Ratel.kz سايتىنىڭ جۇمىسى ۋاقىتشا توقتاتىلىپ، باس رەداكتورى مارات ءاسىپوۆ كۇدىكتىلەر قاتارىنا ىلىكتى. بۇل تۋرالى Ratel.kz ءجۋرناليسى ۆاديم بورەيكو Facebook-تەگى پاراقشاسىندا جازدى.

«مارات ءاسىپوۆ 8 ساعاتقا سوزىلعان تەرگەۋدەن شىقتى. سايت قىزمەتكەرلەرى ساپا مەكەبايەۆ پەن اننا كالاشنيكوۆا دا تەرگەلەدى ءارى كۇدىكتى دەپ تانىلۋى مۇمكىن»، - دەپ جازدى ۆاديم بورەيكو.

ال Ratel.kz سايتى مەنت Forbes Kazakhstan جۋرنالى رەداكسيالارىن ءتىنتۋ كەزىندە ۇستالىپ، كەيىن بوساتىلعان Forbes.kz ءجۋرناليسى الەكساندر ۆوروتيلوۆتىڭ مارتەبەسى ازىرگە بەلگىسىز.

ەسكە سالا كەتەيىك، جۋرناليستەردى رەداكسياداعى تىنتۋدەن سوڭ ۇستاعان ەدى. الماتى پوليسياسى بۇل ارەكەتىن ەكى اقپارات قۇرالى «ادەيى جالعان مالىمەت تاراتادى» دەلىنگەن «ازامات ك» ارىزىمەن بايلانىستىردى. باق-تىڭ دەرەگىنشە، «ازامات ك» - بۇرىنعى مەملەكەتتىك كىرىستەر ءمينيسترى، كاسىپكەر زەينوللا كاكىمجانوۆ. كاكىمجانوۆ وتكەن جىلى اتالعان باسىلىمدارمەن سوتتاسىپ، ولاردان 50 ملن تەڭگە ءوندىرۋ شاعىمىن جەڭىپ شىققان. ال كاكىمجانوۆتىڭ جەمقورلىق سحەماسىن اشكەرەلەمەك بولعان جۋرناليستەر سوتتىڭ بۇل شەشىمىمەن كەلىسپەدى.

پوليسيا Forbes Kazakhstan رەداكسياسىن تىنتىگەن سوڭ، ۆوروتيلوۆتىڭ جۇمىس كومپيۋتەرىن الىپ كەتتى. وتكەن اپتادا بۇعاتتالعان Ratel.kz سايتىنىڭ رەداكسياسىنان دا كومپيۋتەرلەر مەن قۇجاتتار الىنعان.

كاكىمجانوۆ Facebook الەۋمەتتىك جەلىسىندەگى پاراقشاسىندا وزىنە قارسى ماقالالاردى «تاپسىرىسپەن جازىلعان» دەپ اتادى.