اقش-تاعى سايلاۋعا رەسەيدىڭ قاتىسى بار-جوعىن تەكسەرىپ جۇرگەن ارنايى پروكۋرور روبەرت ميۋللەر رەسەيلىك وليگارحتاردى تەرگەي باستادى. بۇل تۋرالى 4 ساۋىردە CNN حابارلادى.

دەرەكتەرگە سۇيەنسەك، ءبىر رەسەيلىك ميللياردەردى نيۋ-يورككە جەكە ۇشاعىمەن قونعان ساتىنەن-اق ۇستاعان. ونى تەرگەپ، ەلەكتروندىق قۇرىلعىلارىن تۇگەل تەكسەرگەن. اقش-قا ساپارلاپ كەلگەن ەكىنشى وليگارحتى دا تەرگەدى. ال ميۋللەردى قىزىقتىرعان ءۇشىنشى ميللياردەر كوپتەن بەرى اقش-قا كەلمەگەن. وعان امەريكالىق ارنايى پروكۋرورلارمەن «اڭگىمەلەسۋ تۋرالى ۇسىنىس» جىبەرىلدى.

رەسەيلىك وليگارحتاردىڭ كىم ەكەنى جانە ولاردىڭ اقش-قا قاشان بارعاندارى بەلگىسىز. CNN دەرەگى بويىنشا، بۇل ارەكەتتەر تەرگەۋشىلەردە رەسەيلىك ازاماتتاردىڭ ترامپتىڭ سايلاۋالدى كامپانياسىن تىكەلەي نەمەسە جاناما قارجىلاي دەمەۋشىلىكپەن اينالىسقانىنا قاتىستى قۇجاتتار بارىن ايعاقتاۋى مۇمكىن. امەريكا زاڭىنا سايكەس، اقش-تاعى شەتەلدىك ازاماتتار ونداي دەمەۋشىلىك جۇمىستارمەن اينالىسا المايدى. ميۋللەر رەسەيلىكتەردى ترامپقا اقشا اۋدارۋ مۇمكىن دەپ كۇدىكتەنىپ وتىر.

ەسكە سالا كەتەيىك، 16 اقپاندا امەريكالىق ادىلەت مينيسترلىگى 2016 جىلى اقش-تاعى پرەزيدەنت سايلاۋىنا ارالاسقان كۇدىكتىلەردىڭ ءتىزىمىن جاسادى. تىزىمگە رەسەيدىڭ ەۆگەنيي پرويگوجين باستاعان 13 ازاماتى جانە ءۇش كومپانياسى كىردى. الايدا بىلتىر قاراشادا پريگوجين سايلاۋ كامپانياسىنا ەش قاتىسى جوق ەكەنىن ايتقان.