڭ قارسىلىعىن تۋدىردى. "حالىققا الدىن الا حابارلانعان جوق. تالقىعا سالىنبادى" دەدى سول ازامات. بۇل سوزگە ايسۇلتان جاقىپوۆ (قاراعاندىلىق بلوگگەر)  كۇيىپ كەتتى، - دەپ جازدى ل. قوجاحمەتوۆا. 

— الەۋمەتتىك جەلىلەردە باياعىدان تالقىعا سالىنىپ جاتىر. ءسىز قازاقشا بىلسەڭىز بىلەر ەدىڭىز، - دەدى جيىن بارىسىندا ايسۇلتان جاقىپوۆ. 

«قازاقستان» رترك» اق قاراعاندى وبلىستىق فيليالى ديرەكتورىنىڭ ورىنباسارى  جانىبەك سادىقانوۆتىڭ ايتۋىنشا،  بۇل ماسەلە وتكەن جىلدىڭ قاراشاسىنان باستاپ تالقىعا شىعارىلعان.

— كيرپيچنايا تاريحي اتاۋ ەمەس پە؟ ول نەگە وزگەرۋى كەرەك، - دەگەن سۇراق قويىلدى. وعان دالەلدى جاۋاپ بەرىلدى. جيىن بارىسىندا ۇلتارالىق تىلدە سويلەۋ دە ۇسىنىلعان.

ساياساتكەر ايتكوجا فازىلوۆ: كونستيتۋسيادا ۇلتارالىق ءتىل دەگەن ءسوز جوق. مەملەكەتتىك ءتىل - قازاق ءتىلى دەگەن باپ بار. كۇنىنە ەكى ءسوز جاتتاساڭىزدار ءبىر جىلدا 600 ءسوز ۇيرەنەتىن ەدىڭىزدەر. قازاقشا سويلەپ ۇيرەنىڭىزدەر،-دەدى. 

قاراعاندى تۇرعىنى جەكسەن ابدراحمانوۆ لەنين كوشەسىن وسى ۋاقىتقا دەيىن وزگەرتپەۋدىڭ سەبەبى قانداي دەگەن ساۋال قويدى.  

— مەنىڭ بىلۋىمشە، قاراعاندىدا 600-گە تاياۋ كوشە بار. سونىڭ تىم بولماسا ءجۇزى زامانعا ساي اتاۋعا يە مە؟ كۇمانىم بار. قالعان 400-500 كوشە زاماناۋي اتقا يە دەپ كىمدى سەندىرمەك؟ جىلىنا 30 كوشەنىڭ اتىن اۋىستىرۋدى داۋىسقا سالادى ەكەن. سوندا قاراعاندىنى قازاقىلاندىرۋ ءۇشىن نەشە بەسجىلدىق كەرەك؟ داۋىسقا سالعاندا كوشە اتىن اۋىستىرۋعا بار جوعى 6 ادام قارسى ەكەنى بەلگىلى بولدى. قولدايتىندار ءبىر قاۋىم ەل ەكەن. جينالعانداردىڭ دەنى اقساقالدار. جاستاردى بۇل ماسەلە قىزىقتىرماي ما؟، - دەپ جازدى ءلاززات قوجاحمەتوۆا.