الماتى تەلەارناسىنىڭ باسشىسى الىبەك الدەنەي الەۋمەتتىك جەلىدە حالىقتان كەشىرىم سۇراپ، مالىمدەمە جاسادى. ارنا باسشىسىنىڭ كەشىرىم سۇراۋىنا 4 ءساۋىر كۇنى «الماتى» تەلەارناسىنداعى «اقشام الاڭ» باعدارلاماسىندا اقىن مۇحتار شاحانوۆتىڭ XX عاسىرداعى قازاقتىڭ ومىردەن وتكەن ۇلى ەسىمدەرىنە قاراتا ايتقان سوزدەرى سەبەپ بولعان.
«باعدارلامادا ءيىسى قازاق توبەسىنە تۇتقان ۇلى تۇلعالار - ءىرى ەپيك جىراۋ جامبىل اتامنىڭ، قازاق ادەبيەتىنىڭ كلاسسيگى، ۇلى جازۋشى مۇحتار اۋەزوۆ اتامنىڭ، قازاق پوەزياسىنىڭ الىبى مۇقاعالي ماقاتايەۆ اتامنىڭ ارۋاعىنان، قازاق ادەبيەتى تاريحىندا وزىندىك ورنى بار قايراتكەر، اقىن اعام نۇرلان ءورازاليننىڭ وزىنەن، ايتىلعان قيسىنسىز وي-پىكىرلەر ءۇشىن كەشىرىم وتىنەمىن!
«جاڭىلمايتىن جاق، سۇرىنبەيتىن تۇياق بولمايدى» دەيدى قازاق. ءبىزدىڭ تاراپتان وسىنداي جاڭساقتىق كەتتى... قوعام قايراتكەرلەرىن ەفيرگە شاقىرعانداعى ماقساتىمىز - قوعامعا ۇلگى بولار وي تاراتۋ. زيالى قاۋىم وكىلدەرى قاشاندا حالىقتى تاربيەلەۋشى، اسىل ءسوزدىڭ قازىناسى، تەرەڭ پايىم يەسى دەپ سانايمىز.»، - دەيدى تەلەارنا باسشىسى.
ءبىر ايتا كەتەرلىگى، شاحانوۆ الماتى ارناسىنىڭ ەفيرىنە دەيىن-اق، 1 ساۋىردە تاراتقان مالىمدەمەسىندە مۇحتار اۋەزوۆ، ءسابيت مۇقانوۆ، قادىر مىرزالييەۆ، مۇقاعالي ماقاتايەۆ، جامبىل جابايەۆ سياقتى تۇلعالاردىڭ ادامي بولمىسىنا سىن ايتىپ، ولاردىڭ تاريحتاعى بەينەسىنە كۇمان كەلتىرگەن ەدى. ءارى وسى مالىمدەمەسىن جۇرتتىڭ سىنىنا قالعان.
ارينە حالىق توبەسىنە كوتەرگەن، قوعامعا، مەملەكەتكە اتى تانىلعان تۇلعالاردىڭ اۋزىنا قاقپاق بولۋ قانداي دا ءبىر ب ا ق باسشىسىنىڭ مىندەتى ەمەس. بىرەر جىلدىڭ ىشىندە-اق «الماتى» ارناسىنىڭ بويىنا قان جۇگىرتكەن الىبەك الدەنەي تىكەلەي قاتەلىك وتكىزبەسە دە، قازاق توبەسىنە كوتەرگەن ازاماتتىڭ ارتىق-اۋىس پىكىرى ءۇشىن تەلەارنا باسشىسى رەتىندە كىشىرەيىپ، «ەڭ قيىنى، وسى ءبىر ابەس اڭگىمە، جەل ءسوز ەل اراسىنا ىرىتكى سالماسا، قالعان قاڭقۋ سوزگە تامىزىق بولىپ كەتپەسە دەگەن ادال نيەتپەن، اق كوڭىلمەن وسى سوزدەردى جازىپ وتىرمىن...» ،- دەپ الاڭدايدى.
